قر پرەمەر-ءمينيسترىنىڭ ورىنباسارى
ە.ل. توعجانوۆقا:

قۇرمەتتى ەرالى لۇقپانۇلى!

دۇنيەجۇزى قازاقتارىنىڭ قاۋىمداستىعىنا قاتىستى تومەندەگى ەكى ماسەلە بويىنشا وسى «اشىق حاتتى» جازىپ وتىرمىن.

ءبىرىنشى، الماتى قالاسى، شوقان ءۋاليحانوۆ كوشەسى، 43 ا مەكەجايعا ورنالاسقان «دۇنيەجۇزى قازاقتارى قاۋىمداستىعىنىڭ ءۇيى» بار. اتالعان ەڭسەلى ءۇي 1997 جىلى ۇكىمەت قاراجاتىنا سالىنعانى بەلگىلى.

«eGov» پورتالىنداعى مالىمەتكە قاراعاندا، دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى تالعات ماماشەۆ بولىپ تۇرعان كەزدە، اتالعان ءۇيدىڭ توعىز قۇرىلتايشىسى بولعان ەكەن. ال، قاۋىمداستىققا زاۋىتبەك تۇرىسبەكوۆ توراعانىڭ ءبىرىنشى ورىنباسارى بولىپ تاعايىندالعاننان كەيىن، بۇل ءۇيدىڭ قۇرىلتايشىلار كۇرت سانى كوبەيگەن.

ارينە، قۇرىلتايشىلىققا قاۋىمداستىق باسشىسىنىڭ رۋقساتىنسىز ەشكىمنىڭ كىرە المايتىنى انىق. تەك، زاۋىتبەك قاۋىسبەكۇلىنىڭ جاقىن ادامدارى كىرگەن بولۋى مۇمكىن. ەستۋگە قاراعاندا، قاۋىمداستىقتىڭ قازىرگى باسشىلارى ول ءۇيدى كاسىپكەرلەرگە جالعا بەرىپ، اقشا تاۋىپ وتىر ەكەن.

ءوزىڭىز بىلەسىز، بيىل – دۇنيەجۇزى قازاقتارىنىڭ التىنشى قۇرىلتايى اشىلاتىن جىل.

زاۋىتبەك تۇرىسبەكوۆ زەينەتكەر، جاسى 70-تەن استى. كەزەكتى قۇرىلتاي اشىلسا، قاۋىمداستىق باسشىسى اۋىسادى.

سول قۇرىلتاي تاياعان سايىن ءجۇرت بىزگە تەلەفون شالىپ، «دۇنيەجۇزى قازاقتارى قاۋىمداستىعى ءۇيىنىڭ» تاعدىرى نە بولادى، قولدى بولىپ كەتپەي مە دەگەن الاڭداۋشىلىقتارىن بىلدىرۋدە.

ەكىنشى، دۇنيەجۇزى قازاقتارى قاۋىمداستىنىڭ Facebook الەۋمەتتىك جەلىسىندەگى پاراقشاسىنان: «...دۇنيەجۇزى قازاقتارى قاۋىمداستىعى سوڭعى 4 جىل ىشىندە اقمولا، سولتۇستىك قازاقستان جانە تۇركىستان وبلىستارىندا «تۇرعىن ءۇي جانە جۇمىس» باعدارلاماسى اياسىندا «اسار» ادىسىمەن، قانداستارعا ارنالعان كوتتەدج قالاشىقتارىن سالۋ بويىنشا پيلوتتىق جوبالاردى ىسكە اسىرۋدا. 2021 جىلى اقمولا وبلىسىنىڭ ارشالى اۋدانىنداعى اگروقالاشىق جوباسى پراكتيكالىق ىسكە اسىرۋ ساتىسىنا ءوتتى. بۇل جۇمىسقا قر ۇكىمەتىنىڭ اگروقالاشىق ينفراقۇرىلىمىن سالۋعا 450 ملن تەڭگە ءبولۋ تۋرالى شەشىمى ەلەۋلى سەرپىن بەردى. اعىمداعى جىلدىڭ 15 مامىرىنان باستاپ 1282 كوتتەدجدىڭ قۇرىلىسى باستالدى. ...بۇگىنگى تاڭدا كوپتەگەن ادامدار ىرگەتاسىن كوتەردى، قۇرىلىس ماتەريالدارىنىڭ تاپشىلىعى قاراماستان 20-دان استام كوتتەدج سالىندى...»، - دەگەن مالىمەتتى وقىدىق.

كورىپ وتىرسىز، قر ۇكىمەتى اگروقالاشىقتىڭ تەك ينفراقۇرىلىمىن سالۋعا 450 ملن تەڭگە ءبولىپتى. ال، 1282 كوتتەدج سالۋ ءۇشىن از قاراجات كەتپەيتىنى تاعى بەلگىلى.

پرەزيدەنت اكىمشىلىگىنىڭ ارالاسۋىمەن قابىلدانعان قيسىق زاڭداردىڭ كەسىرىنەن حالىقتىڭ الەۋمەتتiك جاعىنان وسال توپتارى رەتىندە كەزەككە تۇرعان 2000-عا جۋىق قانداسىمىزدىڭ باسپانا كەزەگىنەن ادەيى شىعارىلىپ تاستالعانىن جانە ەتنوستىق قازاقتاردىڭ كوشىپ كەلۋى ءۇشىن مەملەكەتتىڭ 2020 جىلى 1378 ادامعا، 2021 جىلى 1426 ادامعا عانا ماردىمسىز كۆوتا ءبولىپ كەلگەنىن ەسكەرسەك، ۇكىمەتتىڭ مۇنداي باتپان قۇيرىقتى – مول قاراجاتتى، ايتىڭىزشى، دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆكە ۇستاتا سالعانىن قالاي تۇسىنۋگە بولادى؟!

ۇكىمەت وسى كوتتەدجدى قالاشىقتى سالۋ ءۇشىن دۇنيەجۇزى قازاقتارى قاۋىمداستىعىنا جالپى قانشا قاراجات ءبولدى؟! ۇكىمەت اقشاسىمەن قاۋىمداستىق جاعىنان سالىنعان ول كوتتەدجدەردىڭ ەرتەڭ باعاسى قانشا بولادى، شەتتەن ورالعان قانداستارىمىزعا ول قانداي تارتىپپەن بەرىلەدى؟!بەردىبەك ساپارباەۆتىڭ باياعىداعى «نۇرلى كوش» جوباسىنىڭ اياعىن قۇشىپ، ول كوتتەدجدەردىڭ سايدا سانى، قۇمدا ءىزى قالماي ما؟!! سونداي-اق، قانداستارىمىزعا ارنالعان قۇرىلىس سالۋ جۇمىسىمەن اينالىسۋ دۇنيەجۇزى قازاقتارى قاۋىمداستىعىنىڭ مىندەتىنە جاتا ما؟! توراعالىقتان باياعىدا كەتكەن تالعات ماماشەۆ قۇرىلتايشىلاردىڭ ىشىندە ءالى نە قىپ ءجۇر؟!

سۇراق كوپ...

قۇرمەتتى ەرالى لۇقپانۇلى!

سىزدەن قر پرەمەر-ءمينيسترىنىڭ ورىنباسارى رەتىندە دۇنيەجۇزى قازاقتارى قاۋىمداستىعىنا قاتىستى وسى سۇراقتاردى ءوز نازارىڭىزعا الىپ، اشىق تەكسەرۋ جۇرگىزۋىڭىزدى جانە ونىڭ ناتيجەسىن جاريالاۋىڭىزدى سۇرايمىن.

اۋىت مۇقيبەك

Abai.kz