ەۋرازيانىڭ جۇرەگىندەگى يەن دالا ساحارادا قازاقستان ءوزىنىڭ تاۋەلسىزدىگىنىڭ 30 جىلدىعىن اتاپ وتۋدە. 19 ميلليوننان اسا حالقى بار، ەكونوميكاسى وركەندەگەن، تۇرعىندارىنىڭ ءومىر ءسۇرۋ ساپاسى ارتقان ەل ءوز باستاۋىن سوناۋ 1991 جىلدان الادى.

«قازاقستاننىڭ گۇلدەنۋى مەن ونىڭ وركەندەۋى جولىندا، تۇرعىندارىنىڭ ءال-اۋقاتىن ارتتىرۋعا بار كۇشىمدى سالامىن دەپ ۋادە بەرەمىن». بۇل قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ 1991 جىلى پرەزيدەنتتىك سايلاۋالدى باعدارلاماسىندا سويلەگەن ءسوزى. ەل تاۋەلسىزدىگىنە قول جەتپەس بۇرىن بەرىلگەن ۋادە راسىمەن ورىندالدى.

30 جىلدا قازاقستان الەمنىڭ دامىعان 50 ەلىنىڭ قاتارىنان كورىندى. ەكونوميكا جاڭا بەلەسكە شىقتى. ءوندىرىس قۋات الىپ، جاڭا جۇمىس ورىندارى اشىلدى. ءبىلىم سالاسى قاناتىن كەڭگە جايدى. ونەر، مادەنيەت، الەۋمەت، سپورت – بارلىق سالا قۇلاشىن كەڭگە جايدى.

نۇر-سۇلتان قالاسى تاۋەلسىزدىكتىڭ بەرگەن باستى سىيى. ەڭسەلى ەلوردانىڭ ءوسۋى مەن قالادا اتقارىلعان مىڭ شارۋا مۇنىڭ ايقىن دالەلى. بۇگىنگى تاڭدا نۇر-سۇلتان قالاسى بەلسەندى، تالانتتى جانە جىگەرلى جاستار ءۇشىن جاڭا مۇمكىندىكتەر مەن تارتىمدى قالا. قازاقستاننىڭ استاناسى – ەلىمىزدىڭ باستى ءبىلىم بەرۋ مەن عىلىمي الاڭى. سونداي-اق ءبىلىم، عىلىم جانە يننوۆاتسيالىق ءوڭىردىڭ ورتالىعى بولۋعا تالپىنادى.

Abai.kz