اقش ديپلوماتيالىق كانالدار ارقىلى گەرمانياعا جەتكىلىكتى قىسىم جاساپ جاتقانى بەلگىلى بولدى. ماسەلە مىنادا - گەرمانيا "سولتۇستىك اعىم-2" گاز قۇبىرىن سەرتيفيكاتتاعىسى كەلەدى. ال اقش بۇعان قارسى. ءتىپتى سەناتورلاردىڭ ءبىرى سەرتيفيكاتتاۋ ورگاندارىنىڭ بىرىنە سانكتسيا سالۋدى ۇسىندى.

اقش تەك قانا گەرمانيا ەمەس، سونداي-اق بريۋسسەلگە، لوندونعا دا ءپۋتيننىڭ شانتاجىنا بەرىلمەي، بىرلەسىپ قارسى تۇرۋعا شاقىرىپ كەلەدى. دەگەنمەن دە اقش ءالى سوڭعى ارگۋمەنتتەرىن تولىق شىعارماعان سىڭايلى، وعان مىنا سوزدەر دالەل: "ەگەر ۋكراينانىڭ باسىنان ءبىر تال شاش تۇسەتىن بولسا، ياعني باسىپ كىرەتىن بولساڭىزدار، وندا سەرتيفيكات تۇگىلى سا-2 گاز قۇبىرىن ۇمىتۋلارىڭىزعا تۋرا كەلەدى" - دەپتى.

اقش-تىڭ بۇل ديپلوماتيالىق جۇمىستارى ءوز ناتيجەسىن بەرىپ كەلە جاتقان سياقتى. ءپۋتيننىڭ ءوزى ارالاسىپ ەۋروپانى گازدان قىسسا دا ءبارىبىر ولار ماسكەۋدىڭ شانتاجىنا بەرىلە قويمادى. ال سەرتيفيكاتتىڭ اۋىلى الىستاي تۇسەتىن رەتى بار. تاعى ءبىر قىزىعى - مەركەلدىڭ كوزاپارا ۋكراينا مۇددەسىن ساتىپ كەتكەندىگى بولدى. ۋاشيڭتونعا بارعاندا سا-2 جونىندە جازباشا قولحات بەرە تۇرا ونى ىسكە قوسۋعا ىنتالى بولۋى ونىڭ ساياساتكەرلىگىنە ءبىرشاما ۇلكەن قارا داق تۇسىرەدى. گەرمانيا ءۇشىن ءتيىمدى بولعانمەن دە مونسترعا قارسى باتىستىق كواليتسيا بىرتۇتاستىعىنا سالقىنىن تيگىزىپ وتىر.

تاعى دا بىرەۋلەر مۇنىڭ ءبارى بىزگە نە كەرەك، قازاقستاندى ايتايىق دەپ شىعادى، وندايعا ۇيرەنگەنمىن. وقىماي-اق قوي، ءوتىپ كەتە بەر دەپ تە تالاي ايتقانمىن، سوندا دا تابىلادى. ولارعا تاعى دا ايتارىم - كرەمل نەعۇرلىم السىرەسە، ءتىپتى ەڭ دۇرىسى ىدىراسا، ول ءبىز ءۇشىن سوعۇرلىم ءتيىمدى بولماق. ءبىزدىڭ تاۋەلسىزدىگىمىزگە ەڭ قاۋىپتى جاۋ سولار عانا. ەكىنشى قاۋىپتى جاۋ تۋرالى دا اقش جۇمىستانىپ جاتىر، ول جونىندە كەيىنىرەك ايتارمىز. تەك بايدەن ساۋ بولسىن، ونىڭ كومانداسى ساۋ بولسىن. بىراق... بىرەۋگە سەنىپ وتىرا بەرمەي ءوزىمىز دە ارەكەت ەتۋىمىز كەرەك قوي. ەشتەڭەدەن قورىقپاي ودكب كەلىسىمىنەن شىعىپ كەتكەن وزبەكتەردەن ۇلگى الۋعا نەگە بولمايدى؟

قۋانىش ەدىلحانتەگى

Abai.kz