بۇل جونىندە قىرعىزستان ۇكىمەتىنىڭ باسشىسى اقىلبەك جاپاروۆ مەملەكەتتىك تەلەارناعا بەرگەن سۇقباتىندا ايتقان.

"ەگەر ءبارى دۇرىس بولسا، كەلەسى جىلى قۇرىلىستى باستايمىز. قازىر ءبىز اقشانى كىمنەن الامىز، سونى ىزدەپ جاتىرمىز. ەگەر گەس-كە وزبەكستان مەن قازاقستان قاتىساتىن بولسا، ولاردىڭ ۇلەسى قانداي بولماق، وسىنى دا تالقىلايمىز. وتكەن جاز قولدا بار رەسۋرستاردى بىرىگىپ پايدالانۋ كەرەك ەكەنىن كورسەتتى. ءبىز نارىز وزەنىنىڭ تەك 1,5 % پايدالانامىز، قالعانىن كورشىلەر قولدانادى. كورشىلەر دە بىرگە جۇمىس ىستەۋگە نيەت ءبىلدىرىپ وتىر", - دەدى قىرعىزستاننىڭ ۇكىمەت باسشىسى.

بيىل ناۋرىز ايىندا قىرعىزستان وزبەكستانمەن بىرلەسىپ "قامبار اتا - 1" گەس قۇرىلىس جوباسىن سالاتىن بولدىق دەپ مالىمدەگەن.

اتالعان گەس قۇرىلىسىن و باستا 2012 جىلى رەسەي سالۋى كەرەك بولعان. بىراق قۇرىلىس تىم ۇزاققا سوزىلىپ كەتكەسىن، 2016 جىلى قىرعىزستان تارابى بىرجاقتى كەلىسىمدى بۇزدى.

كەيىن 2020 جىلى قىرعىز ۇكىمەتى قىتايمەن كەلىسىمگە كەلگەنىن مالىمدەگەن. بىراق ودان كەيىن بيلىك وزگەرگەن سوڭ، بۇل تاقىرىپ قايتا كوتەرىلمەدى.

ەگەر "قامبار اتا - 1" گيدروەلەكتر ستانتسياسى سالىناتىن بولسا، بۇل قىرعىزستانداعى ەڭ ءىرى گەس بولادى. قۋاتى –1860 مۆت، جىل سايىن 5 ملرد كۆت/س ەلەكتر ەنەرگياسىن وندىرەتىن بولادى.

Abai.kz