2021 جىلدىڭ 28 جەلتوقسانىنان بەرى باسپاسوزگە بىردە-ءبىر مارتە كورىنبەگەن ەكس-پرەزيدەنت نۇرسۇلتان نازارباەۆ بۇگىن Elbasy.kz سايتى ارقىلى قازاقستان حالقىنا ۇندەۋ جاريالادى.

«قۇرمەتتى وتانداستار! ارداقتى اعايىن!

2022 جىل حالقىمىز ءۇشىن كۇردەلى دە قاتەرلى سىناقتان باستالدى. بارشاڭىزعا ءمالىم، ۇيىمداسقان ەكسترەميستىك توپتار ەلىمىزدە جاپپاي تارتىپسىزدىك ورناتىپ، تەرروريستىك شابۋىل جاسادى. سونىڭ سالدارىنان بەيبىت تۇرعىندارىمىز زارداپ شەكتى.

قاسىرەتتى وقيعا كەزىندە قازا بولعانداردىڭ جاقىندارى مەن تۋعان-تۋىستارىنىڭ قايعىسىنا ورتاقتاسىپ، كوڭىل ايتامىن. لاڭكەستەر ەلدىگىمىز بەن ەگەمەندىگىمىزگە، تىنىشتىعىمىز بەن تۇتاستىعىمىزعا قاۋىپ ءتوندىرىپ، جۇرتتىڭ بەرەكەسىن قاشىردى.

پرەزيدەنتىمىز قاسىم-جومارت كەمەلۇلى توقاەۆتىڭ شۇعىل شەشىمدەرىنىڭ ارقاسىندا ەل ىرگەسى سوگىلگەن جوق. مەملەكەت باسشىسىن قولداۋ – بارشامىزدىڭ ازاماتتىق بورىشىمىز. ەندىگى كەزەكتە وسى وقيعادان ساباق الىپ، مۇنداي باسسىزدىققا جول بەرمەۋگە ءتيىسپىز.

بابالارىمىز عاسىرلار بويى اڭساعان تاۋەلسىزدىكتىڭ وتىز جىلى ىشىندە اتقارعان ىستەرىمىز از ەمەس. قازاقستان الەمگە تانىلعان ەڭسەلى ەلگە اينالدى. ۇلان-عايىر شەكارامىز تۇبەگەيلى بەكىتىلدى. ەلىمىزدە ىرگەلى رەفورمالار جۇزەگە اسىپ، ورتالىق ازيادا كوش باستادىق. ەۋرازيا جۇرەگىندە، سارىارقا توسىندە جاڭا استانامىز بوي كوتەردى. بىرلىك باردا ەشبىر جاۋ ساعىمىزدى سىندىرا الماس»، - دەدى نۇرسۇلتان نازارباەۆ.

قازاقستاننىڭ بۇرىنعى پرەزيدەنتى نۇرسۇلتان نازارباەۆ سوڭعى رەت 2021 جىلدىڭ 27-28 جەلتوقسانىندا پەتەربوردا وتكەن تمد ەلدەرى باسشىلارىنىڭ بەيرەسمي جيىنىندا ەفيردەن كورىندى. سودان بەرى بىردە-ءبىر مارتە باسپاسوزگە شىقان جوق. ونىڭ (نازارباەۆتىڭ) قاۋىپسىزدىك كەڭەسىنىڭ تىزگىنىن پرەزيدەنت توقاەۆقا تاپسىرىپ بەرگەنى تۋرالى اقپارات 5 قاڭتار كۇنى جاريا بولدى. ال كۇللى الەم جۇرتى اڭگىمە ەتكەن «قاڭتار وقيعاسى» مەن ودان كەيىنگى ەلىشىلىك اۋىس-تۇيىستەر، ساياسي وزگەرىستەرگە قاتىستى ەكس-پرەزيدەنت نۇرسۇلتان نازارباەۆ ەش پىكىر بىلدىرمەگەن ەدى.

نازارباەۆ ءوزىنىڭ بۇگىنگى ۇندەۋىندە دە ەلىشىلىك ساياسي وزگەرىستەر مەن اۋىس-تۇيىستەر تۋرالى ەشتەڭە ايتپاعان. Elbasy.kz سايتى نازارباەۆتىڭ قازاق جانە ورىس تىلىندەگى ۇندەۋىن جاريالادى. اتالعان ۇندەۋدىڭ ورىس تىلىندەگى نۇسقاسىندا قازاق تىلىندە ايتىلماعان ءبىرلى-جارىم ءسوز بار ەكەن. وندا ەلدەگى بيلىك ىشىندەگى تارتىستار مەن نازارباەۆتىڭ شەتەلگە كەتۋى تۋرالى سوزدەرگە جاۋاپ بەرىلگەن.

«ماعان قويىلىپ جاتقان كوپتەگەن سۇراقتار مەن باسپاسوزدە جاريالانىپ جاتقان ماسەلەلەرگە جاۋاپ بەرە كەلە ايتارىم: مەن 2019 جىلى پرەزيدەنتتىك قۇزىرەتتى قاسىم-جومارت توقاەۆقا تاپسىرىپ بەرگەنمىن. سودان بەرى زەينەتكەرمىن. قازىر زاڭدى ەڭبەك دەمالىسىندامىن. ەشقايدا كەتكەن جوقپىن، استانادامىن»، - دەپ مالىمدەدى نازارباەۆ.

وسىعان دەيىن نازارباەۆ قايدا دەگەن سۇراق قازاقستاندىق جانە شەتەلدىك باق-تا قىزۋ تالقى بولعان. بىرىككەن اراب امىرلىكتەرى مەن قىتاي حالىق رەسپۋبليكاسى سىرتقى ىستەر مينيسترلىگى دەڭگەيىندە بۇل سۇراققا جاۋاپ بەرىپ، نۇرسۇلتان نازارباەۆتىڭ ءوز ەلدەرىنە كەلمەگەنىن رەسمي مالىمدەپ ۇلگەرگەن.

«ەلدىڭ بيلىگى تولىقتاي پرەزيدەنت قاسىم-جومارت توقاەۆتا. ول قاۋىپسىزدىك كەڭەسىنىڭ توراعاسى. جۋىق ارادا پرەزيدەنت توقاەۆ «نۇر وتان» پارتياسىنىڭ توراعاسى بولىپ سايلانادى. سوندىقتان، ەليتا ىشىندە ەشقانداي تارتىستار مەن قاقتىعىس جوق. بۇل جونىندەگى الىپ-قاشپا اڭگىمەلەر نەگىزسىز. بارشاڭىزعا بەلگىلى، مەن 30 جىل ەلىمىزدىڭ گۇلدەنۋى جولىندا تىنباي جۇمىس ىستەدىم. پروگرەسسيۆتى رەفورمالار جۇرگىزدىك. شەكارامىزدى بەكىتتىك»، - دەيدى نۇرسۇلتان نازارباەۆ.

Abai.kz