قازاقستاندا تابيعي گازعا قول جەتكىزگەن تۇرعىندار سانى ارتىپ كەلەدى. 2026 جىلعى 1 قاڭتارداعى جاعداي بويىنشا ەلدەگى گازداندىرۋ دەڭگەيى 64,2%-دى قۇرادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا قر ەنەرگەتيكا ۆيتسە-ءمينيسترى قايىرحان تۇتقىشباەۆ مالىمدەدى.

ونىڭ ايتۋىنشا، قازىرگى تاڭدا 20,5 ملن قازاقستاندىقتىڭ 13,1 ميلليونى تابيعي گازبەن قامتىلعان.

– 2025 جىلدىڭ قورىتىندىسى بويىنشا، 354 مىڭنان استام ادام تۇراتىن 94 ەلدى مەكەن تابيعي گازعا قوسىلعان. وسى كەزەڭدە 2 مىڭ شاقىرىمنان استام گاز قۇبىرى سالىنىپ، 82 گازبەن جابدىقتاۋ جوباسىنىڭ قۇرىلىسى اياقتالعان. ال 2026 جىلعى 1 قاڭتاردا گازداندىرۋ دەڭگەيى 64,2%-عا جەتكەن نەمەسە 20,5 ملن ادامنىڭ 13,1 ميلليونى تابيعي گازعا قول جەتكىزدى، - دەدى سپيكەر.

سونداي-اق ۆيتسە-مينيستر گازداندىرۋ دەڭگەيى ەڭ جوعارى وڭىرلەرگە توقتالىپ ءوتتى.

– گازداندىرۋ دەڭگەيى رەسپۋبليكانىڭ باتىس وبلىستارىندا، جامبىل وبلىسىندا، سونداي-اق الماتى جانە شىمكەنت قالالارىندا 90%-دان اسادى. ال الماتى، قىزىلوردا، تۇركىستان، قوستاناي جانە جەتىسۋ وبلىستارىندا بۇل كورسەتكىش 60%-دان 90%-عا دەيىنگى ارالىقتى قۇرايدى، - دەدى قايىرحان تۇتقىشباەۆ.

سونىمەن بىرگە قاراعاندى، اقمولا جانە ۇلىتاۋ وبلىستارىندا بۇل كورسەتكىش 60%-دان تومەن دەڭگەيدە ەكەنىن جەتكىزدى.

ەنەرگەتيكا مينيسترلىگىنىڭ مالىمەتىنشە، 2026 جىلى رەسپۋبليكالىق بيۋدجەتتەن گاز تاسىمالداۋ جۇيەسىن دامىتۋعا بولىنگەن 27,3 ملرد تەڭگە ەسەبىنەن گازداندىرۋ دەڭگەيىن 64,3%-عا جەتكىزۋ جوسپارلانىپ وتىر. وسى ارقىلى تاعى 32 مىڭعا جۋىق ادام تابيعي گازعا قول جەتكىزەدى.

Abai.kz