باتىس قازاقستان وبلىسىنداعى اقساي قالاسىندا رودجەر فوكس اتىنداعى كوشە پايدا بولدى. ەلىمىزدىڭ وزگە ايماقتارىنداعى اعايىندار «قازاقتىڭ قالاسىنان ءبىر ۇلكەن كوشەنىڭ اتىن يەمدەنگەن كىم بولدى ەكەن؟» دەپ تاڭ قالۋى مۇمكىن.

باتىس قازاقستان وبلىسىنداعى اقساي قالاسىندا رودجەر فوكس اتىنداعى كوشە پايدا بولدى. ەلىمىزدىڭ وزگە ايماقتارىنداعى اعايىندار «قازاقتىڭ قالاسىنان ءبىر ۇلكەن كوشەنىڭ اتىن يەمدەنگەن كىم بولدى ەكەن؟» دەپ تاڭ قالۋى مۇمكىن.
«ءداۋ دە بولسا قازاقتاردىڭ ورتاسىندا ءوسىپ، قازاقىلانىپ كەتكەن شەتەلدىك شىعار. مارقۇمنىڭ ەلىمىزدىڭ ەگەمەندىگىنە قوسقان ۇلەسى مول بولار، ءبىر اللا جانىن جانناتتا قىلسىن» دەپ بەت سيپاساتىندار دا تابىلار. الايدا دۇعا جاساۋعا اسىقپاڭىزدار. رودجەر فوكس ءدىن امان. «قاراشىعاناق پەترولەۋم وپەرەيتينگ» كومپانياسىنىڭ باس ديرەكتورى بولىپ شالقىپ ءجۇرىپ جاتىر. ۇكىمەتتىڭ «قازاقستان رەسپۋبليكاسى مەملەكەتتىك ونوماستيكالىق جۇمىس تۇجىرىمداماسىنىڭ» 3,2 تارماقشاسىندا «ەلدى مەكەندەر مەن كوشەلەرگە قانداي ەڭبەك سىڭىرگەنىنە قاراماستان، ءتىرى كىسىنىڭ اتى بەرىلمەيدى» دەپ جازىلعان ەكەن. جانە ءبىر بىلەتىنىمىز، ەلىمىزدىڭ دامۋىنا ايرىقشا ۇلەس قوسقان تۇلعالار ەسىمى قايتىس بولعان سوڭ كەمى بەس جىل وتكەننەن كەيىن عانا وسىنداي قۇرمەتكە ۇسىنىلادى. بىلايشا ايتقاندا، ەلدى مەكەن، كوشە اتتارى پالەنشە مەن تۇگەنشەنىڭ باستاماسى نەمەسە ۇسىنىسىمەن بەرىلە سالمايدى. كوشە اتىنا لايىق تۇلعا كوپشىلىكتىڭ پىكىرىمەن، جوعارىداعى ايتىلعانداي، زاڭ نەگىزدەرىندە تاڭداپ الىنادى. بۇدان مۇنداي مارتەبەنى يەلەنۋ قانشالىقتى قيىن ەكەنىن وسىدان-اق شامالاپ وتىرعان بولارسىزدار. ال ءبىز بىلەتىن  رودجەر فوكس – قازاقتىڭ قارا التىنىن سۇلىكتەي سورىپ، التى قۇرلىقتىڭ ار جاعىنداعى ەلىنە تاسىپ بىتىرە الماي جاتقان ادام. ونىڭ قازاقستانعا ەڭبەگى سىڭبەك تۇگىلى، «قازاق» دەگەن ۇلتتى كورگەنى كەشە ەمەس پە؟ سوندا ول مۇنداي قۇرمەتتى كوزىنىڭ تىرىسىندە (ەلىم دەپ ەمىرەنىپ وتكەن، سولاي بولا تۇرا، ەسىمدەرى ەسكەرۋسىز قالعان اتا-بابالارىمىزدىڭ ارۋاعىن اتتاپ ءوتىپ) قالپاعىمەن قالاي وپ-وڭاي ۇرىپ الدى؟ سويتسەك، ايدى اسپانعا شىعارىپ جۇرگەن باسقا ەمەس، ءبورلى اۋدانىنىڭ بىلدەي اكىمى بولات شاكىموۆ ەكەن!
اڭگىمەنىڭ قىزىعى الدا. جالعىز شاكىموۆ شەشىم شىعارىپ، كوشەنىڭ اتىن وزگەرتە سالسا، قاريالار جاعى «جازعان بالانى نەنىڭ شالىعى ۇردى ەكەن؟» دەپ جاعالارىن ۇستار ەدى. بولات شاكىموۆتىڭ بۇل ۇسىنىسى ءبورلى اۋداندىق ءماسليحاتىنىڭ كەزەكتەن تىس سەسسياسىندا ايتىلىپ، ونى بارلىق حالىق قالاۋلىلارى ءبىر اۋىزدان قولداسا، وعان نە دەر­سىز؟! ءتىپتى سول كۇنى سەسسياعا الدەقالاي سەبەپپەن قاتىسا الماي قالعان دەپۋتاتتار دا بۇل جاڭالىقتى الاقايلاي قوستاپ، اۋدان ورتالىعىنا جەتكەنشە شىداماي، اۋدان اكىمىنە ۇيالى تەلەفوندارىمەن SMS-حابارلاما جىبەرىپ، قولدايتىندىقتارىن جەتكىزگەنىن ەستىگەندە، ەرىكسىز ەرنىمىزدى تىستەۋگە ءماجبۇر بولدىق. «اپىر-اي، ايى كۇنى امانىندا ءبىر ەمەس، ءبىر قاۋىم دەپۋتاتقا نە بولدىدان» باسقا اۋزىمىزعا ءسوز تۇسپەي، بۇل جاڭالىققا ەكى كۇن تاڭىرقادىق.
بولات شاكىموۆتىڭ قازاق بىتكەننىڭ شىرىلداپ جاتقانىندا شارۋاسى جوق، ەسەبى تۇگەل كورىنەدى. «قاراشىعاناق پەترولەۋم وپەرەيتينگ» كومپانياسى ءبىزدىڭ قالامىزدىڭ كوركەيۋىنە؟ كوپ ۇلەس قوستى. بۇرىنعى زاۆودسكايا، كەيىن جايىق اتالعان كوشەنى (سودان كەيىن ر.فوكستىڭ اتىن يەلەندى) كۇردەلى جوندەۋدى موينىنا الادى» دەپ وتىر. «اۋ، قالانىڭ كوركەيۋىنە كوپ ەڭبەك سىڭىرسە، اقسايدىڭ كوشەلەرى ءالى جوندەلمەي، اسفالتى ويدىم-ويدىم بولىپ جاتقانى نەلىكتەن؟ شەتەلدىك كومپانيا قاي كوشەنى كوركەيتىپ ەدى، كورسەتىڭىزشى؟!» دەپ ءبىر دەپۋتات سول سەسسيادا قارسى ساۋال قويسا، حالىق وعان ەرتەسىندە-اق (كوزىنىڭ تىرىسىندە) ەسكەرتكىش قويار ەدى. بىراق ونداي باتىر ۇل قايدا بىزگە؟!
سولاي، ەكى-اق شاقىرىمدى قامتيتىن كوشەگە كۇردەلى جوندەۋ وتكىزەدى دەپ، شەتەلدىك كومپانيا باسشىسىنىڭ اتىن بەرە سالدىق. ال ءبىر كوشە ەمەس، ءبۇتىن ەلىمىزدىڭ بولاشاعى ءۇشىن تەرىن توككەن، جانىن قيعان ەرلەرىمىزدىڭ ەسىمى ءالى كۇنگە دەيىن ەسكەرۋسىز قالىپ كەلەدى.

باتىس قازاقستان وبلىسى،
«جاس قازاق» گازەتى، №27, 10.08.2009