بۇگىن ەلوردادا قازاقستان تاۋەلسىزدىگىنىڭ 30 جىلدىعىنا ارنالعان حالىقارالىق كونفەرەنتسيا ءوتتى. وندا ءماجىلىس توراعاسى نۇرلان نىعماتۋلين ءسوز سويلەدى. پالاتا سپيكەرى ەلباسىمىز نۇرسۇلتان ءابىشۇلى نازارباەۆتىڭ 30 جىل ىشىندە ەكونوميكاسى مىقتى، قوعامى تۇراقتى، حالقى تاتۋ، مارتەبەسى بيىك، تاۋەلسىز قازاقستاننىڭ ىرگەتاسىن قالاعانىن، بۇگىندە ونى ودان ءارى نىعايتۋ ءۇشىن مەملەكەت باسشىسى قاسىم-جومارت كەمەلۇلى توقاەۆ تابىستى جۇزەگە اسىرىپ جاتقانىن اتاپ ءوتتى.

ءوز سوزىندە نۇرلان نىعماتۋلين تاۋەلسىزدىك – كوپ ەلدەر ءۇشىن اسقاق ارمان ەكەنىن، ءبىزدىڭ بابالارىمىز عاسىرلار بويى اڭساعان وسى اسقاق ارماننىڭ ورىندالعانىنا بيىل 30 جىل تولىپ وتىرعانىن، بۇل ءبىز ءۇشىن قايتالانباس تاريح ەكەنىن ايتتى.

ءماجىلىس توراعاسى اتاپ وتكەندەي، تاۋەلسىزدىكتىڭ  العاشقى جىلدارى وڭاي بولعان جوق. جەتپىس جىل بويى بيلىك جۇرگىزگەن كەڭەس وداعى تاراعاننان كەيىن، ءبىزدىڭ حالقىمىزدىڭ جاعدايى وتە اۋىر بولدى. سول كەزدە بارلىق ءوندىرىس جانە زاۋىت-فابريكالار توقتاپ، كولحوز-سوۆحوزدار تاراپ، مەكتەپتەر، مادەني ورتالىقتار جابىلدى. مىڭداعان ازاماتتار جۇمىسسىز قالدى. بىرنەشە اي بويى ەڭبەكاقى، ستيپەنديا باسقا دا تولەمدەر بەرىلمەي، ەكونوميكالىق داعدارىس ورىن الدى. وسىنداي اۋىر كەزەڭدە تاۋەكەل ەتىپ، ەل تاعدىرىن قولىنا العان ەلباسىمىز كەمەڭگەر باسشىلىعىمەن تۋعان ەلدىڭ سەنىمىن ەرلىكپەن، ابىرويمەن اقتادى.

- قازاقستاننىڭ 30 جىلدىق دامۋ جولىندا حالقىمىزدىڭ رۋحى كوتەرىلدى. ەلىمىزدىڭ ەڭسەسى بيىكتەدى. دالامىز دا، قالامىز دا، ءومىر ساپاسى دا زامان تالابىنا ساي جاڭعىرىپ، جاڭا ومىرگە قادام باستىق. جاڭا مەملەكەت، جاڭا ەكونوميكا، جاڭا قوعام قۇردىق. تاريحپەن العاندا از عانا ۋاقىت 30 جىل ىشىندە دامىعان ەلدەردىڭ قاتارىنا كىردىك، - دەدى ءماجىلىس توراعاسى.

نۇرلان نىعماتۋليننىڭ ايتۋىنشا، بۇگىندە تاۋەلسىز قازاقستان – ءوزىنىڭ مىڭداعان شاقىرىم شەكاراسىن بەكىتكەن، دۇنيەجۇزىنە تاراعان قانداستارىن ءبىر شاڭىراقتىڭ استىنا جيناعان، كوپ ۇلت وكىلدەرىن ورتاق وتانعا بىرىكتىرگەن، بۇكىل الەمگە قاجەتتى حالىقارالىق ماسەلەلەرگە باستاماشى بولعان تانىمال، بەدەلدى مەملەكەت. وعان دالەل ەۋروپالىق قاۋىپسىزدىك جانە ىنتىماقتاستىق  ۇيىمىنا توراعالىق ەتكەنى، ورتالىق ازيا ەلدەرىنىڭ ىشىندە العاشقى بولىپ بۇۇ قاۋىپسىزدىك كەڭەسىنە تۇراقتى ەمەس مۇشە بولعانى.

سونىمەن بىرگە، پالاتا سپيكەرى بۇگىندە نۇر-سۇلتان قالاسى  تاۋەلسىزدىگىمىزدىڭ ماڭگىلىك ىرگەتاسى، شىعىس پەن باتىستى بايلانىستىراتىن ەۋرازيا وركەنيەتىنىڭ التىن ورداسى ەكەنىن، ەلباسىنىڭ تاعى ءبىر تاريحي شەشىمىنىڭ ارقاسىندا اشىلعان جاڭا تۇركىستان وبلىسى – ەۋروپا مەن ازيانى قوساتىن بۇكىل تۇركى الەمىنىڭ رۋحاني  ورتالىعى دەپ اتانعانىنا نازار اۋداردى.

- ءبىزدىڭ حالقىمىز ايتقانداي، «تاريح وتكەن كۇنگە ەمەس، تاريح بولاشاققا جول سالادى». ءبىزدىڭ 30 جىلدىق تاريحىمىز، شىققان بيىكتەرىمىز، زور تابىستارىمىز – ول الداعى ۇلى ماقساتتارىمىزعا جەتۋ جولىنداعى ابىرويلى بەلەس. ءبىز ەلباسىنىڭ تاۋەلسىزدىك تاعىلىمىن باسشىلىققا الا وتىرىپ، مەملەكەت باسشىسى ايتقانداي، شىنايى پاتريوتتىق سەزىممەن رۋحتانىپ، قاسيەتتى تاۋەلسىزدىگىمىزدى ودان ءارى نىعايتۋ ءۇشىن بىرلەسىپ، جۇدىرىقتاي جۇمىلىپ، جۇمىس ىستەۋىمىز كەرەك. بۇل ەلىم، جەرىم دەيتىن ءاربىر ازاماتتىڭ پارىزى. ءبىز بابالارىمىزدىڭ قاسيەتتى جولىمەن، تاۋەلسىزدىكتىڭ قۇدىرەتتى كۇشىمەن، بولاشاقتىڭ اسقاق رۋحىمەن ءالى تالاي بيىكتەردى باعىندىرىپ، ءالى تالاي اسۋلاردان اساتىن بولامىز، - دەدى نۇرلان نىعماتۋلين.

Abai.kz