ءفيليپپينىڭ استاناسى مانيلا قالاسىندا كۇرەس تۇرلەرى بويىنشا جاسوسپىرىمدەر اراسىنداعى ازيا بىرىنشىلىگى اياقتالدى. وعان سارى قۇرلىقتىڭ بارلىق مەملەكەتىنىڭ وكىلدەرى قاتىستى. باق سىناۋعا بەل بۋعاندار اراسىندا قازاقستان قۇراماسى دا بار.
گرەك-ريم كۇرەسى بويىنشا وتەتىن جارىستا ەل نامىسىن مىنا سپورتشىلار قورعادى: ارتۋر ۇمبەتقاليەۆ (50 كەلى), ءمادي جاربولوۆ (55 كەلى), ەربول كيىكباەۆ (60 كەلى), رەنات نىعماتۋلين (66 كەلى), دوسجان قارتىقوۆ (74 كەلى), جاسۇلان قوجانوۆ (84 كەلى), جاناربەك قابدولوۆ (96 كەلى) جانە سامالبەك نىسانباەۆ (120 كەلى). قۇرامانىڭ اعا باپكەرى نۇرىم دۇيسەنوۆ شاكىرتتەرى جارىسقا جاقسى دايارلانعانىن ايتتى. «گرەك-ريم كۇرەسىن سەرىك ەتكەن قازاقستاندىق بالۋانداردىڭ داڭقى الىسقا جايىلعان. ءبىزدىڭ ەلدەن كوپتەگەن وليمپيادا جانە الەم چەمپيوندارى شىقتى. سول جەڭىستى ءداستۇردى ماقتانارلىقتاي جالعاستىراتىن دارىندى ءىزباسسارلار تاربيەلەۋ – ءبىزدىڭ مىندەت. وسى ورايدا ايانىپ قالىپ جاتقان جوقپىز. بۇيىرتسا، ازيا بىرىنشىلىگىندە اسىعىمىز الشىسىنان تۇسەدى»، – دەپ وسى ساپار الدىندا دۇيسەنوۆ مىرزا بىزبەن سىر بولىسكەن ەدى.
ءيا، قىراعى مامان قاتەلەسپەگەن ەكەن. گرەك-ريم كۇرەسى شەبەرلەرى بىرىنشىلىكتى قوس التىن، ءبىر كۇمىس جانە ءۇش قولا مەدالمەن قورىتىندىلادى. بىرىنشىلىك بارىسىندا قارسىلاس شىداتپاعان دوسجان قارتىقوۆتىڭ قيمىل-قوزعالىسىنا قۇلشىنا قول سوقپاعان جانكۇيەر جوق-اۋ، ءسىرا. دارا تالانتىمەن وقشاۋلانعان دوسجان باس جۇلدەنى ولجالادى. جەرلەسىمىزدىڭ جەڭىستى جولىن ارتۋر ۇمبەتقاليەۆ جالعاستىردى. قارسىلاسىنىڭ بارلىعىن قاپىدا قالدىرعان جاس ورەنگە دە ازيانىڭ التىنى بۇيىردى. ءمادي جاربولوۆ ەكىنشى ورىن السا، ەربول كيىكباەۆ، رەنات نىعماتۋلين جانە جاناربەك قابدولوۆ قولا مەدالعا قول جەتكىزدى.
ىلە-شالا جارىس جولىنا ايەلدەر كۇرەسىنىڭ وكىلدەرى شىقتى. اعا باپكەر بولات نۇرمۇحامبەتوۆتىڭ ءۇش مەدالعا قول جەتكىزۋگە كۇش سالاتىندارىن الدىن الا ايتقان. ونىڭ شاكىرتتەرى اراسىندا تاجىريبەلى بالۋاندار از ەمەس-ءتى. ولاردىڭ ءبىرازى الەمدىك، قۇرلىقتىق دەڭگەيدە شەبەرلىكتەرىن شىڭداپ ۇلگەرگەن. وسى جولى ءالبينا ابىلەۆا (44 كەلى), گۇلميرا ىسقاقوۆا (48 كەلى), ءزۇلفيا ياحياروۆا (51 كەلى), ءمولدىر ساقىمبەكوۆا (55 كەلى), دجۋليا ساتتىمبەكوۆا (59 كەلى), تاتيانا زاحاروۆا (63 كەلى), تاتيانا كوستيۋكەۆيچ (67 كەلى) جانە ەۆگەنيا ستەپوۆا (72 كەلى) سىندى بويجەتكەندەرگە سەنىم ارتىلدى. وسىلاردىڭ اراسىنان ءزۇلفيا ياحياروۆا سۋىرىلىپ شىقتى. الايدا ول الدىن الا جوسپارلانعان 51 كەلى سالماقتا ەمەس، 54 كەلى سالماق دارەجەسى بويىنشا باق سىناۋعا بەل بۋدى. باستاپقى باسەكەلەردەن سۇرىنبەي وتكەن ءزۇلفيا فينالدا ءۇندىستاننىڭ وكىلىنەن باسىم ءتۇسىپ، ءبىرىنشى ورىن الدى. تاتيانا كوستيۋكەۆيچ اقتىق سىنعا دەيىن جەتكەنىمەن، شەشۋشى تۇستا قارسىلاسىنا ەسە جىبەردى. تاتيانا كۇمىس مەدالدى ەنشىلەسە، قولا مەدالعا گۇلميرا ىسقاقوۆا مەن تاتيانا زاحاروۆا قول جەتكىزدى. بولات نۇرمۇحامبەتوۆتىڭ شاكىرتتەرى فيليپپين ساپارىنان 1 التىن، 1 كۇمىس جانە 2 قولا مەدالمەن ورالدى.
ەركىن كۇرەس شەبەرلەرىنىڭ جاتتىقتىرۋشىسى التاي تاناباەۆ العا قويعان مىندەتىن بىردەن پاش ەتتى. «وتكەن جىلى ءبىر التىن مەدالعا قول جەتكىزگەن ەدىك. بيىل سول ناتيجەنى ەسەلەۋگە ءتيىسپىز. نەگىزگى قارسىلاستارىمىز – يران مەن ءۇندىستان قۇرمالارى. قازاق بالۋاندارى دا وسال ەمەس. سول سەبەپتى ءۇش-ءتورت مەدالدىى ولجالاۋدى كوزدەپ وتىرمىز. ال نەگىزگى ماقسات – جالپىكوماندالىق ەسەپتە ۇزدىك ۇشتىكتىڭ قاتارىنا ەنۋ» دەيدى ول. ەركىن كۇرەستەن ەل نامىسىن مىنا بالۋاندار قورعادى: مارعۇلان ءجۇسىپوۆ (50 كەلى), داۋلەت نيازبەكوۆ (55 كەلى), ساياتبەك وقاسوۆ (60 كەلى), داۋرەن جۇماعازيەۆ (66 كەلى), جانبولات ماعزۇموۆ (74 كەلى), يسلام ازيزوۆ (84 كەلى), عاني ىزماعامبەتوۆ (96 كەلى) جانە مۇسا مامەدوۆ (120 كەلى).
60 كەلى سالماقتا بەلدەسكەن سايات وقاسوۆ ەشكىمگە بەت قاراتپادى. جارتىلاي فينالدا يراننىڭ جانە فينالدا ءۇندىستاننىڭ وكىلىنەن ايلاسىن اسىرعان قانداسىمىز التىننان القا تاعىندى. اقتىق سىندا عانا جەڭىلىس تاپقان جانبولات ماعزۇموۆ پەن مۇسا مامەدوۆ كۇمىس مەدالدى قورجىنعا سالدى. مارعۇلان ءجۇسىپوۆ، يسلام ازيزوۆ جانە عاني ىزماعامبەتوۆكە قولا مەدال بۇيىردى.
كۇرەستىڭ ءۇش ءتۇرى بويىنشا فيليپپين ەلىنىڭ استاناسىندا وتكەن ازيا بىرىنشىلىگىندە قازاقستان قۇراماسى 16 مەدال جەڭىپ الدى. ونىڭ تورتەۋى – التىن، تورتەۋى – كۇمىس جانە سەگىزى قولا جۇلدە. ەگەر بالۋاندىق ونەر بويىنشا سارى قۇرلىقتا باسەكەلەستىكتىڭ بەلەڭ الىپ تۇرعانىن ەسكەرسەك، وتانداستارىمىز كورسەتكەن ناتيجەنى وڭدى دەپ باعالاعان ءجون.

“ايقىن” گازەتى