ەلىمىزدە قازىناعا قول جايىپ وتىرعان ايماقتار جەتەرلىك. ونەركاسىپ كەشەندەرى دامۋ شەگىنەن ارتتا قالعان ايماقتار كوپ. ەلىمىزدە تەك قانا 4 ايماق ءوزىن تولىق قامتيدى، ال قالعان ايماقتار قارجىلاي كومەككە ءزارۋ. 14 وبلىس پەن ءۇش رەسپۋبليكالىق ماڭىزى بار قالادان تۇراتىن ەل ءۇشىن بۇل تىم ناشار كورسەتكىش.

ءوزىن تولىق قامتىعاندار اراسىندا مۇنايلى ولكە اتىراۋ مەن ماڭعىستاۋ وبلىستارى جانە وڭتۇستىك استانا الماتى مەن ەلوردا نۇر-سۇلتان قالالارى بار. ال شىمكەنت رەسپۋبليكالىق ماڭىزى بار قالا بولسا دا، ازىرگە بۇل قاتارعا قوسىلمادى.

كەلەر جىلى رەسپۋبليكالىق بيۋدجەتتى قارجىلاندىرۋ دەڭگەيى «ulysmedia.kz» اقپاراتى بويىنشا 488 ملرد تەڭگەنى قۇراماق. ونىڭ ىشىندە بيۋدجەتكە 220 ملرد تەڭگە اتىراۋ وبلىسىنان، 211 ملرد تەڭگە الماتىدان، 38 ملرد تەڭگە نۇر-سۇلتاننان جانە 19 ملرد تەڭگە ماڭعىستاۋدان تۇسەدى دەپ كۇتىلىپ وتىر.

ال دونور ايماقتارعا تەلمىرىپ، بيۋدجەتتەن قارجى ءبولىنۋىن كۇتىپ وتىرعان وزگە ايماقتارعا 2,119 ترلن تەڭگە بولىنبەك. ونىڭ ىشىندە ەڭ كوپ قاراجات تۇركىستان وبلىسىنا بولىنبەك، باقانداي 402 ملرد تەڭگە. ملردتاعان تەڭگەگە تۋريستىك ورتالىقتار سالىپ، ەل نازارىنا ىلىكسە دە، تۇركىستان ەكى ميلليوننان استام حالقى بار وبلىس رەتىندە ءوزىن قامتاماسىز ەتە الماي وتىر.

ەكىنشى ورىندا اۋماعى ۇلكەن شىعىس قازاقستان وبلىسى تۇر. ونەركاسىپ كەشەندەرى كوپ ەكەندىگىنە قاراماستان بيۋدجەتتەن قارجى بولىنۋىنە مۇقتاج. 2022 جىلى بيۋدجەتتەن اباي تۋعان وڭىرگە 217 ملرد تەڭگە بولىنبەك.

ءۇشىنشى ورىندا جامبىل وبلىسى تۇر. 2021 جىلى جارىلىسپەن ەستە قالعان وڭىرگە 2022-دە 194 ملرد تەڭگە بولىنبەك. ال بيۋدجەتتەن 184 ملرد تەڭگە بولىنەتىن قىزىلوردا وبلىسى ءتورتىنشى ورىندا تۇر.

وزگە ايماقتارعا دا بيۋدجەتتەن قارجى بولىنبەك، الايدا ونىڭ كولەمى جوعارىدا ايتىلعان تورتتىكتەن الدەقايدا از.

Abai.kz