قازاقستان مەن قىرعىزستان كەدەن بەكەتتەرىنەن جۇك كولىكتەرىن كەدەرگىسىز وتكىزۋ ماسەلەسى بويىنشا كەلىسسوز وتكىزىپ جاتىر. بۇل جونىندە 3 قاراشادا جوگوركۋ كەڭەش وتىرىسىندا قىرعىزستان ەكونوميكا جانە ساۋدا ءمينيسترىنىڭ ورىنباسارى بەكبولات اليەۆ حابارلادى.

دەپۋتات ساماتبەك يبراەۆتىڭ ايتۋىنشا، قازاقستانمەن شەكارادا شاقىرىمعا سوزىلاتىن جۇك كولىكتەرىنىڭ كەزەگى قايتا پايدا بولعان. اراسىندا اۋىل شارۋاشىلىق ونىمدەرىن تاسىپ جاتقان كولىكتەر دە بولۋى مۇمكىن. يبراەۆ ەكونوميكا ۆيتسە-مينيسترىنەن كولىك كەپتەلىسىنىڭ سەبەبىن سۇراعان.

ال ۆيتسە-مينيستر جۇك كولىكتەرىنىڭ جينالىپ قالعانىنان حابارسىز ەكەنىن جەتكىزدى. ونىڭ سوزىنە قاراعاندا، قىرعىزستان قازاقستانمەن بىرنەشە جىلدان بەرى شەكاراداعى شەكتەۋلەردى الىپ تاستاۋ جونىندە كەلىسسوز جۇرگىزىپ كەلەدى. 2019 جىلدان باستاپ ەكى ەل جۇك كولىكتەرىن تەكسەرمەي وتكىزۋ مەحانيزمىن سىناقتان وتكىزگەن. جوبا اياقتالعاننان كەيىن كەلىسسوز قايتا جالعاسقان.

"2020 جىلى تامىزدا ەكى ەلدىڭ پرەمەر-مينيسترلەرى جۇك كولىكتەرىن كەدەرگىسىز وتكىزۋ تۋرالى حاتتاماعا قول قويعان. وسى حاتتاماعا سايكەس، ناۆيگاتسيالىق پلومباسى جوق كولىكتەر عانا تەكسەرىلەتىن بولعان. قازىر جۇك كولىكتەرىن وتكىزۋ ءتارتىبىن شەشۋ ءۇشىن كەلىسسوز جۇرگىزىپ جاتىرمىز، سوڭعى ناقتىلايتىن سۇراقتار عانا قالدى. كەدەننىڭ جاڭا باسشىسى دا بىرنەشە يدەيا ايتتى. جاقىن ارادا بارلىق ماسەلەنى شەشەمىز دەپ ويلايمىز" دەدى اليەۆ.

قازاق-قىرعىز شەكاراسىندا كولىك كەپتەلەسى ءجيى بولىپ تۇرادى. بيىل شىلدە ايىندا قازاقستان مەن قىرعىزستان شەكاراسىنداعى "اق-تىلەك اۆتوجول" وتكىزۋ بەكەتىندە كولىك كەپتەلىسى پايدا بولىپ، كەزەك كۇتكەن كولىكتەر سانى جۇزدەن استى.

الدىڭعى جىلدارى شەكاراداعى باقىلاۋدىڭ كۇشەيۋى قىرعىزستان مەن قازاقستان اراسىندا داۋ تۋعىزعان. ساراپشىلار مۇنى كورشى ەلدەردىڭ ساۋدا سوعىسى دەپ سيپاتتاعان.

قازاقستان مەن قىرعىزستان ەۋرازيا ەكونوميكالىق وداعىنا مۇشە. ۇيىم ەلدەرىندە تاۋارلار ەشقانداي كەدەرگىسىز تاسىمالدانۋى ءتيىس. بىراق وعان مۇشە ەلدەر ۇيىمداعى ارىپتەسىنە شەكتەۋ شارالارىن قولدانۋدى دوعارماي وتىر.

Abai.kz