اۋعان سوعىسى ارداگەرلەرىنىڭ جەڭىلدىكتەرى مەن ازعانتاي زەينەتاقىسىن الىپ تاستادى. «قازاقستان مەملەكەتىنە سىڭگەن ەڭبەگى جوق» دەگەن سەبەپ العا تارتىلعان. كەڭەس بيلىگى بىزدەن «باراسىڭ با؟» دەپ سۇرامادى. «بارعىم كەلمەيدى» دەپ ءبىز دە قالىپ قويا المادىق. سوۆەت كەزىندە ولاي ەتۋ مۇمكىن ەمەس بولاتىن. اسكەرگە بارۋ ەر-ازاماتقا پارىز بولاتىن. «ەر-ازامات» اتىمىزعا كىر كەلتىرگىمىز كەلمەدى. ۇكىمەت بۇيىردى. ءبىز بۇيرىقتى ورىندادىق. قانشاما دوستار سول بۇيرىقتى ورىنداپ قىرشىن كەتتى. ەندى بۇگىن..

حوش دەلىك. ءبىزدىڭ سوققانىمىز كەلمەسكە كەتكەن كەڭەس ۇكىمەتىنىڭ سويىلى ەكەن. ازعانتاي زەينەتاقى حالىقتان تۇسكەن سالىققا سالماق تۇسىرە قوياتىنداي ەمەس-ءتى. جىل وتكەن سايىن قاتارىمىز ازايماسا كوبەيىپ جاتقان جوق. ءبىز عانا ەمەس قازىرگى زەينەتكەرلەردىڭ ءبارى كەڭەس وداعىنىڭ ارداگەرلەرى. قازاقستان مەملەكەتىنە وسى كوزقاراسپەن قاراساق، ولاردىڭ دا زەينەتاقىسىن قىسقارتسىن. كەڭەس ۇكىمەتىنىڭ يدەولوگيا قىزمەتكەرلەرى مەن كومپارتيا مۇشەلەرىن سوتتايىق. تۋراسىنا كوشسەك «دەكولونيزاتسيا»، «دەكوممۋنيزاتسيا» ناۋقانىن جۇرگىزەيىك. ولاي ەتپەگەن جاعدايدا اۋعان سوعىسى ارداگەرلەرىنە جەڭىلدىكتەرىن قايتارسىن!

اۋعان ارداگەرلەرىنە ايتارىم...

قۇرمەتتى ارىپتەستەر. «قۇقىعىمىز تاپتالىپ، جەڭىلدىگىمىز شەكتەلدى» دەپ دۇرلىگىپ جاتىرمىز. ءبىرىمىز ادىلەت جولىندا مايدانعا شىعۋعا ۇگىتتەۋگە كوشتىك. كوشەگە ەرەۋىلگە شىقپاقپىز. كەڭەس وداعىنىڭ مۇددەسىن قورعاپ جان بەرگەنىمىز راس. ول سسسر ىدىراپ كەتكەن. ەندى جوق. ءدال قازىرگى تاۋەلسىز مەملەكەتىمىزگە قاي ەڭبەگىمىزدى بۇلدايمىز؟ «ەرمىز، باتىرمىز» دەيمىز. باتىرلىقتى ەرلەر جاساپ، باعاسىن حالىق بەرۋگە ءتيىس- ءتى. قازاقتا «ءبىتىسى جامان قامىستى سۋ ىشىندە ءورت شالار. ءجۇرىسى جامان جىگىتتى تۇيە ۇستىنەن يت قابار» دەگەن ماقال بار. «باتىرمىز» دەگەن ءبىز ءوز قۇقىعىمىزدى قورعاي الماي ءجۇرىپ كىمگە ونەگە بولماقپىز؟ كوشەگە شىقساق سول «ەر» اتىمىزعا كىر كەلتىرمەيىك. جەكە باسىمىزدىڭ قۇقىعىن ەمەس، حالىقتىڭ قۇقىعىن، ۇلت مۇددەسىن قورعايىق. حالىق ەسەبىنەن بايىعان پاراقورمەن كۇرەسەيىك. سوندا عانا «باتىر» دەپ اتاۋعا بولادى. تىم بولماسا «ەر-ازامات» اتىنا كىر كەلتىرمەيىك.

ورالحان تىمباەۆ،

اۋعان سوعىسى ارداگەرى

Abai.kz