مەنشە، ءبىزدىڭ بيلىكتىڭ ەڭ باستى كەمشىلىگى جانە ەڭ ۇلكەن قاتالىعى - حالىقتان الشاقتىعى. ءوز حالقىنان. ءوز سايلاۋشىسىنان. ءوز ازاماتىنان. بيلىك جاعى ءوز الدىنا ءبىر بولەك الەم دە، بۇقارا حالىق جاعى وزىنشە تاعى ءبىر بولەك الەم سياقتى بولىپ كورىنەدى ماعان. قۇددى ءبىر قىتاي قامالى ورناعانداي، ەكەۋىن ءبىر بىرىنە جولاتپايدى، جەتكىزبەيدى. بيلىك جوعارىدان قارايتىن سياقتى، الىستان قارايتىن سياقتى..

اينالايىن بيلىك، ءوزىڭ دە وسى حالىقتىڭ ىشىنەن شىقتىڭ عوي، نەسىنە اۋلاقتانا بەرەسىڭ سونشالىقتى؟!؟ شىق، بار حالىقتىڭ ىشىنە كىر، ۇلكەن كورسەڭ قول قۋسىرىپ سالەم بەر، كىشى كورسەڭ باۋرىڭا باس، ماڭدايىنان يىسكە! كەدەي جارلىنىڭ ەسىگىن قاق، ۇيىنە كىر، باۋىرىم دە، قال جاعدايىن سۇرا! بيلىكتىڭ ءار دەڭگەيىندەگى ۋاكىلى وسىنى ىستەسە، حالىقتان قاشپاسا، حالىقتىڭ تىلەگىنە نازار اۋدارسا، كوڭىل بولسە، ودان كىمگە قانداي زيان، سونى ءتۇسىندىرىپ بەرىڭىزدەرشى ماعان؟!؟ الدە بۇل سوۆەت بيلىگىنىڭ كەزىندەگى اپپاراتتىق داعدىسى ما؟ ونى الاستاپ، حالىقپەن ۇدايى تىكەلەي قاتىناستىڭ وسىزامانعى فورمالارىن ەنگىزۋ كەرەك قوي ۋشىقتىرا بەرمەي..

كەمەدەگىنىڭ جانى ءبىر، ءبارىمىز وسى ەلدىڭ ازاماتىمىز، بىرگە ءومىر ءسۇرىپ جاتىرمىز جان باعىپ، ەڭبەك ەتىپ. ءبىر دەنەنىڭ اعزالارى سياقتىمىز، ءبىر جەرى اۋىرسا دەنەنىڭ ءبارى سودان زارداپ شەگەتىندەي. ءبىر ءبۇتىننىڭ بولشەكتەرى سياقتىمىز، سوندىقتان ەلىمىزدىڭ ءبىر بۇرىشىندا بولىپ جاتقان ۋاقيعالارعا نەمقۇرايدىلىقپەن قاراي المايمىز. تاۋەلسىزدىك جىلدارى حالىق جادىنان وشپەستەي ورىن العان جاڭاوزەن، شاڭىراق سياقتى تراگەديالىق ۋاقيعالار قايتالانباسا ەكەن دەپ تىلەيمىز.

ارينە، ەڭ ۇلكەن جاۋاپكەرشىلىك بيلىكتىڭ موينىندا، ويتكەنى اتقارۋشى بيلىك سونىڭ قولىندا، ەكونوميكا، ىشكى ساياسات، الەۋمەتتىك جاعداي، ەڭبەك شارتى، باعانى باقىلاۋ تب ءبارى بيلىكتىڭ قولىندا عوي. سوندىقتان دا بيلىك پاراساتتى بولۋى ءلازىم، حالىقتىڭ مۇڭ مۇقتاجىن دەر كەزىندە ءبىلىپ، ەسكەرىپ، دۇرىس شارا قولدانۋى ءلازىم. ول ءۇشىن بيلىك ەڭ ءبىرىنشى حالىقپەن ەتەنە جاقىن قاتىناستا بولۋ كەرەك، تىكەلەي ديالوگتا بولۋى شارت.

ال اقكوڭىل دە كەڭبەيىل حالىقتىڭ ىشىنە پروۆوكاتورلار كىرىپ كەتۋى مۇمكىن، ودان ساق بولايىق اعايىندار! ىشكى جانجال تۋعىزۋدى كوزدەيتىن پاسىق ويلى ارانداتۋشىلاردىڭ حالىقتىڭ ادال تالابىنا ىرىتكى سالۋىنا جول بەرمەڭدەر زينھار! بىزگە ەڭ باستىسى ىشكى تاتۋلىق كەرەك، ساياسي تۇراقتىلىق كەرەك، ءوزارا سىيلاستىق پەن تۇسىنىستىك كەرەك! دەموكراتيالىق ينستيتۋتتاردى ءتيىمدى قولدانۋ ارقالى بارلىق ماسەلەنى شەشۋگە بولادى. شەشىلمەيتىن ماسەلە جوق، تەك نيەت بولسا بولدى، نيەت ءتۇزۋ بولسا بولدى!

مۇرتازا ءجۇنىسۇلى

Abai.kz