ەنەرگەتيكا ءمينيسترى بولات اقشولاقوۆ قازاقستانداعى اتوم ەلەكتر ستانتسياسىنىڭ قۇرىلىسى تۋرالى ايتتى.

"اەس سالۋ - وتە كۇردەلى ماسەلە، سوندىقتان سالامىز با، جوق پا ەشقانداي شەشىم جوق. 2035 جىلعا دەيىنگى بولجامدى تەڭگەرىمدە ءارتۇرلى ماسەلەلەر قارالادى. بۇگىندە "جاسىل" ساياسات جۇرگىزىلىپ جاتقاندىقتان، كۇن تارتىبىندە شەكتەۋلەر تۇر جانە ت.ب. ءبىز كومىر ءوندىرۋدى كەڭەيتە الماي وتىرعانىمىزدى بىلەسىزدەر، ويتكەنى ول ەكولوگيالىق تازا ەمەس", - دەدى ۆەدومستۆو باسشىسى وقك ونلاين بريفينگىندە.

سونىمەن قاتار، مينيستر گەنەراتسياعا ارنالعان وتپەلى وتىن رەتىندەگى گاز تازا ەكەنىن، بىراق ونىڭ قورى شەكتەۋلى ەكەنىن ايتتى.

"سوندىقتان ءبىز ءارتۇرلى نۇسقانى قاراستىرىپ جاتىرمىز. اتوم ەلەكتر ستانتسيالارى – قاراستىرۋعا بولاتىن نۇسقالاردىڭ ءبىرى عانا. بىراق بۇل ماسەلە وتە نازىك، ول ءبىرىنشى كەزەكتە قوعامدى تارتا وتىرىپ، بارىنشا زەرتتەۋدى قاجەت ەتەدى. ازىرگە قازاقستاننىڭ قانداي دا ءبىر ۋچاسكەسىندە ستانتسيا سالۋ بويىنشا ناقتى شەشىمدەر جوق", - دەپ قوستى بولات اقشولاقوۆ.

بولات اقشولاقوۆ 11 قاڭتاردا قازاقستاننىڭ ەنەرگەتيكا ءمينيسترى بولىپ تاعايىندالعان ەدى.

Abai.kz