«قازاقستان ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ اقپان ايىندا وتەتىن XXIV قىسقى وليمپيادا ويىندارىنا سپورت تۇرلەرىنەن 87 ليتسەنزيا بەرىلگەنىن مالىمدەدى.

«وسى اپتادا باسقا سپورت تۇرلەرى بويىنشا ناقتىلانادى. ليتسەنزيالاردىڭ باسىم بولىگىن شاڭعىشىلار (35), كونكيمەن جۇگىرۋشىلەر (12) جانە بياتلونشىلار (12) جەڭىپ الدى»، - دەيدى اندرەي كريۋكوۆ.

شورت-ترەك بويىنشا – 9, فريستايل-اكروباتيكادان – 4, فريستايل-موگۋلدان – 6, ترامپليننەن شاڭعىمەن سەكىرۋدەن – 4, تاۋ شاڭعىسى سپورتىنان – 3 جانە شاڭعى ءۇشسايىسى بويىنشا – 3 ليتسەنزيا بەرىلگەن.

«اقپاننىڭ تورتىندە باستالاتىن وليمپيادا ويىندارىنا الەمنىڭ 95 ەلىنەن 4 مىڭنان استام سپورتشى قاتىسادى. 109 مەدال جيىنتىعى ساراپقا سالىنادى. بەيجىڭدەگى وليمپيادا قۇرامىندا 34 سپورتشىمىز بار»، - دەيدى كوميتەتتىڭ باس حاتشىسى.

قازىرگى ۋاقىتتا سپورتشىلار كارانتينگە بايلانىستى وقشاۋلانىپ، سپورت دايىندىعىن جۇرگىزۋدە. ولاردىڭ ەكى توبى قازاقستاندا بولسا، ۇشەۋى شەتەلدە ورنالاسىپتى.

ءتورت جىلدا ءبىر وتكىزىلەتىن قىسقى وليمپيادا ويىندارى 2018 جىلى وڭتۇستىك كورەيانىڭ پحەنچان قالاسىندا ءوتتى. وندا 92 ەلدەن 2922 سپورتشى قاتىسقان بولاتىن.

سونىڭ ىشىندە قازاقستاننان 4 سپورت تۇرىنەن 44 سپورتشى قاتىستى. بۇل جارىسقا ورتالىق ازيا ەلدەرى اراسىنان قازاقستان جالعىز قاتىسقان بولاتىن. فريستايل سپورتىنان يۋليا گالىشەۆا – قولا مەدال يەلەندى. وكىنىشكە وراي، قازاقستان قىسقى وليمپيادادا جارقىراپ كورىنە المادى. ال، ءبارىن باسىپ وزعان نورۆەگيا بارلىعى 39 مەدالدى جەڭىپ السا، كەيىنگى كەزەكتە گەرمانيا – 31, كانادا -29 مەدالدى قورجىنىنا سالدى. ال، رەسەي بارلىعى 17 مەدالمەن 13 ورىندا تۇرسا، قىتاي بارلىعى 9 مەدالمەن 16 ورىندى يەلەندى.

2018 جىلعى قىسقى وليمپياداعا 2014 جىلعى 7-23 اقپان ارالىعىندا سوچيدە وتكەن مانەرلەپ سىرعاناۋدان قولا جۇلدەنى يەلەنگەن دەنيس تەن دە قاتىسۋى كەرەك ەدى. قىسقى سپورت تۇرىنەن قازاقستاندى الەمگە تانىتىپ كەلە جاتقان جاس سپورتشىنىڭ مەزگىلسىز قازاسى قازاق سپورتىن قانسىراتىپ كەتتى. 2014 جىلى سوچي وليمپياداسىنا قاتىسقان 58 سپورتشىنىڭ ىشىنەن دەنيس تەن عانا قولا جۇلدەنى الىپ كەلدى.

جالپى العاندا، بۇرىن بولعان قىسقى وليمپيادا ويىندارىنىڭ تاريحىنا قاراساق قازاقستان ءبىر نەمەسە ەكى مەدالعا يە بولادى. دەگەنمەن، بەيجىڭدە وتەتىن قىسقى وليمپيادادا مەدال سانى ارتادى دەگەن ۇمىتتەمىز.

ايجان تەمىرحان

Abai.kz