جاڭاوزەندە باستالىپ، باتىس ءوڭىرى بويىنشا بولىپ جاتقان حالىقتىڭ جاپپاي گاز باعاسىن تۇسىرۋگە قاتىستى تالابىن الەۋمەتتىك جەلى قولدانۋشىلار دا جارىسا جازۋدا. ساياساتكەرلەر، قوعام قايراتكەرلەرى مەن زيالى قاۋىم وكىلدەرى ءوز ويلارىن ورتاعا سالۋدا. 

تءوزىم تاۋسىلىپ، سابىر سارقىلىپ بارادى...

بەلگىلى تەاتر جانە كينو اكتەرى بەكجان تۇرىس ينستاگرام پاراقشاسىنا جاڭاوزەن حالقىن قولداپ، جازبا قالدىردى.

«جاڭاوزەندىكتەردىڭ تالابى ءبىر عانا وڭىرگە ەمەس، بۇكىل قازاققا ورتاق. ءيا، جاڭاوزەندەگىلەردىڭ مۇڭى كەز كەلگەن قازاقتىڭ جۇرەگىن قوزعاپ، جانىنا باتىپ تۇر. ءار جەردەن «ءبىز بىرگەمىز» دەگەن ءسوزدى كوز شالىپ جاتقانى دا سودان. جاڭاوزەندەگى كۇيزەلگەن ەلدىڭ كۇڭىرەنىسىن ۇيدە جاتىپ كۇيىنىپ تىڭداۋدان نە ونەدى؟ بىراق… جەتەيىن دەسە، جەردىڭ شالعايلىعى، ودان بۇرىن بارماققا بەكىنگەننىڭ الدىنان شىعاتىن قولدان جاسالعان توسقاۋىلدار كەزىگىپ, ىشتەن بۋلىعىپ وتىرعان جاعداي بار.

بيلىكتىڭ دە، ءتارتىپ ساقشىلارىنىڭ دا قاراپايىم حالىق جاعىنا شىعاتىن كەز جەتتى. قازاق زيالىلارى قالىڭ ۇيقىدان قاشان ويانادى؟ ءدال قازىر ازاماتتىق ءسوز ايتىپ، ازاماتتىق مىنەز كورسەتە الاتىن زيالىلار قايدا؟ ءدال بۇگىن الدىڭعى جاڭاوزەن وقيعاسىنا قاتىستى بولات اتاباەۆ كورسەتكەن مىنەز جەتپەي تۇر.

جىل قازاقتىڭ مۇڭىن ايتۋمەن باستالدى، تىڭدار قۇلاق تابىلىپ، قازاقتىڭ مۇددەسىنە شەشىلەر وڭ ناتيجە كورۋدى ءناسىپ ەتكەي! كەشە عانا سايلانعان دەپۋتاتتاردىڭ ۇنسىزدىگى از قازاقتىڭ ءبىرىن-ءبىرى جەككورىپ كەتپەۋىنە سەبەپ بولماۋى كەرەك. جاعداي ۋشىقسا، جۇدىرىق بولىپ ءتۇيىلىپ، اتقا قوناتىن قازاقتى ەشكىم دە، ەشتەڭە دە توقتاتا المايدى. ويتكەنى ءتوزىم تاۋسىلىپ، سابىر سارقىلىپ بارادى. ونى ءبارى سەزىپ-ءبىلىپ وتىر. جاڭاوزەندىكتەردىڭ جالعىز ەمەس ەكەنىن وسىلاي جەتكىزگەندى ءجون كوردىم. ازامات رەتىندە، بولات اعامنىڭ ارۋاعىنىڭ الدىندا ايتپاعىم وسى بولدى، اركىمنىڭ قابىلداۋ-قابىلداماۋى ءوز ەركىندە», - دەدى ول.

پرەزيدەنت باتىل كادرلىق شەشىمدەرىن قابىلداۋى ءتيىس!

ال قوعام بەلسەندىسى مۇحتار تايجان بولسا، پرەزيدەنتتىڭ جازباسى جەتكىلىكسىز دەپ وتىر.

«پرەزيدەنت تۇندە پوست جازىپ، ءۇكىمەتكە تاپسىرما بەرىپ قويعان ەكەن. جاقسى، بىراق ماسەلە ءبىر پوستپەن شەشىلمەيدى دەپ ويلايمىن. پروبلەما تەك گازدا ەمەس قوي. جالپى حالىقتىڭ جاعدايى ابدەن ناشارلاپ كەتتى. ءومىر قىمباتتاپ كەتتى، جۇمىسسىزدىق باسىم. ياعني پروبلەما ءۇكىمەتتىڭ جالپى بۇرىس ەكونوميكالىق ساياساتىندا. البەتتە بىزگە مۇلدەم باسقا ەكونوميكالىق ارەكەتتەر قاجەت، ال ول ءۇشىن ءۇكىمەتكە ەكونوميكامەن اينالىساتىن پرەمەردەن باستاپ, مۇلدەم باسقا مينيسترلەر كەلۋ كەرەك. ءسوزدىڭ قىسقاسى پرەزيدەنت باتىل كادرلىق شەشىمدەرىن قابىلداۋى ءتيىس. ولاي جاساماسا پروبلەما شەشىلمەيدى.

بۇل كادرلار وزگەرمەسە ەكونوميكالىق ساياسات تا وزگەرمەيدى، ياعني حالىقتىڭ الەۋمەتتىك جاعدايى تومەندەي بەرەدى، ال نارازىلىعى كۇشەيىپ بارادى. باتىل كادرلىق شەشىمدەر كەرەك. سوندا عانا ءجون وزگەرىس پايدا بولۋى مۇمكىن», - دەپ جازدى ول.

مۇناي شىعاراتىن ەلدە گاز بەن بەنزين قىمبات دەگەن نە ءسوز؟

اقىن جانات جاڭقاشۇلى ءوزىنىڭ پاراقشاسىنا:

«قۇداي تاعالا قازاققا ولشەۋسىز بايلىق بەردى. جەرىنىڭ تۇگىن تارتساڭ مايى شىعادى. استى كەنىش. بىراق سونىمەن قاتار جەمساۋىنا سالساڭ جەر شارى سىياتىن جەمقورلاردى دا بەرگەن ەكەن. ءبىر كەم دۇنيە دەگەن وسى. ايتپەسە، مۇناي شىعاراتىن ەلدە گاز بەن بەنزين قىمبات دەگەن نە ءسوز؟

وتىز جىلدا باي مەن كەدەيدىڭ اراسى تىم الشاقتاپ كەتتى. بۇل وتە قاۋىپتى قۇبىلىس! ەگەر كاسىپ قىلىپ بايىسا داۋ جوق. ءبىزدىڭ بايلاردىڭ جوبامەن 80 پايىزى بيلىگىن اسىرا پايدالانىپ ءھام جەمقورلىقپەن بايىعاندار. حالىقتىڭ نەسىبەسىن جەدى. ال حالىق دەگەن قۇدايدىڭ ءبىر اتى.

قازاقستاننىڭ بار بايلىعى ازعانتاي توپتىڭ قولىندا. حالىق اش. مۇناي باعاسى كوتەرىلسە ايلىق تا كوتەرىلۋ كەرەك. زەينەتاقى دا. مۇعالىم مەن دارىگەردىڭ ايلىعى كوتەرىلىپ جاتقانمەن وزگە جۇمىسكەرلەردىڭ ايلىعى كوتەرىلىپ جاتقان جوق. 50000 تەڭگەگە جۇمىس ىستەپ، جان باعىپ جۇرگەندەر بار. ەندى قالعان سەگىز جىلدا 2030 بولىپ، ىسكە اسىپ كەتەدى-اۋ دەپ ويلامايمىن! جاڭاوزەندەگى داۋىس بۇكىل قازاقتىڭ داۋىسى! مەن جاڭاوزەندىكتەرمەن بىرگەمىن!

انتيمونوپوليامەن بىرگە مەملەكەتتىك كومميسسيا قۇرىلىپ، بۇل قىمباتشىلىقتىڭ سەبەبى انىقتالۋى كەرەك. ەگەر ارتىندا جەر شارىن جۇتقىسى كەلەتىن جەگىقۇرتتار تۇرسا ولار زاڭمەن جاۋاپ بەرۋلەرى ءتيىس! ەستيتىن ۇكىمەت حالىقتىڭ جان ايقايىن ەستىمەسە كەرەڭ بولعانى دا.

اۋرۋىن جاسىرعان ولەدى. ءبىزدىڭ بيلىك وتىز جىلدا كەتكەن قاتەلىكتىڭ ءبارىن اشىق مويىنداپ، جاڭا رەفورما جاساۋى كەرەك. جەمقورلاردىڭ ورىنى مىنبە ەمەس، تۇرمە!»، - دەپ جازدى.

ءتۇپتىڭ تۇبىندە رەجيم قۇلايدى!

جازۋشى-پۋبليتسيست مارات ءبايدىلداۇلى بولسا:

«مەملەكەت دەگەنىمىز حالىقتىڭ قوعامدىق كەلىسىم نەگىزىندە قۇرىلعان ۇيىمى. بيلىك حالىققا قىزمەت ەتكەندە عانا ومىرشەڭ بولادى. گازدىڭ، بەنزيننىڭ، ازىق-تۇلىكتىڭ جويداسىز قىمباتتاۋىنا نارازىلىق بىلدىرگەن جاڭاوزەندىكتەر تالابى وتە ورىندى. بيلىك بۇل ماسەلەلەردى دەرەۋ شەشۋگە ءتيىس!

قاسىم-جومارت توقاەۆ تۇنگى ۇشتە تۋيتتەردە: «ۇكىمەتكە جاڭاوزەندەگى جاعدايدى ەكونوميكالىق تۇرعىدان ەسكەرىپ، قۇقىقتىق جاعىنان تەز ارادا قاراستىرۋدى تاپسىردىم. شەرۋگە شىققاندار قوعامدىق ءتارتىپتى بۇزباۋعا ءتيىس», - دەپ جازىپتى عوي.

ال يتالياندىق ويشىل نيككولو ماكياۆەللي ايتادى بيلىك ءۇشىن: «قورعانىستىڭ ىشىندەگى ەڭ مىقتىسى — حالىققا جيىركەنىشتى كورىنبەۋ: ەگەر حالىققا سۇيكىمسىز بولساڭ قانداي مىقتى قامال دا قۇتقارىپ قالا المايدى» دەپ. سوندىقتان بيلىك حالىقپەن ەسەپتەسۋ كەرەك. ەگەر بۇرىنعى ادەتىنە باسىپ ءتۇرلى ايلا-شارعىلارعا باراتىن بولسا مۇنىڭ سوڭى ۇلكەن وزگەرىستەرگە سوقتىرادى.

ءوز باسىم وقيعالاردىڭ دامۋىن ەكى نۇسقادا كورەمىن. ءبىرىنشىسى، «ەستيتىن ۇكىمەت» نۇسقاسى، بيلىك حالىق تالابىن ورىنداپ پروبلەمالاردى شەشۋدىڭ ىقپالدى تۇتقالارىن (مونوپوليستەردى تىزەرلەتەدى، بەنزينگە، ازىق-تۇلىككە باعانىڭ اسپانداۋىن شەكتەيدى) ىسكە قوسادى. ەكىنشىسى، «كەرەڭ ۇكىمەت» نۇسقاسى، بيلىك حالىق تالابىنا پىسقىرمايدى. سونىڭ سالدارىنان جاڭاوزەندە باستالعان حالىق نارازىلىعى بۇكىل ەلدى قامتيدى، ءتۇپتىڭ تۇبىندە رەجيم قۇلايدى!», - دەگەن جازبا قالدىردى.

Abai.kz