ەرلان قانداي مىقتى ازامات ەدى. كونە ءداۋىر تاريحى مەن مادەنيەتىنە دەگەن قىزىعۋشىلىعىن سوزبەن جەتكىزۋ مۇمكىن ەمەس-تۇعىن. دالاعا جۇرۋگە قولايلى “تەمىر تۇلپارىن” تىزگىندەپ الىپ، تاريحي ورىندارعا ساياحاتقا شىعۋعا ءار كەز دايىن تۇراتىن. ەكەۋمىزدىڭ جولىمىز ۇنەمى تاريحي جەرلەردە توعىساتىن. كوڭىلى جارقىن، جۇرەگى تاپ-تازا جارقىراعان ازاماتتان قاپىدا ايرىلىپ قالىپ اڭىراپ وتىرمىز، اعايىن.

اسحات دوسىمنىڭ ايتۋىنشا، ول كوشەدە مۇلىكتەردى توناۋشىلارعا قارسى كۇرەسىپ، قوعامدىق ەرىكتى رەتىندە ءتارتىپ كۇزەتىپ كەشكە دەيىن جۇرەدى. ۇيگە قايتىپ كەلە جاتقاندا قۇقىق قورعاۋ ورگاندارى توقتاتىپ، تەكسەرەدى. قالتاسىنان پىشاق تابىلادى. ءوز-ءوزىن قورعاۋ ءۇشىن الىپ شىققان عوي.
مىنە، قۇقىق قورعاۋ ورگاندارىنا دايىن “تەرروريست”! تەك مويىنداتسا، بولدى. ال ءبىز بىلەتىن ەرلان بار بولمىسىمەن تەرروريزمگە، ءدىني راديكاليزمگە قارسى ادام.

قۇقىق قورعاۋ ورگاندارى ۇستاپ اكەتكەننەن كەيىن “جوعالدى” دەپ ىزدەۋ سالىپتى. تۋىستارى ەمەس. ارتىنان دەنەسى جالاڭاش دالادان تابىلعان. ەرلاننىڭ سوققىعا جىعىلعانى سونشا ءمايىتتى الۋعا بارعان دوسى ءا دەگەندە ءتىپتى تانىماي قالىپتى. ءىسىنىپ، كوگەرىپ كەتكەن. وق تا ءتيىپ جارالانعان. اياعىندا ءبىر جاپىراق ەتى يت قاۋىپ العانداي جۇلىنىپ قالعان. قولىنداعى كىسەنى دە شەشىلمەگەن دەيدى. ماسقارا ەندى. جان-دۇنيەڭىزدى تۇرشىكتىرەدى. ونىڭ ۇستىنە، ەرلاننىڭ جارقىن بەينەسىن تانيتىن بولساڭىزدار، وكىنىش وزەكتى ورتەيدى. كوزدى جاس، كوڭىلدى قايعى باستى.

ءومىر بويى تەرروريزممەن كۇرەسكەن ەرلان باۋىرىمىزدىڭ رۋحى شات بولسىن! و دۇنيەدەگى ءور رۋحتى بابالارىمىزبەن قاۋىشىپ جاتقان بولار.
سەنى قورعاي الماعان، ساقتاي الماعان بىزدەي پاقىرلاردى كەشىر…

ارمان اۋباكىر

Abai.kz