ۋاكىلدىڭ سوزىنە قاراعاندا، قازىر تەرگەۋ يزولياتورىندا وتىرعان 18 ازاماتتىڭ 14-ءى - وزبەكستان، ەكەۋى – رەسەي، ەكەۋى – قىرعىزستان ازاماتى.

قازاقستاندا قاڭتار وقيعاسى كەزىندە جانە ودان كەيىن ەلدە ۇستالعانداردىڭ ازاپتالعانى تۋرالى كوپ حابار شىققان. ۇستالعانداردىڭ تۋىستارىنىڭ ايتۋىنشا، "ايىپتى مويىنداتۋ ءۇشىن" كۇشتىك قۇرىلىمدار ۇستالعانداردى ۇرىپ-سوققان، دەنەلەرىنە ۇتىك باسقان، ەلەكتروشوكەر سوقتىرعان. "كەمپىراۋىزبەن ءتىسىن جۇلماق بولدى، تىرناقتارىنا ينە سۇقتى" دەپ شاعىمدانعان ازاماتتار دا بار.

بۇعان دەيىن ومبۋدسمەن "پوليتسيانىڭ دورەكى قارىم-قاتىناسى جونىندە" شاعىمدار تۇسكەنىن، ولاردى باس پوكۋراتۋراعا جولدايتىنىن ايتقان. ازاماتتىق بەلسەندىلەر مەن قۇقىق قورعاۋشىلاردىڭ سىنىنا ءجيى ۇشىرايتىن ومبۋدسمەن مەملەكەتتىك ارناعا بەرگەن سۇحباتىندا وزىنە 80 شاعىم كەلىپ تۇسكەنىن ايتقان. جارتىسى – "ۇستاعاندارعا دورەكىلىك كورسەتۋ" تۋرالى شاعىمدار. ول شاعىمداردىڭ بارلىعى پروكۋراتۋراعا تاپسىرىلاتىنىن ايتقان.

ەلۆيرا ءازىموۆانىڭ ايتۋىنشا، تەرگەۋ كەزىندە زاڭسىز ادىستەردىڭ قولدانىلۋىنا بايلانىستى قوزعالعان قىلمىستىق ىستەر 191-گە جەتكەن.

"قاماۋدا جارالانعاندار مەن سوققىعا جىعىلعاندار كوپتىگى جايلى حابارلامالارعا قاتىستى مىنا نارسەنى اتاپ وتكىم كەلەدى: حابارلامالار 8 قاڭتاردان كەيىن كۋلميناتسياسىنا جەتتى. قازىر قاماۋعا الىنعاندار اراسىندا جارالانعان 55 ادام بار، سىنعان جەرى بار 8 ادام، 212 ادامدا ىسىك (گەماتوما) بار. ەمدەلىپ جاتىر. العاش ۇستالعان كەزدە ولار جەدەل جاردەم كولىكتەرىنە جەتە المادى" دەدى ول.

ونىڭ ايتۋىنشا، الماتى قالاسى، الماتى مەن جامبىل وبلىستارىندا قامالعاندار اراسىندا 16-17 جاستاعى كامەلەتكە تولماعان جاسوسپىرىمدەر بار. بىراق ولاردىڭ سانىن ناقتىلاماعان. ونىڭ ايتۋىنشا، ولارعا جاپپاي تارتىپسىزدىك، عيماراتتى باسىپ الۋ، قارۋ-جاراق ۇرلاۋ سياقتى اۋىر باپتار تاعىلعان.

ول قازاقستان راتيفيكاتسيالاعان بالا قۇقىقتارى كونۆەنتسياسىن العا تارتىپ، جاسوسپىرىمدەردىڭ قاماۋدان بوساتىلعانىن، تەك تارازدا پروكۋرور تەكسەرىسىنىڭ اياقتالماعانىنا بايلانىستى ءبىر ءجاسوسپىرىم قاماۋدا قالعانىن ايتقان.

قاماۋداعى ازاپتاۋلار جايلى اقپاراتتار كوبەيگەن شاقتا قاڭتار ايىنىڭ ورتاسىندا الماتىداعى تەرگەۋ يزولياتورى مەن ۋاقىتشا قاماۋ ورىندارىنا كىرىپ شىققان ومبۋدسمەن "پوليتسيانىڭ دورەكى قارىم-قاتىناسى تۋرالى" شاعىمدار باس پروكۋراتۋرا مەن ىشكى ىستەر مينيسترلىگىنە تاپسىرىلادى دەپ ايتقان. ول تەرگەۋ يزولياتورى مەن ۋاقىتشا قاماۋ ورىندارىندا وتىرعانداندارعا قاتىستى "تەرروريست" ۇعىمىن قولدانىپ، ولاردى بەيبىت شەرۋگە قاتىسقانداردان اجىراتۋ قاجەتتىگىن العا تارتقان.

Abai.kz