رەسەيدىڭ ۋكراينا شەكاراسىنا ءوز اسكەرىن شوعىرلاندىرۋى تۋرالى از ايتىلعان جوق. نەگىزگى سەبەپتەرى دە بەلگىلى -ۋكراينا ناتو-عا مۇشە بولماۋى كەرەك. شابۋىلدى انە باستايمىز، مىنە باستايمىز دەپ يستەريكا تۋعىزىپ جۇرگەن دە رف باق-تارى (قازاقستان سياقتىلاردىكى تەك سولاردىڭ ايتقاندارىن قايتالاۋ عانا، سەبەبى قازاقستان رف ينفورماتسيالىق كەڭىستىگىنىڭ ءبىر بولشەگى-ءدۇر، تاۋەلسىز اقپارات كوزى بىزدە دە-فاكتو جوعى بەلگىلى). مۇندايدا سوعىس ءيىسىن الىستان سەزەتىن ەڭ الدىمەن بانكتەر. ەگەر شىن سوعىس باستالعانداي بولسا رۋبل قۇلدىراپ باستاۋى كەرەك ەدى، بىراق ول ورنىندا قالدى، ياعني ءبارى دە جەل ءسوز دەگەن ءسوز. دەگەنمەن پۋتين تۇپكى ماقساتىنا جەتپەسە دە ارالىق ماقساتىنا جەتتى - ونىڭ اقش پرەزيدەنتىمەن قۇپيا ۆيدەوكەزدەسۋى بولىپ ءوتتى. ارادا ءبىراز ۋاقىت وتە كەلە ونىڭ دا ناتيجەلەرى بەلگىلى بولا باستادى. ءبىرىنشى سكريپكا ءرولىن بايدەن ورىنداعان. ول ءتىپتى قاتاڭ تالاپتار قويعان، سوعىستى باستاساڭ ءوز وبالىڭ وزىڭە، ايامايمىز دەگەنگە دەيىن بارعان. رف جاعىنىڭ كوپكە شەيىن ۇندەرى شىقپاي قالۋ سەبەبى سودان بولدى، بۇل كەزدەسۋ كرەمل ءۇشىن تازا مينۋسكە شىقتى.

جەڭىلگەن تەك تۇرماس، بۇلار ەندى اسكەرىن ودان ءارى شوعىرلاندىرىپ، ناتو-نىڭ شىعىسقا قاراي ۇلعايماۋىن جازباشا تۇردە تالاپ ەتە باستادى. كرەمل ۇلىبريتانيامەن، فرانتسيامەن، فينليانديامەن سويلەسىپ كوردى. بارىنەن دە پنح دەگەن جاۋاپ الدى. ماسكەۋ الدىندا بۇرىنعىشا جالباقشىپ تۇراتىن باتىستى كورە المادى پۋتين. ولار وزگەرىپتى، رەسەيدىڭ ويىن ەرەجەسىن ءبارى دە ءتۇسىنىپتى، ءسويتىپ قارسى ارەكەتكە كوشىپتى. باسقا امالى قالماعان كرەمل 15 جەلتوقساندا اقش-قا حات جولداپ بىرقاتار تالاپتار قويىپتى، كەلىسىم-شارت ۇلگىسىن ۇسىنىپتى.ەكى كۇن وتپەي جاتىپ ونىسىن بۇكىل باق-قا جاريالاعان. بۇل نەنى بىلدىرەدى؟ وزدەرىنىڭ ەشكىم ەمەستىگى ميلارىنا ەندى جەتە باستاعانىن، ىزادان جارىلارداي بولىپ نە ىستەرگە بىلمەي وتىرعاندىعىن عانا بىلدىرەدى. ايتپەسە مۇنداي كەلىسىم-شارتتار اۋەلى الدىن-الا قۇپيا تالقىلانىپ، ابدەن ءپىسىپ-جەتىلگەسىن ءوزارا ورتاق مالىمدەمە جاسالىپ، پىسىقتالىپ، تەك سودان كەيىن عانا ەگجەي-تەگجەيى كوپشىلىككە ۇسىنىلار ەدى. بۇل دا وزدەرىنشە جاساعان قۋلىقتارى - مىنە، ءبىز ۇسىنىس جاساپ ەدىك، ولار كەلىسپەي جاتىر دەگىسى كەلگەن سياقتى. ءسويتىپ اقپاراتتىق شابۋىلدى توكپەكتەتكىسى كەلدى عوي دەيمىن. بىراق... ول ويلاعاندارى دا ىسكە اسپاي قالدى - ناتو دا، اقش تا الگى تالاپتار باق-تاردا جاريالانىسىمەن بىردەن جاۋاپ قاتتى - دالاعا ويناڭدار دەدى. وزدەرىنە دە سول كەرەك ەدى - ەشكىممەن اقىلداسپاستان، پىكىرىن سۇراماستان، سىرتىمىزدان تون ءپىشىپ، بۇرىنعى سسسر قۇرامىندا بولعان ەلدەردەن اۋلاق جۇرىڭدەر، ولاردا ءبىزدىڭ مۇددەمىز بار دەۋى ءتىپتى ابەستىك قوي؟ زاماننىڭ وزگەرىپ كەتكەنىمەن ساۋداسى جوق، سول باياعى يمپەرياليستىك پيعىل، ولار قايدا كەتەر دەيسىڭ دەگەندەي. بۇلار ءتىپتى وزگەرەتىن ەمەس، بىراق ەندى ايداي الەمگە ماسقارا بولدى، شىن نيەتتەرى ايقىن كورىندى.

قۋانىش ەدىلحانتەگى

Abai.kz