26 جەلتوقسان بەلگىسىز بىرەۋ الماتىداعى رەسەي باس كونسۋلدىعىنىڭ عيماراتىنا جارىلعىش زات قويعانى تۋرالى حابارلاما تاراتقان. بۇل تۋرالى orda.kzكە سىلتەمە جاساپ، Abai.kz حابارلايدى. 

قۇقىق قورعاۋ ورگاندارى تەكسەرۋ جۇرگىزىپ، اقپاراتتىڭ جالعان ەكەنى انىقتالدى. جالعان لاڭكەستى ىزدەستىرۋ جۇمىستارى ءجۇرىپ جاتىر.

بۇل تۋرالى باس كونسۋلدىقتىڭ كەڭەسشىسى ۆلاديمير مالىشەۆ ريا نوۆوستيگە ايتتى. ونىڭ ايتۋىنشا، كونسۋلدىقتىڭ ەلەكتروندى پوشتاسىنا ساعات 10:00-دە (ماسكەۋ ۋاقىتى بويىنشا 07:00) بەلگىسىز بىرەۋدەن حابارلاما كەلگەن.

«بۇل رەسەي مەن ورىستارعا قاۋىپ توندىرەتىن وتە جاعىمسىز ءماتىن بولدى. مۇنىڭ ءبارى باس كونسۋلدىقتىڭ مينالانۋىمەن اياقتالدى. ءبىز بۇل جاعدايدا قولدانىلۋعا ءتيىستى شارالاردىڭ بارلىعىن جاسادىق. اتاپ ايتقاندا، قازاقستاندىق تاراپ كاسىبي تۇرعىدان وتە جىلدام ارەكەت ەتتى. ءبىز وتە ريزامىز»، - دەدى ديپلومات.

ونىڭ ايتۋىنشا، كونسۋلدىققا كەلگەن كينولوگتار عيماراتتىڭ ءىشى مەن سىرتىن تەكسەرگەنىمەن، جارىلعىش زات تابىلماعان. «ءبىز دە ءوز تاراپىمىزدان شارا قولداندىق. ەشتەڭە تابىلمادى، ءبىزدىڭ تۇسىنىگىمىزشە، جالعان اقپارات كەلگەن» دەپ قوستى مالىشەۆ.

Abai.kz