الماتى قالاسى بويىنشا سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى جانداربەك بەكشين كەلەسى جىلدان باستاپ زەينەتكە شىعۋىنا بايلانىستى قىزمەتىنەن كەتەدى. 

27 جەلتوقساننان باستاپ جانداربەك بەكشين دەمالىسقا، سونداي-اق 5 قاڭتاردان باستاپ زەينەتكە شىعۋىنا بايلانىستى قىزمەتىنەن كەتپەك.

«جانداربەك بەكشيننىڭ كەلىسىمشارتى اياقتالدى. «مەملەكەتتىك قىزمەت تۋرالى» زاڭعا سايكەس زەينەتكەرلەرگە جۇمىستى ءبىر جىلعا ۇزارتۋعا بولادى. ال ەكىنشى رەت ۇزارتۋ مۇمكىن ەمەس. سول سەبەپتى ول قاڭتاردان باستاپ قىزمەتىنەن كەتەدى»، – دەيدى مينيسترلىكتەن.

ەندى بەكشيننىڭ قىزمەتىن ۋاقىتشا قارلىعاش ءابدىجابباروۆا اتقاراتىن بولادى.

جانداربەك بەكشين 2020 جىلدىڭ 18 ساۋىرىنەن باستاپ الماتىنىڭ باس سانيتارلىق دارىگەرى بولىپ جۇمىس ىستەدى.

جانداربەك مۇحتارۇلى 1958 جىلى 5 قاڭتاردا قوستاناي وبلىسى فەدوروۆ اۋدانى بايعارا اۋىلىندا دۇنيەگە كەلگەن.

Abai.kz