بۇگىن ءماجىلىس سپيكەرى ەرلان قوشانوۆتىڭ توراعالىعىمەن پالاتا بيۋروسى ءوتتى.

وتىرىستى اشقان ءماجىلىس توراعاسى دەپۋتاتتاردىڭ سايلاۋشىلارمەن كەزدەسۋى ءۇشىن وڭىرلەرگە ساپارعا شىعۋى تۋرالى ايتتى.

الدا تۇرعان جۇمىستىڭ ماڭىزدىعىنا توقتالعان ەرلان قوشانوۆ وڭىرلەرگە ساپارلار جاڭارتىلعان فورماتتا ۇيىمداستىرىلۋى ءتيىس ەكەنىن العا تارتىپ، دەپۋتاتتار وزدەرى جاقسى بىلەتىن، ەڭ باستىسى، وزدەرىن قابىلدايتىن جانە ماقساتتى اۋديتورياسى بار ايماقتارعا بارۋى كەرەكتىگىن جانە حالىقپەن كەزدەسۋلەرى تەك وبلىس ورتالىقتارى مەن ءىرى قالالاردا عانا ەمەس، اۋىلدىق جەرلەردە دە وتكىزىلۋى قاجەتتىلىگىن اتاپ ءوتتى.

سونداي-اق، ءماجىلىس توراعاسى دەپۋتاتتاردىڭ باستى نازارىندا، مەملەكەت باسشىسى قاسىم-جومارت توقاەۆتىڭ جاڭا باستامالارى، ونىڭ ىشىندە، جۋىق ارادا عانا وتكەن قايعىلى وقيعالار سالدارىنان ەلدەگى الەۋمەتتىك-ەكونوميكالىق جاعدايدى تۇراقتاندىرۋ تۋرالى بولاتىنىن ايتتى.
ودان ءارى ءماجىلىستىڭ بيۋرو وتىرىسى بارىسىندا دەپۋتاتتار تالقىلاۋىنا قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن I وقىلىمدا قاراۋ ۇسىنىلدى.

جۇمىس بارىسىندا دەپۋتاتتار بىرقاتار تۇزەتۋلەر ەنگىزدى. اتاپ ايتقاندا، قۇقىق قورعاۋ قىزمەتكەرلەرىنىڭ ەڭبەگىنە اقى تولەۋ، ولاردىڭ الەۋمەتتىك جانە قۇقىقتىق قورعالۋىن ارتتىرۋ، سونداي-اق، زەينەتاقىمەن قامتاماسىز ەتۋگە، قۇقىق قورعاۋ ورگاندارى قىزمەتكەرلەرىنىڭ تۇرعىن ءۇي قاتىناستارىن رەتتەۋ ەرەكشەلىكتەرىنە قاتىستى ماسەلەلەر قاراستىرىلعان.

سونىمەن قاتار بيۋرو وتىرىسىندا ءماجىلىس توراعاسى ەرلان قوشانوۆ پالاتا اپپاراتىنىڭ جاڭا باسشىسى رەنات قۇرمەتجانۇلى ايتاەۆتى تانىستىردى. ول بۇعان دەيىن قازاقستان رەسپۋبليكاسى اكىمشىلىك باسشىسى حاتشىلىعىنىڭ مەڭگەرۋشىسى قىزمەتىن اتقارعان.

Abai.kz