مەملەكەتتىڭ ميلليونداپ قارجى قۇيعان كينولارىن ەشكىم كورمەيدى. ەشكىمگە قىزىق ەمەس. جاساندى يدەيا، جاساندى قازاقىلىق، جاساندى سالت-ءداستۇر، جاساندى ءسوز، جاساندى تۇسىنىك... ءبارى دە ءبىر شەڭبەردىڭ ءىشىن شيىرشىقتاپ، ۇزاپ شابا الماي شابانداپ بولعان.

ەندى ءبىر جىگىتتەر جارق ەتىپ شىعا قويىپ ەدى، بىرەۋلەر ولاردى قوعامنان الاستاۋ تۋرالى دابىل كوتەرىپتى. "بانديتتەردى، مانياكتاردى ناسيحاتتادى دەي مە، ءبىر ەۆرەي قارجىلاندىرادى دەي مە", ايتەۋىر ۇلتتىڭ جوعىن جوقتاپ جاتقاندارىنا قاراپ كۇلكىم كەلدى...

ءار ادامدا تاڭداۋ دەگەن دۇنيە بولماۋشى ما ەدى؟ بىرەۋدىڭ جانىنا كومەديا جاقىن، ەندى ءبىرى مەلودرامماعا ىشقىرى بوس. قازاقتا جوق بولسا، ورىستان، ودان تاپپاسا باتىستان كورەدى. مىسالى، ءوز باسىم دەرەكتى فيلمدەردى مۇجۋدەن ءلاززات الامىن. ۇيدەگىلەر "انداعى ءىشىڭدى پىستىرماي ما؟" دەپ تاڭ قالادى.

دەرەكتى فيلمدەرمەن قوسا پسيحولوگيالىق كينولاردى دا جانىمدى سالىپ كورەمىن. الگى سىنالىپ جاتقان جىگىتتەر باياعىدا وقىپ، جۇرەگىم اۋىرعان، سانامدى سانسىراتىپ تاستاعان، قازاقتىڭ ءوز ىشىندە شىنايى بولعان وقيعالاردى كينو تىلىندە سويلەتىپتى. ناقتى دەرەگى بار، كەيىپكەرلەرىنىڭ كەيبىرى ءالى ءتىرى... ويدان شىعارىپ، ۇلتتىڭ بەتىنە قارا كۇيە جاعىپ جاتسا، ءسوز باسقا...
ايۋاندىق دەگەن ۇلت تاڭدامايدى. پسيحولوگيالىق دەرتتىڭ داۋاسى سىزداعان سىزداۋىقتىڭ بەتىن اشۋ. قالاعان ادام كورەدى. قالاماعان ادام كورمەيدى. جانر رەتىندەگى ىزدەنىستى باستالماي جاتىپ تۇنشىقتىرساق، قازاق كوركەيىپ كەتە مە؟

بۇ كينو ۇناماي ما، وسىنى قازاققا قاراتپايتىنداي كينو ءتۇسىر. بولماسا...
كوشەدەن بەلياشي جەمەيتىن بولدىق، ەندى... مۇنىڭ ءوزى ۇلت ءۇشىن پايدا ەمەس پە؟

مانياكتى كورىپ، مانياك بولۋعا تالپىنادى دەگەن كۇلكىلى دۇنيە. تەلەارنادان كۇنى-ءتۇنى كورگەنىمىز - نۇر-وتان، نازارباەۆ. نۇر-وتانشىل، نازارباەۆشىل بولىپ كەتكەنىمىز قايسى؟ بۇل كينوداعى وقيعالار قازىرگى مانياكستان جۇيەنىڭ ىستەگەندەرىنىڭ قاسىندا تۇككە تۇرماي قالماي ما؟

مەن كينونى تۇسىرگەندەردى تۇستەپ تە تانىمايمىن. الگى سايات ساماتوۆيچ دەگەن اكىم تۋرالى "ساكە" كينوسى ءۇشىن جىگىتتەرگە دەگەن قۇرمەتىم شەكسىز.
5÷32-ءنىڭ (ەسلي، چتو قۇران اياتى) ءۇش سەرياسىن دا كوردىم. تۇسىمنەن شوشىپ وياندىم، قورىقتىم، ءويتتىم-ءبۇيتتىم دەي المايمىن. كادىمگى قاتارداعى شىنايى كينو. سولاي ەمەس پە؟

قانات ابىلقايىر

Abai.kz