كەشە ءماجىلىس دەپۋتاتى ايدوس سارىم ءوزىنىڭ ارىپتەسى، ءماجىلىس دەپۋتاتى ھام ەكس-پرەزيدەنت نۇرسۇلتان نازارباەۆتىڭ ۇلكەن قىزى داريعا نازارباەۆانىڭ ورنىن بوساتىپ، وتستاۆكاعا كەتۋىن تالاپ ەتكەن ەدى.

«قالىپتاسقان احۋالدى ەسكەرە وتىرىپ، ەڭ الدىمەن وسى ەلدىڭ ازاماتى رەتىندە ول ءوز ەركىمەن وتستاۆكاعا كەتۋى ءتيىس. نازارباەۆا «جاڭا قازاقستان» توبىنىڭ قۇرامىنا كىرگەن جوق.

قازاقستاندا قالىپتاسقان اۆتوريتارلى جۇيەنى نازارباەۆانىڭ اتى-جونىمەن بايلانىستىرادى. كۇنى كەشەگى وقيعالار دا وسى جۇيەگە دەگەن قارسىلىقتان تۋىندادى»، – دەيدى سارىم.

ال بۇگىن «egov.press» سايتىندا داريعا نۇرسۇلتانقىزىنىڭ دەپۋتاتتىق مانداتىن تاپسىرىپ، دوعارىسقا كەتۋىن تالاپ ەتكەن ارانيى پەتيتسيا جاريالاندى.

پەتيتسيا اۆتورى – ەرلان امانۇلى دەپ كورسەتىلگەن. «اتالعان مالەسەنى قر ورتالىق سايلاۋ كوميسسياسى شەشە الادى»، - دەگەن پەتيتسياعا قازىردىڭ وزىندە 600-گە جۋىق ادام قول قويىپتى. پەتيتسيا بۇگىن جاريالانعان.

«قازاقستاندا بولعان قڭتار وقيعالارى داريعا نازارباەۆانىڭ اتىمەن تىكەلەي بايلانىستى ەكەنىن ءماجىلىس دەپۋتاتى ايدوس سارىم ايتتى. قازاقستاننىڭ ءبىرىنشى پرەزيدەنتىنىڭ ۇلكەن قىزى – داريعا نازارباەۆانىڭ وتستاۆكاسى ماسەلەسى ءبىرازدان بەرى كۇن تارتىبىندە تۇرعان. الايدا، قر ورتالىق سايلاۋ كوميسسياسىنا نازارباەۆا ەشقانداي رەسمي ءوتىنىش جازباعان.

ونىڭ كومەكشىسىنىڭ ايتۋىنشا، كوروناۆيرۋستان ەمدەلىپ شىققان سوڭ، دەنساۋلىعىنا بايلانىستى ەڭبەك دەمالىسىن العان. ال كەيبىر دەرەككوزدەرى ونىڭ دۋبايدا جۇرگەنىن جازدى.

ءبىز داريعا نازارباەۆانىڭ وتستاۆكاعا كەتۋىن تالاپ ەتەمىز»، - دەپ جازىلعان، پەتيتسيا ماتىنىندە.

«قاسىرەتتى قاڭتار» وقيعاسى باستالعان ساتتەن باستاپ ول ماجىلىسكە مۇلدە كەلگەن جوق. ءوزى «ءلام-ميم» دەپ ەشبىر مالىمدەمە جاساعان جوق. بار بولعانى كومەكشىسى ونىڭ كوروناۆيرۋس جۇقتىرىپ، الماتىدا ەمدەلىپ جاتقانىن حابارلاۋمەن بولدى.

Abai.kz