قىزىلوردا وڭىرىندە مال قىرىلىپ جاتىر
قىزىلوردا وڭىرىندەگى ءىرى-قارانىڭ جاپپاي قىرىلۋ سەبەبى ءالى بەلگىسىز. دەگەنمەن ماماندار بۇل جۇقپالى اۋرۋ ەمەس دەپ بولجايدى.
قالا ىرگەسىندەگى تالدىارال اۋىلىنىڭ تۇرعىندارى دابىل قاعۋدا. ءتورت تۇلىكتىڭ ارام قاتۋىنا مالعا ەكپەنىڭ كەش سالىنۋى جانە دارىگەردىڭ جاۋاپسىزدىعى سەبەپ بولۋى مۇمكىن دەگەن بولجامدار بار.
جەرگىلىكتى تۇرعىنداردىڭ ايتۋىنشا، مال ۆەتەرينارلارى ەكپەنى ۋاقىتىلى سالمايتىن كورىنەدى. اۋىرعان تۇلىككە ەم-شارا جاسامايدى. سونىڭ سالدارىنان جۇرت "قالعان مالىمىزدان دا ايرىلىپ قالامىز با" دەپ الاڭدايدى.
ماماندار اۋىلداعى ءتورت تۇلىككە ەكپە ۋاقىتىلى سالىندى دەيدى. ال قىرىلعان مال دەرەكقور بازاسىنا ەنبەگەندىكتەن وسىنداي جاعداي بولعانىن ايتادى. تىزىمگە ەنبەگەن ءىرى-قاراعا ەكپە ەگىلمەيتىن كورىنەدى. سوندىقتان مامان اۋىل تۇرعىندارىنا مالىن ءوز اتىنا تىركەۋ ءۇشىن ءوتىنىم قالدىرۋعا كەڭەس بەرەدى. سوندا عانا مەملەكەتتەن بولىنەتىن ەكپەگە ءىلىنىپ، جوسپار بويىنشا ۋاقىتىندا باقىلاۋعا الىناتىنىن ايتتى. ال ءىرى-قارانىڭ جاپپاي قىرىلۋ سەبەبى ءالى بەلگىسىز.
Abai.kz
