قىتايمەن شەكاراداعى «نۇر جولى» كەدەن بەكەتىندە لاۋازىمدى تۇلعالاردىڭ قىلمىستىق ارەكەتى اشكەرەلەندى.

بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ تەلەگرام كانالىندا جاريالاندى.

كەدەن بەكەتىندەگى قىلمىستىق ارەكەتتى الماتى وبلىسى بويىنشا سىبايلاس جەمقورلىققا قارسى قىزمەت باس پروكۋراتۋرانىڭ ىشكى تەرگەۋ دەپارتامەنتىمەن بىرلەسە انىقتادى.

جەدەل جۇرگىزىلگەن ايلا-شارا جەلىسى بويىنشا قاداعالاۋ ورگانىنىڭ قىزمەتكەرى «ماسەلەلەردى وڭ شەشكەنى» ءۇشىن 50 مىڭ اقش دوللارى مولشەرىندە پارا بەرگەن. پارا بەرۋ فاكتىسى قۇجات تۇرىندە راسىمدەلىپ، ناتيجەسىندە «نۇر جولى» كەدەن بەكەتىنىڭ باسشىسى مەن ونىڭ ورىنباسارى ۇستالدى.

سونىمەن قاتار، تەكسەرۋشىلەرگە ءىرى كولەمدەگى تاۋار كونترابانداسىن جاسىرعانى ءۇشىن 30 مىڭ اقش دوللارى مولشەرىندە پارا بەرگەن ۋاكىلەتتى ەكونوميكالىق وپەراتورلاردىڭ ءبىرىنىڭ وكىلى دە ۇستالدى.

سوتقا دەيىنگى تەرگەۋ ءجۇرىپ جاتىر. سول سەبەپتى، وزگە اقپارات جاريا ەتۋگە جاتپايدى.

ەسكە سالا كەتەيىك، مەملەكەت باسشىسىنىڭ تاپسىرماسىمەن بيىلعى قاڭتاردان باستاپ كەدەن بەكەتتەرىندە ۋاكىلەتتى ەكونوميكالىق وپەراتورلاردىڭ قىزمەتىنە تەكسەرۋ جۇرگىزىلەتىنى بەلگىلى. تەكسەرۋلەرگە باس پروكۋراتۋرا قىزمەتكەرلەرى جەتەكشىلىك ەتەدى.

Abai.kz