الماتىنىڭ ءدال ىرگەسىندە تۇرىپ، جارىققا جارىماي وتىرمىز. «التىن وردا» بازارىنىڭ قاسىنداعى، اپورت ساۋدا ورتالىعىنىڭ ارتىنداعى 4-ءشى كۆارتال تۇرعىندارى جارىقتان دا، جولدان دا ابدەن مەزى بولدى. بۇل ەلدىمەكەن قازىر ناعىز قىلمىستىڭ ورداسىنا اينالدى. مۇندا ۇرلىق-قارلىق، توناۋ، توپ بولىپ توبەلەسۋ تىپتەن جيىلەپ كەتتى. بۇگىندە بۇل جاقتى حالىق 13-ءشى رايون، ياعني، «كريمينالدى ايماق» دەپ اتايدى. جۇرتشىلىق اراسىندا وسى «بۇزىق ايماق» اتانعان مەكەنگە قاشان كوڭىل بولەسىڭدەر، اكىمدەر؟!

ساپالى جارىققا قول جەتكىزە الماي جۇرگەنىمىزگە ون جىلدان استى. بىزگە جارىق جەكەمەنشىك ترانسفورماتوردان بەرىلەدى. وعان ەكى ەسە (1كۆت-ىنا 32 تەڭگە) قىمبات تاريفپەن اقى تولەپ كەلەمىز. جاي كۇندە قۋاتى از جارىق جەل تۇرىپ، جاڭبىر جاۋسا، مۇلدەم ءوشىپ قالادى. قانشاما ەلەكتر تەحنيكالارىمىز ىستەن شىقتى. كرەديتكە العان حولوديلنيك، تەلەۆيزور، كومپيۋتەرلەرىمىز كۇيىپ كەتتى. جارىققا جارىماي وتىرعان ەلدىمەكەندە ينتەرنەت تۋرالى ايتۋدىڭ ءوزى ارتىق. قاشىقتىقتان وقۋعا كوشكەلى بالالاردان بەرەكە كەتتى.

ايتپەسە، كوشەمىزدىڭ باسىندا مەملەكەت تاراپىنان باعانالار ورناتىلعان ەلەكتر سىمدارى تارتىلعان. ياعني، مەملەكەتتىك ترانسفورماتورعا جالعانعان ساپالى جارىق ءدال قاسىمىزدا تۇر. وكىنىشتىسى سول، ىرگەلى اۋىلىنىڭ اكىمى ابىلاي ىسقاقوۆ تا، قاراساي اۋدانىنىڭ اكىمى جانداربەك دالاباەۆ تا ءبىزدى وسى ءتيىپ تۇرعان مەملەكەتتىك ساپالى جارىققا قوسۋعا مويىن بۇرار ەمەس.
بۇعان دەيىن ءبىز كورشىلەرمەن بىرىگىپ قاراجات جيناپ، بەتون باعانالار ورناتتىق. ەلەكتر سىمدارىنا دەيىن ساتىپ الدىق. ەندى تەك اكىم قارالاردىڭ رۇقساتىمەن مەملەكەتتىك ساپالى جارىققا قوسىلۋ عانا قالدى. وسىنىڭ ءوزىن قوس اكىم جاساماي وتىرعاننان كەيىن باسقا نە دەۋگە بولادى؟ جەرگىلىكتى اكىمدەر شايناپ بەرگەن استى جۇتا الماسا كىمگە رەنجيمىز؟ «جانى اشىماستىڭ قاسىندا باسىڭ اۋىرماسىننىڭ» كەرىن كەلتىرىپ وتىرعان مۇنداي اكىمدەرگە قاشانعى توزە بەرۋگە بولادى؟!.

ايتپاقشى، ايتا كەتەيىن، ءبىزدىڭ جەرىمىز اۋىلشارۋاشىلىعى ماقساتىندا پايدالانۋعا ارنالعان جەر ەمەس. جەرىمىزدىڭ مەملەكەتتىك اكتىسى تۇرعىن ءۇي سالۋ ءۇشىن بەرىلگەن. سوندىقتان اكىم قارالار نەبىر سىلتاۋ ايتىپ، حالىقتى الداعانشا، ماسەلەنى دەر كەزىندە شەشۋگە ءمان بەرگەن ءجون. ەندى «حالىق ۇنىنە قۇلاق اساتىن جاڭا مەملەكەتتىڭ» ءبىر وبلىسىنا بولىس بولعان بوزىمباەۆ قاراپايىم حالىقتى بوزداتىپ جىبەرمەي، كەرىسىنشە، بولىسسا دۇرىس-اق بولار ەدى...

Abai.kz