وسىعان دەيىنگى قالىپتاسقان ءتيىمسىز باسقارۋ جۇيەسىن وزگەرتۋ كەرەكتىگى انىق. بىراق قالاي جانە قانداي جولمەن؟

ونىڭ 2 جولى بار، ءبىرىنشىسى كوتەرىلىس ارقىلى وزگەرتۋ. بۇنى تاڭداماس بۇرىن كوتەرىلىس دەگەننىڭ نە ەكەنىن دۇرىستاپ ءتۇسىنىپ الۋىمىز قاجەت.

ەشبىر اۆتوريتارلىق ەلدە بيلىك ءوز ەركىمەن نەمەسە از شىعىنمەن كەتپەيدى. كۇشتىك قۇرىلىمدار ءجاي ادامداردى، ءجاي ادامدار ولاردى ايامايدى. ەكى جاقتان دا توگىلەتىن قان، قيىلعان ومىرلەر، بالاسىن جوعالتىپ زارلاعان انالار مەن كۇڭىرەنگەن اكەلەر، ورتەنگەن ۇيلەر جانە قيراعان قالالار. ولگەننەن كەيىن مورگتەن قاشىپ كەتەتىن زومبي تەرروريستەر كينودان شىن ومىرگە اۋىسادى. سوعىس ءھام حاوس.

سوندىقتان جىلى جەردە وتىرىپ اتتانداماس بۇرىن 4 جاسار پەرىشتەنىڭ ماڭدايىن تەسكەن وق ءسىزدى، نەمەسە تۋىسىڭىزدى ايايدى دەپ ويلاماڭىز جانە ادام قۇقىقتارى دەگەننىڭ نە ەكەنىن بىلمەيتىن ەلدەن باسقاشا نارسە كۇتپەڭىز.
تىرىلەر ومىرىنەن، جۇمىسى بارلار جۇمىسىنان، نانى بارلار نانىنان ايىرىلادى. سۋ، توق، گاز دەگەندەر ناعىز پروبلەماعا اينالادى. سالىق جينالماي، مەملەكەت جالاقى مەن پەنسيانى بەرە المايدى. شەتتەن كەلەتىن ينۆەستيتسيا مەن ەكسپورت توقتايدى، قىسقاسى ەكونوميكالىق كوللاپس، اشتىق.

ال ەگەر كوتەرىلىسشىلەر بيلىكتى باسىپ السا جوعارى ورىندارعا كوبىنە ناعىز مامانداردان كورى كوبىنە كىم كوتەرىلىستە بەلسەندىرەك بولدى سولار وتىرادى، بارلىق ەلدەردە سولاي بولدى. بىراق بەلسەندى كوتەرىلىسشى بولۋ ناعىز مامان بولۋ دەگەندى بىلدىرمەيدى. سۋ جاڭا جەمقورلار ەسكى جەمقورلاردىڭ ورنىن باسادى.

بيلىك جۇيەسىن وزگەرتۋدىڭ ەكىنشى جولى ۇزاعىراق، بىراق ەڭ ءتيىمدىسى وسى جول. بۇل - ءبىلىم جۇيەسىن دامىتۋ ارقىلى ەلدى العا سۇيرەيتىن ۇرپاق ءوسىرىپ شىعارۋ. ولاردىڭ ساناسى بىزدەن مۇلدەم باسقا بولۋى كەرەك. ولاردىڭ ومىرلىك ميسسياسى قاي جەردەن جەپ كەتۋ ەمەس، ەلدى دامىتۋ بولادى. ناعىز ەلىن سۇيگەن پاتريوتتار، جۇمىسشىلار، پوليتسەيلەر، عالىمدار جانە ناتيجەلى باسقارۋشىلار. ءوز مۇددەسىن ەمەس، ەل مۇددەسىن ويلاۋشىلار. ءوز ءتىلىن، تاريحىن، ۇلتتىق مادەنيەتىن سۇيۋشىلەر.

بۇنداي ۇرپاق ءوسىرىپ شىعارۋ ءۇشىن ەڭ الدىمەن جاڭا دەڭگەيدەگى مىڭداعان مۇعالىمدەر قاجەت، سەبەبى ەلدىڭ بولاشاق ازاماتتارى 11 جىل سولاردىڭ ءبىلىمىن، تاربيەسىن الادى. تاربيەمەن بەرىلگەن بىلىمنەن ارتىق ەش نارسە جوق.
جوعارىدا ايتىلعان ەكىنشى جولدى دۇرىس دەپ تاڭداعان بىزدەر بولاشاق مۇعالىمدەردى دايىندايتىن MDS جوباسى ارقىلى تىرىسۋدامىز. بۇل جوبا-بولاشاق دامىعان قازاق ەلىنىڭ ىرگەتاسى. ەلىمىزدىڭ جۇزدەگەن ازاماتتارى اتسالىسۋدا، بىرەۋ قارجىلاي، بىرەۋ ەڭبەگىمەن دەگەندەي.

مەن بوسقا ءومىر سۇرگىم كەلمەيدى، ءومىرىمنىڭ ءمانى بولعانىن قالايمىن. ەلىمنىڭ جارقىن بولاشاعىنا ۇلەسىمدى قوسقىم كەلەدى. قازىر ارەكەت جاساماساق بولاشاق ۇرپاققا قانداي ەل قالدىرامىز؟

ارمان راحمەت

Abai.kz