امەريكا قۇراما شتاتتارى قازاقستاننىڭ ۇزاق مەرزىمدى سەرىكتەسى بولۋعا جانە جاسىل ەكونوميكاعا كوشۋگە كومەكتەسۋگە دايىن. بۇل تۋرالى اقش مەملەكەتتىك حاتشىسىنىڭ وڭتۇستىك جانە ورتالىق ازيا بويىنشا كومەكشىسى دونالد لۋ ايتتى.

نۇر-سۇلتاندا قازاقستان-امەريكا ستراتەگيالىق ارىپتەستىگىن كەڭەيتۋ جونىندەگى كوميسسيانىڭ وتىرىسىندا سويلەگەن سوزىندە ول امەريكا قۇراما شتاتتارى قازاقستاننىڭ سەنىمدى سەرىكتەسى ەكەنىن مالىمدەدى.

«وسى 30 جىلدا ءبىز 37 ميلليارد دوللار ينۆەستيتسيا قۇيدىق. ءبىز بولاشاقتا قازاقستاننىڭ سەرىكتەسى بولعىمىز كەلەدى، «جاسىل ەكونوميكاعا» كوشۋگە اتسالىسقىمىز كەلەدى. ءبىز جاڭارتىلاتىن ەنەرگيا كوزدەرىنە ينۆەستيتسيا سالعىمىز كەلەدى. جەل، كۇن ەنەرگياسى، سۋ ەنەرگياسى. ءبىزدىڭ ەلدەرىمىز تاريحتاعى ەڭ بەرىك قارىم-قاتىناستارعا يە. قازىر ءبىز كوۆيد-19, جاھاندىق جىلىنۋ، اۋعانستانداعى داعدارىس سياقتى كەيبىر قيىندىقتارعا تاپ بولدىق. امەريكا قۇراما شتاتتارى كوپ جىلدار بويى قازاقستاننىڭ سەنىمدى سەرىكتەسى بولىپ قالا بەرەدى دەپ سەنەمىن. مەن وسىندا بولىپ، سىزدەرمەن بىرگە تاۋەلسىزدىكتىڭ 30 جىلدىعىن تويلاپ جاتقانىما قۋانىشتىمىن»، - دەدى دونالد لۋ.

ونىڭ ايتۋىنشا، ەكى ەل ەكونوميكانىڭ ءتۇرلى سالالارىندا، اسىرەسە مۇناي-گاز سەكتورىندا بەلسەندى جۇمىس ىستەۋدە. ءبىر كۇن بۇرىن تاشكەنتتە وزبەكستان پرەمەر-ءمينيسترىنىڭ ورىنباسارى، ينۆەستيتسيا جانە سىرتقى ساۋدا ءمينيسترى ساردور ۋمۋرزاكوۆپەن كەلىسسوزدەر كەزىندە دونالد لۋ اقش پەن وزبەكستان اراسىنداعى قارىم-قاتىناسقا قاتىستى وسىنداي مالىمدەمە جاساعان بولاتىن.

Abai.kz