بۇگىن وقۋشىلار سارايىنىڭ الاڭىندا قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى مەن وبلىستىق ءبىلىم باسقارماسىنىڭ ۇيىمداستىرۋىمەن «ادال ۇرپاق» ەرىكتى مەكتەپ كلۋبتارىنىڭ وبلىستىق سلەتى ءوتتى .

سلەتكە اگەنتتىكتىڭ الماتى وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ، الماتى وبلىسى بويىنشا دەپارتامەنتىنىڭ پرەۆەنتسيا باسقارماسىنىڭ باسشىسى اسقار سادىقوۆ، الماتى وبلىسى ءبىلىم باسقارماسى باسشىسىنىڭ ورىنباسارى ايجان ادامبەكوۆا، الماتى وبلىسى بويىنشا دەپارتامەنتىنىڭ پرەۆەنتسيا باسقارماسىنىڭ باس مامانى ماقپال بەككۋلوۆا جانە كوماندا كاپيتاندارى مەن كلۋب قاتىسۋشىلارى قاتىستى.

بايقاۋدا وبلىس بويىنشا 17 اۋدان، 3 قالانىڭ جۇزدەن - جۇيرىك، مىڭنان – تۇلپار اتانعان «ادال ۇرپاق» ەرىكتى مەكتەپ كلۋبتارىنىڭ كاپيتان كوماندالارى ءوز اۋدان، قالالارىنداعى سىبايلاس جەمقورلىققا قارسى كۇرەس باعىتىنداعى جوبالاردى قورعادى.

سونداي-اق،سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ ءىس-شارا جاستاردىڭ بويىندا گۋمانيزم مەن ۇلتتىق قۇندىلىقتار نەگىزىندە سىبايلاس جەمقورلىققا قارسى مادەنيەتتى قالىپتاستىرۋ ماقساتىندا ۇيىمداستىرىلعانىن اتاپ ءوتتى.

«ادال ۇرپاق». بۇل-مەكتەپ وقۋشىلارى مەن ستۋدەنتتەر اراسىندا ۇيىمداستىرىلاتىن ءداستۇرلى شارا. ماقساتى-جاستاردى سىبايلاس جەمقورلىقپەن كۇرەسۋگە شاقىرۋ. بۇگىن ءبىلىم ورداسىندا جىل بويى سىبايلاس جەمقورلىققا قارسى قۇرىلعان «ادال ۇرپاق» ەرىكتى مەكتەپ كلۋبتارىنىڭ جاساعان جۇمىستارىن قورىتىندالاۋ ءوز مارەسىنە كەلدى. وسكەلەڭ ۇرپاقتىڭ سىبايلاس جەمقورلىقتان اۋلاق بولۋى ءۇشىن مەكتەپ قابىرعاسىنان باستاپ وسى باعىتتا تاربيە بەرۋ ماڭىزدى».

بايقاۋ قورىتىندىسى بويىنشا باس جۇلدە ىلە اۋدانى، I-ورىن پانفيلوۆ اۋدانى، II- كوكسۋ اۋدانى، III – ورىن ەڭبەكشىقازاق اۋدانى يەلەندى.
باس جۇلدە يەگەرى ىلە اۋدانى، م.ماقاتاەۆ اتىنداعى №13 مەكتەپتىڭ وقۋشىسى زامانبەك سىمبات اسەتۇلى «اقيقات الاقانى» تاقىرىبىندا جوبا قورعادى.
«بۇل تاقىرىپتى تاڭداۋداعى ماقساتىم قر كونستيتۋتسياسىن باسشىلىققا الا وتىرىپ سىبايلاس جەمقورلىققا قارسى وتباسى ءرولى جانە قازاقستاندا تۇراتىن وزگە ۇلتتار مەن وبلىستاردىڭ مادەني داستۇرلەرىن، ءتىلىن، ءدىنىن قاستەرلەۋگە جاس ۇرپاقتى تاربيەلەۋ. قاراپايىم حالىقتى الداماۋ. ەرتەڭگى كۇننىڭ نەسىبەسىنە قول سۇعۋعا جول بەرمەۋ»،-دەيدى.

جەڭىمپازدار باعالى سىيلىقتار جانە گراموتالارمەن ماراپاتتالدى.

Abai.kz