قازاقستان حالقى بەلشەسىنەن قارىزعا باتقان. سوڭعى ءبىر جىلدا قارىز كولەمى ەسەلەپ ارتقان جانە وعان پاندەميالىق شەكتەۋلەر، شەكارانىڭ جابىق بولۋى، ەكونوميكالىق داعدارىس تا ءوز اسەرىن تيگىزگەن. قارىزدىڭ باسىم بولىگى ەل حالقى العان تۇتىنۋشىلىق نەسيەلەرگە تيەسىلى. 

ءبىرىنشى نەسيە بيۋروسىنىڭ مالىمەتى بويىنشا، 2022 جىلعى 1 قاڭتارداعى جاعداي بويىنشا قازاقستاننىڭ بولشەك نەسيە پورتفەلى 10,76 ترلن تەڭگەنى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 42,9%-عا ارتىق دەگەن ءسوز. بولشەك پورتفەلدىڭ باسىم بولىگىن تۇتىنۋشىلىق قامتاماسىز ەتىلمەگەن نەسيەلەر – 5,28 ترلن تەڭگە (48,3%), يپوتەكالىق نەسيەلەۋ – 3,39 ترلن تەڭگە (31,4%), اۆتونەسيە – 1,09 ترلن تەڭگە (10,6%), نەسيە كارتالارى – 348,3 ملرد تەڭگە (3,2% ) جانە قامتاماسىز ەتىلگەن تۇتىنۋ نەسيەلەرى – 498,3 ملرد.تەڭگە (5,1%) قۇرايدى.

جالپى العاندا، 2021 جىلى جەكە تۇلعالارعا بەرىلگەن نەسيەلەردىڭ كولەمى 2020 جىلمەن سالىستىرعاندا 83,6%-عا نەمەسە 4,1 ترلن تەڭگەگە ۇلعايىپ، 8,9 ترلن تەڭگەنى قۇرادى. بارلىعى 25,67 ملن ​​كەلىسىمشارت جاسالدى (2020 جىلمەن سالىستىرعاندا +68,3%-عا ارتىق), قارىز الۋشىلاردىڭ جالپى سانى 6,16 ملن قارىز الۋشىنى (+28,4%) قۇراعان.

كەپىلسىز بەرىلگەن تۇتىنۋشىلىق نەسيەلەر 5,45 ترلن تەڭگەنى قۇراپ، وتكەن جىلمەن سالىستىرعاندا 86,1 پايىزعا وسكەن. نەسيە كارتالارى 95,2%-عا (401,5 ملرد. تەڭگەگە دەيىن) ءوستى. ساراپشىلار نەسيەلەندىرۋدىڭ ءوسۋىن باسقالارمەن قاتار، حالىق اراسىندا ءبولىپ تولەۋ جوسپارىنىڭ تانىمال بولۋىمەن، سونداي-اق پاندەميا كەزەڭىنىڭ اسەرىمەن بايلانىستىرادى. ءبولىپ تولەۋدىڭ ارتۋى حالىق تابىسىنىڭ ازايۋى دەگەن ءسوز.

كولىك قۇرالدارىن ساتىپ الۋعا نەسيەلەر (سونىڭ ىشىندە كەپىلسىز) 592,2 ملرد تەڭگەگە (+57,5%) بەرىلدى. وڭىرلەر تۇرعىسىنان العاندا بولشەك نەسيەلەردىڭ ايتارلىقتاي كولەمى الماتى، نۇر-سۇلتان قالالارىنا، سونداي-اق الماتى جانە تۇركىستان وبلىستارىنا تيەسىلى، اتالمىش وڭىرلەر 2021 جىلى جالپى كولەمنىڭ 44%-ىن قۇراعان.

ءبىرىنشى نەسيە بيۋروسىنىڭ مالىمەتى بويىنشا، 2022 جىلعى 1 قاڭتارداعى جاعداي بويىنشا بەرىلگەن يپوتەكالىق نەسيەلەر 1,92 ترلن تەڭگەنى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 77,7%-عا ارتىق. زەينەتاقى رەفورماسى يپوتەكاعا ايتارلىقتاي سۇرانىس تۋعىزعان دەيدى ماماندار.2021 جىلى قوردىڭ مالىمەتىنشە، تۇرعىن ءۇي جاعدايىن جاقسارتۋ ماقساتىندا بجزق-دان 2,5 ترلن تەڭگە شىعارىلعان. بۇل قاراجاتتىڭ 68,5%-ى تۇرعىن ءۇي ساتىپ الۋعا، 15,3%-ى – يپوتەكالىق نەسيەنى وتەۋگە جانە 16,2%-ى – وزگە دە ماقساتتارعا باعىتتالعان. ۇلتتىق ستاتيستيكا بيۋروسىنىڭ مالىمەتى بويىنشا، 2021 جىلدىڭ سوڭىندا تۇرعىن ۇيمەن جاسالعان مامىلەلەردىڭ سانى 606 مىڭنان اسقان.

وسىلايشا قازاقستاندىقتار 2021 جىلى نەسيەگە بەلشەسىنەن باتقانى كورىنىپ-اق، تۇر. ال قوعامدا نەسيەنى كەشىرۋ نەمەسە پايىزىن ازايتۋ تۋرالى ۇسىنىستار ارتتى.

Abai.kz