پرەزيدەنت توقاەۆتىڭ شىعىس ەكونوميكالىق فورۋمىندا ايتقان سوزىنەن كەيىن، ەلىمىزدە اەس سالىنۋ ماسەلەسى قىزۋ تالقىلانىپ جاتىر. كوپشىلىك بالقاش ماڭىندا سالىنادى دەگەندى مەڭزەۋدە. الايدا جاڭا نۇسقالار دا جوق ەمەس. 

اەس سالىنۋى مۇمكىن تاعى ءبىر ايماق بەلگىلى بولدى. ەنەرگەتيكا ءمينيسترى ماعزۇم مىرزاعاليەۆ اەس سالىناتىن الماتىداعى ۇلكەن اۋىلىنان بولەك، شىعىس قازاقستان وبلىسىنداعى كۋرچاتوۆ قالاسىن دا ستانتسيا سالىنۋى مۇمكىن اۋماق رەتىندە اتادى.

«بۇل ماسەلە 2013 جىلدان بەرى، ياعني سەگىز جىلدان بەرى تالقىلانىپ كەلەدى. وسى ۋاقىت ىشىندە ءارتۇرلى جەر تەلىمدەرى سەيسميكالىق، ينفراقۇرىلىمدىق، تۇتىنۋ دەڭگەيىنە قاراي زەرتتەلدى. قازىر قىسقا تىزىمدە ەكى ورىن بار. ءبىرى ۇلكەن اۋىلى (الماتى وبلىسى), ەكىنشىسى – كۋرچاتوۆ قالاسى (شىعىس قازاقستان وبلىسى). سەيسميكالىق جاعىنان ولار قولايلى. ينفراقۇرىلىمنىڭ قولجەتىمدىلىگى جاعىنان ۇلكەننىڭ الەۋەتى باسىمىراق، سەبەبى «سولتۇستىك – وڭتۇستىك» 500 كيلوۆولتتىق ەلەكتر بەرۋ جەلىسى بار. سونىمەن قاتار، ۇلكەن اۋىلى ءبىزدىڭ نەگىزگى تۇتىنۋشىلارىمىز – وڭتۇستىك وڭىرگە جاقىن. بىراق ۋچاسكەنى تاڭداۋ بويىنشا تۇپكىلىكتى شەشىم قابىلدانعان جوق. بۇل جۇمىس باستالىپ تا كەتتى، «سامۇرىق-قازىنا» قورىندا جوبالىق توپ قۇرىلدى، ول بارلىق ءتيىستى زەرتتەۋلەردى جۇرگىزۋى كەرەك»، - دەدى مينيستر.

ول ەنەرگەتيكا ءمينيسترى بولىپ قىزمەتكە كەلگەننەن كەيىن العاشقىلاردىڭ ءبىرى بولىپ اەس سالۋ ماسەلەسىن كوتەرگەنىن ايتتى.

«بيىل ءبىز بەلگىلى ءبىر تاپشىلىققا كۋا بولدىق، ەلەكتر ەنەرگياسىن يمپورتتاۋعا ءماجبۇر بولدىق، رەسەيدەن جوسپارلانباعان اعىندار بولدى. وسىعان سايكەس ءبىز قازىر 2035 جىلعا دەيىن ەلەكتر ەنەرگياسىنىڭ، تۇتىنۋدىڭ جانە ءوندىرۋدىڭ تەڭگەرىمىن جاسادىق. حالىقتى جانە ەكونوميكامىزدى ەلەكتر ەنەرگياسىمەن قامتاماسىز ەتۋ ءۇشىن ەلەكتر ستانتسياسىن سالۋ كەرەك ەكەنىن كورىپ وتىرمىز», - دەدى ول.

الايدا، مينيستر اپاتتى جاعداي بولماۋىنا ەشكىمنىڭ كەپىل بولا المايتىنىن جەتكىزدى. اەس قاۋىپسىزدىگىنە جاۋاپكەرشىلىكتى ينۆەستور نە بولماسا سالۋ تەحنولوگياسىن ۇسىنىپ وتىرعان كومپانيا موينىنا الاتىنىن ايتقان.

مىرزاعاليەۆ ەنەرگەتيكا ءمينيسترى رەتىندە ستانتسيا سالۋ كەرەكتىگىن ايتىپ، «الدىمىزدا تاڭداۋ تۇر: ءبىز نە جارىقسىز قاراڭعىدا وتىرامىز نە بولماسا قانداي دا ءبىر شەشىمگە كەلەمىز. بىزدە باسقا تاڭداۋ جوق. وسىنى ءتۇسىنۋىمىز كەرەك» دەدى. ءمينيستردىڭ ايتۋىنشا اەس قۇرىلىسى 10 جىلعا سوزىلادى.

ايجان تەمىرحان

Abai.kz