قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى «التىن القا» جانە «كۇمىس القا» بەلگىلەرىمەن ماراپاتتالعان كوپ بالالى انالارعا مەملەكەتتىك جاردەماقى تاعايىنداۋ جونىندەگى قىزمەتتەردى پرواكتيۆتى فورماتتا الۋ ءتارتىبىن جەڭىلدەتتى.

مينيسترلىكتە اتاپ وتكەندەي، كوپ بالالى انالاردىڭ ۋاقىتىن ۇنەمدەۋ ماقساتىندا 2019 جىلدان باستاپ اتالعان جاردەماقىنى تاعايىنداۋ بويىنشا مەملەكەتتىك قىزمەتتى پرواكتيۆتى فورماتتا الۋ مۇمكىندىگى قاراستىرىلعان.

"بۇل ايەلدەردىڭ كەزەككە تۇرۋ قاجەتتىلىگىن جويدى، ولار مەملەكەتتىك قىزمەتتەردى كەز كەلگەن ىڭعايلى ۋاقىتتا جانە كەز كەلگەن جەردە الا الادى. ءبىر عانا SMS-حابارلاماعا جاۋاپ بەرۋ ارقىلى كورسەتىلەتىن قىزمەتتى الۋشى جاردەماقىنى پرواكتيۆتى بەرۋگە كەلىسىمىن بەرەدى جانە بانكتىك شوتتى راستايدى. مەملەكەتتىك قىزمەت كورسەتۋ ءۇشىن قاجەتتى وزگە دە اقپارات مەملەكەتتىك ورگانداردىڭ اقپاراتتىق جۇيەلەرىنەن الىنادى" دەيدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ.

ونىڭ ايتۋىنشا، جەڭىلدەتىلگەن ءتارتىپ پرواكتيۆتى فورماتتا مەملەكەتتىك جاردەماقى تاعايىنداۋ بويىنشا قامتۋدى ايتارلىقتاي ارتتىرۋعا مۇمكىندىك بەردى. وسى وزگەرىستەردىڭ ارقاسىندا 2021 جىلى پرواكتيۆتى قىزمەت العان كوپ بالالى انالار سانى ەكى ەسەدەن استام ءوستى.

Abai.kz