بۇگىندە جان-جاقتى ءبىلىم الىپ تولىسىپ ىسىلعان، ەلدى يماندىلىققا ۋاعىزداۋشى يمام-مولدالاردىڭ سانى كوبەيگەنىنە شۇكىرشىلىك. الايدا سونىمەن قاتار كىرمە يدەولوگيانى، راديكالدى ۇستانىمدى دارىپتەۋشى توپتارعا كەلگەندە اتتەگەنايلار مەن تاۋەكەلدەر ءالى جەتكىلىكتى. اسىرەسە داعدارىستان كۇيزەلگەن، رۋحانياتى السىرەگەن ورتانى ءوز دەگەنىنە قاراتىپ قاتەرلى جولعا ايداپ سالۋ جاعى ءالى ايتارلىقتاي قيىندىق تۋدىراتىنىن ەسكەرسە. راس، الدىڭعى رەتتە بۇل مەملەكەتتىك ورىنداردىڭ جاۋاپكەرشىلىگى بولىپ تابىلادى. وتباسىنداعى تاربيە مەن زيالى قاۋىمنىڭ ۇلاعىتى دا وزىندىك ماڭىزعا يە. دەسە دە رۋحاني قۇندىلىقتارىمىزدى جوققا شىعارۋشى تەرىس اعىمدارعا تويتارىس بەرۋدە ءداستۇرلى ءدىن وكىلدەرى دە بەلسەندىلىك تانىتقان ءجون. بۇل باعىتتا ەش نارسە جاسالىپ جاتقان جوق دەگەننەن اۋلاقپىن. بىراق باسپاسوزدە، الەۋمەتتىك جەلىلەردە، ءوز باسىم قاتىسقان شارالاردا ىقتيمال قاۋىپتەردەن ساقتاندىرۋ، اداسقانداردى دۇرىس جولعا قايتارۋ، حانافي مازحابىنىڭ تاعلىمىن جەتكىزۋ تۇرعىسىندا ءمۇفتيات وكىلدەرىنىڭ تۇششىمدى ناسيحاتىن جيە كورەمىن دەپ قايتا ايتا المايمىن. شالعاي جاتقان ەلدى مەكەندەردە اتالعان ءجايت كەي كەزدەرى ءتىپتى الاڭداتادى. ءداستۇرلى مولدالار بارا بەرمەيتىن كولونيالاردىڭ بىرقاتارى سالافيزم مەن ءۋاححابيزمنىڭ تارالۋ وشاقتارىنا اينالىپ جاتقانى تاعى بار. ايتپاعىم – قازىر كادىمگى يدەلوگيالىق مايدان ءجۇرىپ جاتقاندا رۋحاني ازىققا ءزارۋ قوعام كەلىمسەكتەردىڭ جەتەگىندە كەتىپ قالماۋى ءۇشىن ءدىن سالاسىنىڭ ماماندارى كەڭ اۋقىمدا، ءباسپاسوزدى، تەلەديداردى، زاماناۋي باسقا دا تەتىكتەردى ۇتىمدى پايدالانا وتىرىپ ۇلەس قوسسا. بۇنىمەن ءتيىستى سالادا ەڭبەك ەتىپ ەل قامىن ويلاعان وتاندىق مامانداردىڭ تاپشىلىعىن ءيا ولاردىڭ قاۋقارسىزدىعىن مەڭزەپ وتىرعان جوقپىن. ماسەلە مەملەكەت دەڭگەيىندە ءبىلىمى دە ايتارى بار وسىنداي ازاماتتارعا ءتيىستى مۇمكىندىكتەر بەرىلىپ قۇزىرەتىن كەڭەيتۋگە كەلىپ تىرەلەدى.

راسۋل جۇمالى

Abai.kz