ءداستۇر مەن جاڭاشىلدىق توعىسقان تەاتر مەرەكەسى
الماتى قالاسىندا «الاتاۋ» ءداستۇرلى ونەر تەاترىنىڭ 10 جىلدىق مەرەيتويىنا وراي، الماتى قالاسى اكىمدىگىنىڭ قولداۋىمەن «ALMATY THEATRE FEST» رەسپۋبليكالىق تەاتر فەستيۆالى باستالدى. 2026 جىلعى 15–20 قاراشا ارالىعىندا وتەتىن مادەني شارا ەلىمىزدىڭ تەاتر ونەرىندەگى ۇزدىك تۋىندىلاردى ءبىر ساحنادا توعىستىرىپ، ءداستۇر مەن جاڭاشىلدىقتىڭ ۇندەسۋىنە جول اشپاق.
التى كۇنگە جوسپارلانعان فەستيۆالدىڭ باستى ماقساتى – ۇلتتىق ونەردىڭ قۇندىلىقتارىن دارىپتەۋ، زاماناۋي تەاتر ۇدەرىسىندەگى تىڭ ىزدەنىستەردى تانىستىرۋ، شىعارماشىلىق ۇجىمدار اراسىنداعى تاجىريبە الماسۋدى دامىتۋ جانە كورەرمەنگە سان ءتۇرلى جانرداعى ساحنالىق تۋىندىلاردى ۇسىنۋ.
فەستيۆالدىڭ العاشقى كۇنى ءباسپاسوز كونفەرەنتسياسى مەن سالتاناتتى اشىلۋ راسىمىنەن باستالدى. ال كەشكى ساعات 17:00-دە كورەرمەن نازارىنا رەجيسسەرلىك شەشىمىمەن فارحاد مولداعاليدىڭ «ماملۇك. سۇلتان بەيبارىس» soundrama قويىلىمى ۇسىنىلدى.
فەستيۆال باعدارلاماسى مازمۇندىق ءارى جانرلىق الۋاندىعىمەن ەرەكشەلەنەدى. 16 قاراشادا رەجيسسەر مەيرام ءحابيبۋلليننىڭ «ۆويتسەك» تراگەدياسى جانە ءالي بيداحمەتتىڭ «سايگۇلىك» مۋزىكالىق دراماسى ساحنالانسا، 17 قاراشادا كورەرمەن گۇلناز بالپەيسوۆانىڭ «She Is Aiel» soundrama قويىلىمىن جانە ەركەبۇلان قابدىلدىڭ «جابايى الما» دراماسىن تاماشالاي الادى.
18 قاراشادا دينا جۇمابايدىڭ رەجيسسەرلىگىمەن الەكساندر وستروۆسكيدىڭ «نايزاعاي» دراماسى ۇسىنىلادى. سونداي-اق ساعات 15:00-دە «ءداستۇرلى ونەر جانە زاماناۋي تەاتر كەڭىستىگى» تاقىرىبىندا رەسپۋبليكالىق عىلىمي-پراكتيكالىق كونفەرەنتسيا وتەدى. كەشكى باعدارلامادا دا دينا جۇماباي ساحنالاعان «قورعانسىز» تريلوگياسى كورەرمەنگە جول تارتادى.
19 قاراشا فەستيۆالدىڭ مازمۇندىق تۇرعىدان ەرەكشە كۇندەرىنىڭ ءبىرى بولماق. بۇل كۇنى گۇلناز ادايدىڭ رەجيسسەرلىگىمەن «توميريس» performance قويىلىمى، گريگوري لايكونىڭ «ورتەكە» storytelling تۋىندىسى جانە الەكساندر نەدومولكيننىڭ ساحنالاعان ۋيليام شەكسپيردىڭ ماڭگىلىك ماحاببات تاقىرىبىن ارقاۋ ەتكەن «رومەو مەن دجۋلەتتا» soundrama قويىلىمى ۇسىنىلادى.
ال 20 قاراشادا ەرالحان مىرزاحمەتتىڭ رەجيسسەرلىگىمەن «گۇلگە ۇمتىلعان ەكەۋ» دراماسى ساحنالانىپ، كەشكى ساعات 17:00-دە فەستيۆالدىڭ سالتاناتتى جابىلۋ ءراسىمى وتەدى.
ءبىر اپتاعا جۋىق ۋاقىتتى قامتيتىن ونەر مەرەكەسىندە كلاسسيكالىق دراماتۋرگيا، ۇلتتىق تاقىرىپ، تاريحي تۇلعالار تاعىلىمى مەن زاماناۋي ساحنالىق ىزدەنىستەر ءوزارا ساباقتاسادى. Soundrama, مۋزدراما، performance, storytelling سىندى ءتۇرلى باعىتتاردىڭ قامتىلۋى فەستيۆالدىڭ كوركەمدىك كوكجيەگىن كەڭەيتىپ، تەاتر ونەرىنىڭ جاڭا مۇمكىندىكتەرىن تانىتۋعا مۇمكىندىك بەرەدى.
«ALMATY THEATRE FEST» – تەك ساحنالىق قويىلىمدار شەرۋى عانا ەمەس، سونىمەن قاتار تەاتر ماماندارىنىڭ باسىن قوساتىن، كاسىبي پىكىر الماسۋعا جانە شىعارماشىلىق بايلانىستاردى نىعايتۋعا ارنالعان ماڭىزدى مادەني الاڭ.
«الاتاۋ» ءداستۇرلى ونەر تەاترىنىڭ ون جىلدىق بەلەسىنە ارنالعان بۇل فەستيۆال ۇلتتىق ونەردىڭ ءورىسىن كەڭەيتىپ، ءداستۇرلى قۇندىلىقتاردى زاماناۋي تەاتر تىلىمەن ساباقتاستىرۋعا باعىتتالعان ايتۋلى مادەني وقيعا بولماق. ونەر مەن رۋحانياتتى توعىستىرعان فەستيۆال الماتىنىڭ مادەني ومىرىنە تىڭ سەرپىن بەرىپ، تەاترسۇيەر قاۋىمعا ۇمىتىلماس اسەر سىيلايدى.
Abai.kz