ءدال جاڭا جىلدىڭ قارساڭىندا تمد-عا مۇشە مەملەكەتتەردىڭ باسشىلارى (بۇرىنعى وداقتاس ەلدەر) پەتەربورعا جينالدى. رەسەي پرەزيدەنتىنىڭ شاقىرتۋىن قابىل الىپ، جىلجابار وتىرىس وتكىزگەندەر سول – قازاقستان، قىرعىزستان، ازەربايجان، بەلارۋس، ارمەنيا، تاجىكستان، وزبەكستان، تۇركىمەنستان مەن رەسەي پرەزيدەنتتەرى.

قازاقستان اتىنان اۋەلى ەكس-پرەزيدەنت نۇرسۇلتان نازارباەۆتىڭ بارعانى بەلگىلى بولعان. ءبىر كۇننەن سوڭ پرەزيدەنت قاسىم-جومارت توقاەۆ تا پەتەربور جيىنىنان تابىلدى.

2021 جىلدى قورىتىندىلاپ، ۇيىمعا مۇشە مەملەكەتتەردىڭ ءوزارا ارىپتەستىگى اڭگىمە بولدى. الداعى ۋاقىتتا ءارتۇرلى سالالار بويىنشا، سونىڭ ىشىندە مادەني-گۋمانيتارلىق، ەكونوميكالىق، ساياسي، ساۋدا-ساتتىق، ت.ب. بىرلەسكەن جوبالاردى اقىلداستى. حالىقارالىق ءھام ايماقتىق ماسەلەلەر ءسوز بولدى. پادەنميامەن كۇرەس جانە بيوقاۋىپسىزدىك تاقىرىپتارى اڭگىمە بولدى. رەسمي اقپارات وسى.

اتالعان جيىندا قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينگە پاندەميا كەزىندە كورسەتكەن كومەگى ءۇشىن العىس ايتتى. ونى اقوردا سايتى جاريالادى.

توقاەۆتىڭ پۋتينگە العىسى

«قازاقستانعا قيىن كەزەڭدە قولداۋ كورسەتكەنىڭىز ءۇشىن ريزاشىلىعىمدى بىلدىرەمىن. ورتاق ۋاعدالاستىقتى ورىنداۋ ماقساتىمەن قاراعاندىدا رەسەيلىك سپۋتنيك V تەحنولوگياسى نەگىزىندەگى بىرلەسكەن ءوندىرىستى جولعا قويا الدىق. سپۋتنيك V ۆاكتسيناسى COVID-19 ىندەتىنىڭ تارالۋىنا توسقاۋىل قويۋ ىسىندە شەشۋشى ءرول اتقاردى دەپ ايتۋعا بولادى»، – دەپتى پرەزيدەنت توقاەۆ.

ال ۆلاديمير پۋتين كەلەر جىلى توقاەۆتى رەسەيگە ارنايى ءىس-ساپارلاپ كەلۋگە شاقىرعان. «ەگەر كەلەر جىلدىڭ باسىندا كەلىپ-كەتۋگە ۋاقىت تاپساڭىز جاقسى بولار ەدى»، - دەپتى قاراپايىم تۇردە قازاقشالاساق.

ءپۋتيننىڭ نازارباەۆقا العىسى

تمد باسشىلارىنىڭ جيىنىنا ەكس-پرەزيدەنت نۇرسۇلتان نازارباەۆ جۇرتتان بۇرىن بارعانىن ايتتىق جوعارىدا. رەسەي پرەزيدەنتىمەن تەت-ا-تەت كەزدەسكەنىن ايدوس ۇكىباي ايتقان ەدى. سول كەزدەسۋدە ۆلاديمير پۋتين نۇرسۇلتان نازارباەۆقا ەاەو ءۇشىن العىس ايتىپتى.

«ءسىزدى رەسەيدە كورگەنىمىزگە قۋانىشتىمىز. كەلگەنىڭىز ءۇشىن راحمەت. ءبىز ارىپتەستەرىمىزبەن ءار جولى كەزدەسكەن سايىن، ەاەو-نى دامىتۋدىڭ كەز كەلگەن ماسەلەسىن ءسوز ەتكەندە وداقتى قۇرۋ يدەياسى سىزگە تيەسىلى ەكەنىن ەسكە الىپ وتىرامىز. ءبىز وسى وداقتى قۇرۋعا باستاماشى بولعانىڭىز ءۇشىن العىس ايتامىز»، - دەپتى پرەزيدەنت پۋتين.

ال نازارباەۆ ءوز كەزەگىندە قازاقستان مەن رەسەي اراسىنداعى قارىم-قاتىناس وزگەلەرگە ۇلگى ەكەنىن اتاپ ايتقان.

«قازاقستان مەن رەسەي اراسىنداعى بايلانىس وزگەلەرگە ۇلگى بولارلىقتاي. ءبىز سىزدەرمەن ەرەكشە بايلانىس ورناتتىق. بۇل بايلانىس جاڭا پرەزيدەنتتىڭ كەزىندە دە سولاي جالعاسادى دەپ ويلايمىن. ويتكەنى ءبىز قۇداي قوسقان كورشىمىز. بۇدان الشاقتاۋعا بولمايدى. بۇعان ەكى تاراپ تا مۇددەلى»، -دەپتى نازارباەۆ.

نۇرسۇلتان نازارباەۆ وسىلاي دەپ سويلەپ جاتقاندا رەسەي پرەزيدەنتى ءسوزاراسىندا: «ءدال ايتاسىز»، - دەپ قۇپتاپ وتىرعان.

ايتپاقشى، نازارباەۆ پەن پۋتين كەزدەسۋى جايلى كرەملدىڭ رەسمي سايتى مەن ەلباسىنىڭ جەكە سايتى ەكى ءتۇرلى اقپارات تاراتتى.

كرەمل ەكەۋارا اڭگىمەنىڭ شاپ-شاعىن ستەنوگراماسىن جاريالاعان. وندا: «ۆلاديمير ۆلاديميروۆيچ، وسى ءساتتى پايدالانا وتىرىپ، كەلە جاتقان جاڭا جىلمەن قۇتتىقتايمىن. وتكەن جىل ءبىز ءۇشىن (جانە باسقالارى ءۇشىن) تاۋەلسىزدىكتىڭ 30 جىلدىعى بولدى. سىزدەر ءۇشىن دۋماعا سايلاۋ جىلى بولدى. وسى بولىپ جاتقان اۋىر جاعدايلارعا قوسا – ۇجىمداسقان باتىس كونفرونتاتسياسى (تەكەتىرەسى) تاعى بار. مەن قازىر سىزگە قانداي اۋىرتپالىق جۇكتەلىپ تۇرعانىن تۇسىنەمىن»، - دەگەن نۇرسۇلتان نازارباەۆتىڭ تسيتاتاسى قوسا بەرىلگەن.

ءدال وسى ديالوگ ەكس-پرەزيدەنت نۇرسۇلتان نازارباەۆتىڭ جەكە ينتەرنەت-رەسۋرسى  - «Elbasy.kz» سايتىندا قازاقشا جانە ورىسشا ەكى تىلدەگى نۇسقاسى جاريالانعان. الايدا، ەكى اقپاراتتا دا جوعارىداعى «باتىس كونفرونتاتسياسى» تۋرالى تسيتاتا كورسەتىلمەگەن.

نۇرگەلدى ابدىعانيۇلى

Abai.kz