قاڭتار ايىنىڭ ەكىسى كۇنى جاڭاوزەن حالقى قالانىڭ ورتالىق كوشەلەرىنە شىعىپ، گاز باعاسىنىڭ تىم قىمباتتاپ كەتۋىنە نارازىلىق ءبىلدىردى. جاڭاوزەندە باستالعان نارازىلىق تۇتاس باتىس وڭىرىندە جالعاسىپ تابۋدا. اقتاۋ، ورال، اتىراۋ حالقى دا قىمباتشىلىققا قارسى نارازىلىق اكتسيالارىن وتكىزىپ جاتىر. 

ءۇشى كۇنى جالعاسىن تاپقان نارازىلىق اكتسيالارى، ءتورتى كۇنى كۇشەيدى. ورال مەن اتىراۋ وڭىرلەرىندەگى نارازىلىققا شىققاندار سانى ارتتى. مۇناي كەن ورىندارىنىڭ جۇمىسشىلارى "ماڭعىستاۋمەن بىرگەمىز" جانە "گاز باعاسىن ءتۇسىرسىن" دەگەن ۇرانمەن جۇمىس ورىندارىن تاستاپ كەتتى. مىڭداعان جۇمىسشى اقتاۋ جانە جاڭاوزەن ورتالىعىنداعى نارازىلىق اكتسيالارىنا قوسىلۋعا اتتانعان. قازىرگى ۋاقىتتا تەڭىز (تەنگيز), قالامقاس كەن ورنىنىڭ جۇمىسشىلارى نارازىلىققا قوسىلعانى ايتىلۋدا.

نارازى حالىقتىڭ سانى ناقتى قانشا ەكەنى بەلگىسىز. اقپارات كوزدەرى 4-16 مىڭ اراسىندا دەپ كورسەتەدى. نارازى حالىقپەن كەلىسسوز جۇرگىزۋ ءۇشىن ارنايى ۇكىمەت جاساقتاعان كوميسسيا ماڭعىستاۋ وڭىرىنە كەلدى. نارازى حالىق وكىلدەرىنىڭ اراسىندا پرەزيدەنت كەلسىن دەگەن تالاپتى دا ايتۋشىلار بار.

Abai.kz