قازاقستان ۇلتتىق بانكى اينالىمعا "TÁÝELSIZ QAZAQSTANǴA 30 JYL" كوللەكتسيالىق مونەتالارىن شىعارادى. نومينالدارى 5 مىڭ جانە 500 تەڭگەلىك كۇمىستەن جانە نومينالى 100 تەڭگەلىك مەلحيوردان جاسالعان مونەتالار "ەستە قالاتىن وقيعالار مەن ءبىرتۋار ادامدار" سەرياسىن جالعاستىرادى، دەپ حابارلايدى "ادىرنا" ۇلتتىق پورتالى.

- مونەتالارىنىڭ ديزاينى ءبىرتۋار تاريحي تۇلعالاردىڭ پورترەتتىك بەينەلەرى سالىنعان. وندا تاۋەلسىز قازاقستاننىڭ 1993 جىلعى ۇلگىدەگى بانكنوتتارىنىڭ ءبىرىنشى سەرياسىمەن سيمۆولدىق بايلانىس كورسەتىلگەن. كومپوزيتسيا ۆيزۋالدى پورترەتتىك قاتاردى اياقتاپ، مەملەكەت تاريحىنداعى مەرەيتويلىق كەزەڭدى لوگيكالىق تۇردە بىلدىرەدى، — دەلىنگەن حابارلامادا.

925 سىنامالى كۇمىستەن جاسالعان 5 مىڭ تەڭگەلىك 300 مونەتا، ال 500 تەڭگەلىك 3 مىڭ مونەتا جاسالدى. سونداي-اق مەلحيور قوسپاسىنان جاسالعان 100 تەڭگەلىك 30 مىڭ تيىن دايىندالعان. ولاردىڭ بارلىعى ەلىمىزدىڭ اۋماعىندا تولەم جۇرگىزۋ ءۇشىن جارامدى.

ەستەرىڭىزگە سالا كەتەيىك،  بيىل ۇلتتىق ۆاليۋتا تەڭگەنىڭ اينالىمعا ەنگەنىنە 28 جىل تولدى.

Abai.kz