تۇرعىن ءۇي جالداۋ اقىسىن بيۋدجەت ەسەبىنەن سۋبسيديايلاۋ شاراسى 10 جىلدا 500 مىڭنان استام قازاقستاندىقتىڭ باسپانا ماسەلەسىن شەشەدى. قر ۇكىمەت باسشىسى ءاليحان سمايىلوۆ ۇكىمەت وتىرىسىندا وسىنداي مالىمەت كەلتىردى. 

«ازاماتتاردىڭ ءال-اۋقاتىن جاقسارتۋ مەملەكەتتىك ساياساتتىڭ ەڭ ماڭىزدى مىندەتى بولىپ تابىلادى. وسى مىندەتكە جەتۋدىڭ باسىم باعىتتارىنىڭ ءبىرى – ول تۇرعىن ءۇيدىڭ قولجەتىمدى بولۋى. جالپى قۇرىلىس سالاسى جىل سايىن وڭ ديناميكا كورسەتىپ، ءوسىپ كەلەدى. وتكەن جىلدىڭ قورىتىندىسى بويىنشا 17,1 ملن شارشى مەتر ءۇي سالىندى. تۇرعىن ءۇي قۇرىلىسىنا شامامەن 2,4 ترلن تەڭگە ينۆەستيتسيا تارتىلدى. سوعان قاراماستان، قاراپايىم ازاماتتاردىڭ باسىم بولىگىنىڭ باسپاناعا قولى جەتپەي ءجۇر»، - دەدى ۇكىمەت باسشىسى.

مۇندا «وتباسى بانككە» ەرەكشە رول بەرىلەدى. ول باسپاناعا مۇقتاج ادامداردىڭ كەزەگىن قالىپتاستىرۋ جانە ولارعا جەڭىلدىكتى تۇرعىن ۇيلەردى ساتۋ بويىنشا بىرىڭعاي وپەراتور بولادى»، - دەگەن ءاليحان سمايىلوۆ ازاماتتارعا ءۇي ساتىپ الۋ ءۇشىن زەينەتاقى جيناقتارىنىڭ ءبىر بولىگىن «وتباسى بانكىندەگى» دەپوزيتتەرگە سالۋ مۇمكىندىگى بەرىلگەنىن ەسكە سالدى.

«زاڭنامانى رەفورمالاۋ اياسىندا تۇرعىن ءۇيدى كىرىسىنە قاراي ساتۋ، ارەندالىق تولەمدەردىڭ ءبىر بولىگىن سۋبسيديالاۋ جانە اۋىلدى جەرلەردە تۇرعىن ءۇي سالۋ مەحانيزمدەرى ەنگىزىلەدى.

سونىمەن قاتار، مەملەكەت باسشىسىنىڭ تاپسىرماسىنا سايكەس، ارەندالىق تولەمنىڭ ءبىر بولىگىن سۋبسيديالاۋ مەحانيزمىن ەنگىزۋ تۋرالى شەشىم قابىلداندى.

شامامەن باسپاناعا مۇقتاج 70 مىڭنان استام وتباسى وسى مەحانيزممەن قامتىلادى. ولار جالداۋ اقىسىنان ۇنەمدەلگەن قاراجاتتى ءۇي ساتىپ الۋعا جيناي الادى.

جالپى جاڭا تاسىلدەر 10 جىل ىشىندە تۇرعىن ءۇي كەزەگىندە تۇرعان جارتى ميلليوننان استام ادامنىڭ باسپانا ماسەلەسىن شەشۋگە جانە مەملەكەتتىك قولداۋدىڭ ادىلەتتى، اشىق ءارى قولجەتىمدى جۇيەسىن جاساۋعا مۇمكىندىك بەرەدى»، - دەدى پرەمەر-مينيستر.

Abai.kz