حالىقارالىق وليمپيادا كوميتەتىنىڭ پرەزيدەنتى جاك روگگە   لوندوندا وتكەن ححح جازعى وليمپيادا ويىندارىنىڭ اياقتالعانىن رەسمي تۇردە جاريالادى.  «وليمپيادا ويىندارى جاس ۇرپاقتىڭ سپورتقا دەگەن ىنتاسىن ارتتىرىپ، جىگەرىن جانۋدا. مەن بۇگىن ححح جازعى وليمپيادانىڭ اياقتالعانىن جاريا ەتە وتىرىپ، دۇنيە ءجۇزىنىڭ جاستارىن  ەندى ءتورت جىلدان سوڭ ريو-دە-جانەيرودا كەزدەسۋگە شاقىرامىن»، - دەدى روگگە مىرزا.

سونىمەن ەل اۋزىندا «تۇماندى البيون» اتالىپ كەتكەن اعىلشىن جۇرتىنىڭ استاناسى -  لوندوندا 27 شىلدە مەن 12 تامىز ارالاعىندا وتكەن وليمپيادا ويىندارىنا قىسقاشا شولۋ جاساپ شىعايىق.

حالىقارالىق وليمپيادا كوميتەتىنىڭ پرەزيدەنتى جاك روگگە   لوندوندا وتكەن ححح جازعى وليمپيادا ويىندارىنىڭ اياقتالعانىن رەسمي تۇردە جاريالادى.  «وليمپيادا ويىندارى جاس ۇرپاقتىڭ سپورتقا دەگەن ىنتاسىن ارتتىرىپ، جىگەرىن جانۋدا. مەن بۇگىن ححح جازعى وليمپيادانىڭ اياقتالعانىن جاريا ەتە وتىرىپ، دۇنيە ءجۇزىنىڭ جاستارىن  ەندى ءتورت جىلدان سوڭ ريو-دە-جانەيرودا كەزدەسۋگە شاقىرامىن»، - دەدى روگگە مىرزا.

سونىمەن ەل اۋزىندا «تۇماندى البيون» اتالىپ كەتكەن اعىلشىن جۇرتىنىڭ استاناسى -  لوندوندا 27 شىلدە مەن 12 تامىز ارالاعىندا وتكەن وليمپيادا ويىندارىنا قىسقاشا شولۋ جاساپ شىعايىق.

لوندون وليمپياداسىنىڭ ءدۇبىرلى باسكەسىن قازاق ەلىنىڭ اتىنان بارعان سپورتشىلار العاشقى كۇننەن-اق التىن الۋمەن باستادى. ۆەلوسپورتتان 250 شاقىرىمدىق قاشىقتىقتاعى جارىس جولىنا شىققان  الەكساندر ۆينوكۋروۆ توپ جارىپ، ساڭلاق اتالعان كۇننىڭ ەرتەڭىندە   اۋىر اتلەت ءزۇلفيا چينشانلو الەم جانە وليمپيادا رەكوردىن جاڭارتىپ، ءانۇرانىمىزدى اۋەلەتتى. ال، جارىستىڭ ءتورتىنشى كۇنىندە قازاقستان قورجىنىنداعى 2 التىن   تاعى ءبىر اۋىر اتلەتىمىز  مايا مانەزانىڭ جەڭىسىمەن ۇشەۋگە جەتىپ، جانكۇيەر قاۋىمدى جەلپىنىتىپ تاستادى.   ماسكەۋلىك زىلتەمىرشى قىزدىڭ قامقورشىلارى جولىن كەسە بەرگەن سوڭ «قازاقستان قايداسىڭ؟» دەپ تارتىپ كەتكەن  سۆەتلانا پودوبەدوۆا وتانداستىرىنا ءوزىنىڭ قايسارلىعىن لوندون وليمپياداسىندا ايگىلەپ، قازاقستاننىڭ بايراعىن رەسەيدىڭ تۋىنان جوعارى كوتەردى. التىن القانىڭ يەسى تابان تىرەيتىن تۇعىرعا شىققان سۆەتلانا كوز جاسىن تيا الماي قازاق ءانۇرانىن شىرقادى. ءانۇرانىمىزدىڭ قايىرماسىنداعى «گۇلىڭ بولىپ ەگىلەمىن» دەگەن جولداردى ەگىلىپ تۇرىپ ايتتى.

لوندون وليمپياداسىنىڭ فەنومەنى التىن ايدارلى ۇلىمىز - ءىليا يلين بولدى. 94 كەلىگە دەيىنگى سالماق ساناتىندا جالپى سانى 418 كەلىنى باعىندىرعان ول  الەمدىك جانە وليمپيادالىق رەكورد ورناتتى. رەسەيدىڭ، مولدوۆانىڭ، يراننىڭ ازۋىن ايعا بىلەگەن الىپتارى سىر بويىندا تۋىپ وسكەن ءىليانىڭ سيراعىنان دا كەلمەي قالدى. زىلتەمىرشىلەر سايىسىندا جۇلقا كوتەرۋدەن 175 كەلەنى، سەرپە كوتەرۋدەن 220 كەلەنى بۇيىم كورمەگەن الماس وتەشوۆتىڭ دە شوقتىعى بيىك كورىندى. قىسقاسى، وليمپيادا ويىندارىنىڭ قىزعان شاعىندا  ءىليانىڭ جەڭىسىمەن  قازاقستان قورجىنىندا 5-ءشى التىن مەدال جاتتى.

شىعىستان شىققان (شقو) ارعىماق قىز ولگا رىپاكوۆا ۇشتەپ سەكىرۋدەن 14,98 مەترگە سەكىرىپ، ەلىمىزدىڭ قورجىنىنا تۇسكەن التىنشى التىن مەدالدىڭ يەگەرى اتاندى.

وليمپيادا ويىندارىنىڭ جۇلدەسىن التىنمەن باستاعان قازاق سپورتشىلارىنىڭ اپتىعى ءسال سايابىرلاپ قورجىنىمىزعا قولا مەدالدار قۇيىلدى. 84 كەلىگە دەيىنگى سالماقتا بەلدەسكەن پالۋانىمىز دانيال گادجيەۆ وليمپيادا ويىندارىنىڭ 10-شى كۇنى قولا جۇلدەگە قول جەتكىزدى. ال، 8 تامىز كۇنى بوكسشى قىزىمىز مارينا ۆولنوۆا لوندون وليمپياداسىنداعى ەكىنشى قولانىڭ قوجايىنى بولدى. سونداي-اق، بالۋان قىزىمىز گۇزەل مانيۋروۆا دا قولادان القا تاعىنىپ جەڭىس تۇعىرىنان كورىنە ءبىلدى.  91 كەلىدەن جوعارى سالماق دارەجەسىندەگى بوكسشىسىمىز يۆان دىچكو  ۇلىبريتانيا سپورتشىسى ەنتوني دجوشۋاعا 13:11 ەسەبىمەن ەسە جىبەرىپ، 4-ءشى قولا مەدالدى «مىسە تۇتتى». ال، لوندون وليمپياداسىنىڭ سوڭعى كۇنى بوز كىلەمگە كوتەرىلگەن ەركىن كۇرەس شەبەرى اقجۇرەك تاڭاتاروۆ قولا مەدال ءۇشىن بەلدەسۋدە تۇرىك پالۋانى رامازان ساحينمەن كۇرەسىپ، تىزە بۇكتىردى.

سونداي-اق، 81 كەلىگە دەيىنگى سالماقتا قارسىلاستارىن شاق كەلتىرمەگەن  ادىلبەك نيازىمبەتوۆ فينالدا رەسەيلىك سپورتشى ەگور مەحونتسەۆپەن قولعاپ ءتۇيىستىرىپ،  تەڭ ءتۇستى.  بىراق ، تورەشىلەر التىندى رەسەيلىك بوكسشىنىڭ قانجاعاسىنا بايلاپ بەردى. ءسويتىپ، ءبىزدىڭ ادىلبەك لوندون وليمپياداسىنىڭ كۇمىس جۇلدەگەرى اتانىپ، ەل قورجىنىنداعى ءبىرىنشى كۇمىس مەدالدى ەنشىلەدى.

69 كەلىگە دەيىنگى سالماق ساناتىندا ۇلىبريتانيالىق بوكسشى فرەددي ەۆانسپەن جۇدىرىقتاسقان قازاقستاندىق سايىپقىران  سەرىك ساپيەۆ  7-ءشى التىن مەدالمەن وليمپيادا ويىندارىنىڭ سوڭعى كۇنىن ءوز بيىگىندە قورىتىندىلادى.

لوندون وليمپياداسىنا 205 ەلدەن سپورتشى قاتىسىپ، 302 باسەكەنى ساراپقا سالدى. سونىڭ ىشىندە قورجىنىنا 7 التىن، 1 كۇمىس، 5 قولا مەدال جيعان قازاقستان ۇلتتىق قۇراماسى 12-ءشى ورىندى يەلەندى.

«اباي-اقپارات»