3 قاراشادا ءماجىلىس "قازاقستان تاۋەلسىزدىگىنىڭ 30 جىلدىعىنا وراي راقىمشىلىق جاساۋ جونىندە" زاڭ جوباسىن ماقۇلدادى. قۇجات ەلدە اسا اۋىر ەمەس جانە ورتاشا دارەجەدەگى قىلمىس بويىنشا سوتتالعانداردى بوساتۋدى، اۋىر جانە اسا اۋىر قىلمىس جاساعانداردىڭ جازاسىن قىسقارتۋدى قاراستىرادى.

قۇجاتتى تانىستىرعان ىشكى ىستەر ءمينيسترى ەرلان تۇرعىمباەۆتىڭ سوزىنە قاراعاندا، راقىمشىلىققا 2236 تۇتقىن مەن پروباتسيا قىزمەتىندەگى 11 310 ادام ىلىنەدى.

"راقىمشىلىق ارداگەرلەرگە، كامەلەتكە تولماعاندارعا، جاسى ۇلكەندەرگە، ءبىرىنشى جانە ەكىنشى توپتاعى مۇگەدەكتەرگە، قوعامعا قاۋىپ توندىرمەيتىن ادامدارعا قولدانىلادى»، - دەدى مينيستر.

ونىڭ ايتۋىنشا، ەلدە 64 تۇزەتۋ مەكەمەسى، 16 تەرگەۋ يزولياتورى بار. وندا 34 مىڭ ادام بار. 30 مىڭ ادامعا سوت ۇكىمى شىققان، قالعانى تەرگەلىپ جاتىر. 93 پايىزى اۋىر جانە اسا اۋىر قىلمىس جاساعانى ءۇشىن قاماۋدا وتىر. 45 پايىزى ونىڭ الدىندا بىرنەشە رەت سوتتالعان. 32 مىڭ ادام پروباتسيالىق باقىلاۋدا.

"بىرىنشىدەن، شامامەن 1 مىڭ ادام بوستاندىققا شىعادى، 3,8 مىڭ ادام پروباتسيا قىزمەتى تىركەۋىنەن الىنادى. ەكىنشىدەن، 1294 سوتتالۋشى مەن پروباتسيادا تۇرعان 7392 ادامنىڭ جازاسى قىسقارتىلادى. ۇشىنشىدەن، سوت وندىرىسىنە دەيىن اشىلعان 5 مىڭ قىلمىستىق ءىس قىسقارتىلادى، 1674 ادام قىلمىستىق جاۋاپكەرشىلىكتەن بوساتىلادى، 1471 ادامعا جازانى قىسقارتۋ نەمەسە بوساتۋ جاعدايى قولدانىلادى" دەدى ەرلان تۇرعىمباەۆ.

Abai.kz