قازاقستاننىڭ ۋكراينادان شىعا الماي قالعان 50 جۇك كولىگىنىڭ جۇرگىزۋشىسى قازاقستان ۇكىمەتىنەن كومەك سۇرايدى. قازاقستاننىڭ ءار وڭىرىندەگى كومپانيالارعا تيەسىلى بۇل كولىكتەردىڭ باسىم كوپشىلىگى كيەۆ تۇبىندە، ۋكراينا مەن رەسەي شەكاراسىنا جاقىن ماڭدا تۇر.

رەسەي شابۋىل باستاماي تۇرعاندا ۋكرايناعا بارىپ، DAF ماركالى جۇك كولىگىنە كونديتەر ونىمدەرىن تيەپ العان ولەگ بروممەر قازىر كيەۆ تۇبىندەگى بروۆار اۋدانىندا. كولىك اقتوبە قالاسىنىڭ "MR-Logistic Group" كومپانياسىنا تيەسىلى.

"كيەۆتەن 30 شاقىرىمداي جەردەمىز. جانىمداعى كولىكتىڭ جۇرگىزۋشىسى ورال قالاسىنان كەلگەن. قۇزىرلى ورگانداردان كومەك سۇراپ، ۆيدەو جولداپ جاتقانىمىزعا بىرنەشە كۇن بولدى. ەشقانداي رەاكتسيا جوق. مەملەكەت ءبىزدى ۇمىتقان سياقتى",-دەيدى ولەگ بروممەر.

قاقتىعىس ايماعىندا اقتوبە وبلىسىنان كەم دەگەندە 11 جۇك كولىگى بار. ونىڭ ەكەۋى "بەكاس" كومپانياسىنىكى. "بەكاس" كومپانياسىنا تيەسىلى ەكى كولىكتىڭ ءبىرى ۋكراينانىڭ دۋبنو، ەكىنشىسى پيرياتين قالاسىندا قالىپ قويعان. قاۋىپسىزدىكتى ويلاعان كولىك جۇرگىزۋشىلەرى سوعىس قارساڭىندا تيەلگەن جۇكتى زاۋىتقا اپارىپ، قايتا تاپسىرۋعا ءماجبۇر بولعان.

Abai.kz