رەسەي بيلىگى قوس سەپاراتيستىك ايماقتى دەربەس ەل دەپ مويىندادى.

بۇل شەشىمدى وركەنيەتتى الەم ەلدەرى ايىپتاپ جاتىر. الايدا ونى قۋاتتاپ، مويىنداپ وتىرعان مەملەكەتتەر دە بار. ۆەنەسۋەلا، سيريا اتالمىش شەشىمدى وڭ قابىلداعانىن ايتادى. ال مويىندالماعان ابحازيا مەن وڭتۇستىك وسەتيا العاشقىلاردىڭ ءبىرى بولىپ پۋتين شەشىمىن قولدادى. رەسەي باسشىسى دۇرىس جاسادى دەگەندەردىڭ ىشىندە يەمەندەگى «انسار اللا» اسكەري توبى دا بار. ونى كەي ەلدەر تەررورلىق توپ دەپ تاپقانىن ايتا كەتەلىك. وسى رەتتە قازاقستاننىڭ شەشىمى قانداي بولماق دەگەن سۇراق تۋىندايدى.

بۇل ساۋالعا سىرتقى ىستەر ءمينيسترى محتار تىلەۋبەردى جاۋاپ بەردى. ونىڭ ايتۋىنشا، قازاقستان بەيتاراپ ۇستانىمدى قولدايدى. «ەڭ بىرىنشىدەن وزدەرىڭىز تۇسىنەسىزدەر، قازىر جاعداي وتە شيەلەنىسىپ جاتىر. كەشە پۋتين لحر مەن دحر دەربەس ەل دەپ مويىندادى. جاعداي كۇردەلى. ال قازاقستاننىڭ رەسمي ۇستانىمى ءالى دە تالقىلانۋدا. ءبىز حالىقارالىق قۇقىق نەگىزىندە، بۇۇ نەگىزىندە بەيتاراپتىق ساياساتىن ۇستانامىز»، – دەپ جاۋاپ بەردى مينيستر.

ول قازاقستاننىڭ حالىقارالىق قاۋىمداستىقتى ۋكراينا ماسەلەسىن شەشۋدە ديپلوماتيالىق ادىسكە جۇگىنۋگە شاقىرىپ وتىرعانىن ايتادى. «قازاقستاننىڭ الدىندا دحر جانە لحر رەسپۋبلكالارىن مويىنداۋ ماسەلەسى تۇرعان جوق. ۇستانىم قابىلداۋ ءۇشىن قاۋىپسىزدىك كەڭەسىنىڭ وتىرىسى كۇتىلۋدە» ، – دەدى مۇحتار تىلەۋبەردى.

قازاقستان رەسەي وتارلاپ العان قىرىم، پريدنەستروۆە، ابحازيا مەن وڭتۇستىك وسەتيانى مويىنداعان ەمەس. لۋگانسك جانە دونەتسك سەپاراتيستىك ايماعىنا قاتىستى ۇستانىم دا ءدال وسى باعىتتا بولۋى ءتيىس دەيدى ماماندار.

Abai.kz