رەداكتسيادان: 11 اقپان كۇنى Abai.kz اقپاراتتىق پورتالىندا اۋىت مۇقيبەكتىڭ «قاۋىمداستىق قۇرىلىس كومپانياسى ما؟» اتتى ماقالاسى جارىق كورگەن.  قر پرەمەر-ءمينيسترىنىڭ ورىنباسارى ەرالى توعجانوۆتىڭ اتىنا جازىلعان ءۇشبۋ حاتتا دۇنيەجۇزى قازاقتارى قاۋىمداستىعىنىڭ الماتىداعى عيماراتىنا جانە قاۋىمداستىقتىڭ اقمولا، سولتۇستىك قازاقستان جانە تۇركىستان وبلىستارىندا «تۇرعىن ءۇي جانە جۇمىس» باعدارلاماسى اياسىندا «اسار» ادىسىمەن، قانداستارعا ارنالعان كوتتەدج قالاشىقتارىن سالۋ بويىنشا پيلوتتىق جوبالارى تۋرالى، اتاپ ايتقاندا اقمولا وبلىسىنىڭ ارشالى اۋدانىنداعى اگروقالاشىق جوباسى تۋرالى ءسوز بولعان.

Abai.kz ەركىن اقپارات الاڭى. جۋىردا پورتالىمىزدىڭ ەلەكتروندىق پوشتاسىنا تاعابەك بايزاقوۆ ەسىمدى ازاماتتان اقمولا وبلىسىنىڭ ارشالى اۋدانىنداعى اگروقالاشىق تۇرعىندارىنىڭ جاۋاپ حاتى كەلىپ ءتۇستى. ءبىز بۇگىن سول جاۋاپ حاتتى وقىرمان نازارىنا ۇسىنامىز...

اۋىت مۇقيبەكتىڭ قر پرەمەر-ءمينيسترىنىڭ ورىنباسارى  ە.ل. توعجانوۆقا جازعان اشىق حاتىنا!

اينالايىن اۋىتجان!

تاريح كەرۋەنىندە قانشاما قاندى، قانسىز وقيعامەن بەتپە-بەت كەلگەن قانداستارىڭدى ايامادىڭ با؟ اقمولا وبلىسىنىڭ ارشالى اۋدانىنان التى الاشتىڭ ءبىر بۇتاعى بولىپ باس قوسىپ، ءبىر جەڭنەن قول، ءبىر جاعادان باس شىعارىپ، اۋىل شارۋاشىلىعىنا ارنالعان جەردى جەكە مەنشىكتەن ساتىپ الىپ، دۇنيەجۇزى قازاقتارى قاۋىمداستىعىنىڭ كومەگىمەن، جەكە تۇرعىن-ءۇي سالۋعا اينالدىرۋ ءۇشىن 118 مىڭ پاراقتان استام قۇجات جيناپ، ەندى-ەندى ۇكىمەتتەن دۇنيەجۇزى قازاقتارىنىڭ قاۋىمداستىعى ارقىلى، سول قاۋىمداستىق توراعاسىنىڭ ءبىرىنشى ورىنباسارى زاۋىتبەك قاۋىسبەكۇلىنىڭ تىنباي جۇمىس ىستەۋىنىڭ ارقاسىندا، تۇرعىن ۇيلەر تۇسەتىن جەرگە ينفراقۇرىلىمىنىڭ سالىنۋىنا قول جەتكىزگەنىمىزدە، نەگە زىميان جىلانعا ۇقساپ، كەسە كولدەنەڭدەپ، قۇيرىعىڭدى ارى-بەرى بۇلعاڭداتىپ جاتىرسىڭ؟

ءبىز ءبىر توپ وزبەكستاننان كەلگەن قانداس اعايىندار، ءبىر اۋىل بولىپ وتىرايىق دەگەن شەشىمگە كەلىپ، ءۇي سالىپ الايىق دەپ جاتىر ەدىك. نەگە ۇكىمەتتى قانداس اعايىنىڭا ايداپ سالىپ جاتىرسىڭ؟ بالكىم سەن بىزدەردى قيىنشىلىق كەزدە ەلدى تاستاپ كەتىپ، ەندى ەلگە ارنايى ستاتۋسپەن ورالىپ جاتىرسىڭدار دەپ تە جالا جابارسىڭ؟.. ءبىز قازاقتىڭ دالاسى، ءوز جەرىمىزدە مەكەن ەتتىك. كسرو كەزىندە سول جەرلەر وزبەكتەردىڭ يەلىگىنە ءوتىپ، قالىپ كەتتى. دىنمۇحامەد احمەتۇلى قوناەۆ ءۇش اۋداندى، جەتىساي، ماقتاارال، كيروۆ اۋداندارىن قايتارىپ الدى. بىراق، قالىپ قويعان جەردەن وزبەكستان بىرنەشە اۋدان قۇرىپ، سول اۋدانداردىڭ ەسەبىنەن جىزاق وبلىسىن اشىپ الدى.

وتباسىمىزدى ەشكىمگە مۇقتاج ەتپەي، مەملەكەتكە الاقان جايماي، ءوز ءۇيىمىزدى ءوزىمىز سالا باستاپ ەدىك. 1282 كوتتەدج سالۋعا از قاراجات كەتپەيدى دەپسىڭ. ونداعى قۇرىلاتىن ۇيلەردى ءاربىر وتباسى ءوز كۇشىمەن سالىپ الادى. بۇل جۇمىستار سەن ايتقانداي، 2021 جىلى باستالعان جوق. ونىڭ باستالعانىنا 5 (بەس) جىلدان استام ۋاقىت كەتتى. بيۋروكراتيالىق جۇيەدە بۇعان قول جەتكىزۋ وڭاي ەمەستىگىن بىلمەيتىن بە ەدىڭ؟ ۇكىمەت تاراپىنان زاڭدى تۇردە ينفراقۇرىلىمنىڭ سالىنۋىن كورە المايسىڭ با؟

مول قاراجاتتى وكىمەت زاۋىتبەك تۇرىسبەكوۆتىڭ قولىنا ۇستاتا سالعانىن قايدان كوردىڭ؟ ينفراقۇرىلىمدى تەندەردە جەڭىپ شىققان مەكەمە جۇرگىزەتىنىن جانە اقشا سول مەكەمەگە تولەنەتىنىن دە بىلمەيسىڭ بە؟ جازعانىڭنىڭ بارلىعى وتىرىك ەكەنىن وقىعان ادامنىڭ ءبارى بىلەدى. جالاقورلىعىڭ ءۇشىن اللانىڭ الدىندا دا، كەلەشەكتە ۋاقىتى كەلگەندە زاڭ الدىندا دا قاتاڭ تۇردە جاۋاپ بەرەسىڭ.

اۋىت مۇقيبەك، سول ءبىز سالعان ۇيلەر، ۇلكەن اۋىل بولايىن دەپ تۇر. سول اۋىلعا ينفراقۇرىلىم كەرەك ەمەس دەپ سانايسىڭ با؟ وقو اكىمى بولىپ جۇرگەندە، تاشكەنتكە تالاي رەت بارىپ، سۋدىڭ قۇلاعىندا وتىرعان الا شاپاندى اعايىننان ءوزىنىڭ ساياسي شەبەرلىگىنىڭ ارقاسىندا وڭتۇستىك القاپتى، وقو، جامبىل، قىزىلوردا وبلىستارىنىڭ جەرلەرىن سۋارۋ ءۇشىن سۋ ماسەلەسىن، ەلەكتر ەنەرگيا ماسەلەسىن، وبلىستىڭ اكىمى بولا تۇرا، وزبەكستاننىڭ پرەزيدەنتى ي.كارىموۆپەن تەڭ دارەجەدە كەلىسسوز جۇرگىزگەن زاۋىتبەك قاۋىسبەكۇلىنىڭ، بىزگە قول ۇشىن سوزىپ، جاردەم بەرگەنىن كوپ كورىپ وتىرسىڭ با؟ الدە جازىپ وتىرعانىڭ كەيبىر «كوكەشكالارىڭنىڭ» تاپسىرىسى ما؟ ازداعان بلوگەرلىك جولدى كاسىپ ەتىپ، بىرەۋلەردىڭ اقىرىنان جەم جەپ جۇرگەن جوقسىڭ با؟

اۋىتجان!

قاراپايىم قانداس باۋىرلارىڭا جانە بىزگە قولقانات بولىپ جۇرگەن ساياساتتىڭ اقساقالى زاۋىتبەك قاۋىسبەكۇلىنا تيىسە كورمە. ۇكىمەت نازارىن اۋدارسىن، تەكسەرىپ اق قاراسىن انىقتاسىن. ول جەرگە ءالى كوپ نارسەلەر سالىنۋى ءتيىس. سەن شىنىمەن اقىن بولساڭ، حالىققا جاناشىر بولساڭ، ءۇي سالىپ الۋعا كۇشى جەتپەي تۇرعان قانداستارىڭا ۇكىمەتتىڭ نازارىن اۋدارتىپ، تومەنگى  پايىزبەن نەسيە الىپ بەر. سوندا سەنىڭ دە اتىڭ زاۋىتبەك اعانىڭ اتىمەن بىرگە اتالادى. اۋىر جۇمىستا ادال ەڭبەگىمەن ناپاقا تاۋىپ جۇرگەن حالىققا تيىسە كورمە. ءبىز دە ۇلكەن ەلمىز. كەز كەلگەن ۋاقىتتا سەنىمەن زاڭدى تۇردە ەسەپتەسۋگە دايىنبىز. جانە جۇمىستاعى كوپ كىسىلەردىڭ فەيسبۋك، ينتەرنەت قاراۋعا ۋاقىتى جوق. سوندىقتان، مىناۋ سەنىڭ جازعانىڭنان بەيحابار. كوپشىلىكتىڭ ىشىنەن ءبىردى-جارىمى سەنى قاتتى رەنجىتىپ قويۋى ىقتيمال. سەن ايازدى اياز دەمەي، اپتاپ ىستىقتى ىستىق دەمەي، قولى كۇس-كۇس بولىپ ىستەپ جۇرگەن اعايىندارىڭنان ۇيالمايسىڭ با؟ تاپسىرىسپەن تاپقان قارجىڭ قالاي سىڭبەك، بالا-شاعاڭدى سول قارجىمەن قالاي باقپاقسىڭ؟

تاعابەك بايزاقوۆ،

قاراشا قۋانىشۇلى قالدىبەكوۆ،

قايرات اشيموۆ، 

ءابىلدا دوسانۇلى تۇرانوۆ، 

داۋلەت سەرىكبايۇلى قالمىرزاەۆ. 

Abai.kz