ول قانشا ءىس بويىنشا ۇكىم شىققانىن، سوتتالعاندارعا قانداي جازا تاعايىندالعانىن، قانشاسى تۇرمەگە قامالعانىن ايتپادى.

باس پروكۋراتۋرانىڭ دەرەگىنشە، 162 ايىپتالۋشىنىڭ ۇستىنەن قوزعالعان 101 قىلمىستىق ءىس سوتقا جىبەرىلگەن. بۇل ىستەردىڭ باسىم بولىگى الماتىدا قارالىپ جاتىر.

الماتى قالاسى سوتىنىڭ ءباسپاسوز قىزمەتى ازاتتىققا 1 ناۋرىزعا دەيىن اۋداندىق سوتتارعا 69 ءىس ءتۇسىپ، 36 ءىس بويىنشا ۇكىم شىققانىن حابارلادى. ىستەردىڭ كوبى "ۇرلىق" بابىمەن قارالعان. قالالىق سوت بۇرىن قىلمىستىق جاۋاپقا تارتىلماعانداردىڭ جازالارى باس بوستاندىعىن شەكتەۋ جانە شىعىندى وتەۋ جازاسىنا اۋىستىرىلعانىن جەتكىزدى.

قاڭتار وقيعاسىنا قاتىستى العاشقى سوت ۇكىمى 17 اقپاندا شىققان ەدى. الماتىداعى سوت الماتى وبلىسىنىڭ ەكى تۇرعىنى باقىت وڭتاي مەن وجەت جەڭىسحاندى "قارۋ ۇرلادى" دەگەن ايىپپەن بەس جىلعا تۇرمەگە قاماعان.

باس پروكۋراتۋرا 2 ناۋرىزداعى بريفينگتە پروكۋرورلار "تەرروريزم", "تارتىپسىزدىك", "ۇرلىق", "توناۋ", "قارۋ ۇرلاۋ", "پوليتسەيلەرگە كۇش قولدانۋ" ايىپتارىمەن 3666 ءىستى قارالىپ جاتقانىن مالىمدەدى.

ال ىشكى ىستەر مينيسترلىگى قاڭتار وقيعاسىنان سوڭ "ۇرلىق", "توناۋ", "قارۋ ۇرلاۋ" باپتارىمەن 2997 ءىستى تەرگەپ جاتقانىن ايتتى. ءىىم مالىمەتىنشە، 22 ادام "قارۋ ۇرلاۋ" ايىبىمەن كۇدىككە ىلىنگەن.

باس پروكۋراتۋرانىڭ مالىمەتىنشە، 701 ادام تەرگەۋ يزولياتورىندا وتىر، 199 ادام قولحاتپەن بوساتىلعان يا ۇيقاماقتا.

بريفينگتە تۇرمەدەگى ازاپتاۋ ىستەرىنە قاتىستى جاڭا دەرەكتەر ايتىلمادى. بىرنەشە كۇن بۇرىن باس پروكۋراتۋرا تەرگەۋدە كۇدىكتىلەردى ازاپتادى دەگەن كۇدىكپەن ورگانداردىڭ توعىز قىزمەتكەرى ۇستالعانىن مالىمدەدى.

بۇعان قوسا، تالدىقورعاندا ەكس-پرەزيدەنت نازارباەۆتىڭ ەسكەرتكىشىن قۇلاتقان سوڭ ۇستالعان ازامات باتىرباەۆتى قاماۋدا ازاپتادى دەگەن كۇدىكپەن ءبىر ادام قاماۋعا الىنعانى حابارلاندى.

قازاقستاندا قاڭتار وقيعاسىنان سوڭ مىڭداعان ادام ۇستالىپ، جۇزدەگەن ادام "تەرروريزم", "تارتىپسىزدىك", "قارۋ ۇرلاۋ" جانە باسقا دا ايىپتارمەن قاماۋعا الىنعان. قامالعانداردىڭ كوبى تۇرمەدە ازاپتالعاندارىن ايتقان ەدى.

قۇقىق قورعاۋشىلار قازاقستان بيلىگىن قاڭتار وقيعاسىا حالىقارالىق دەڭگەيدە تەكسەرۋگە شاقىرعان ەدى، بىراق نۇر-سۇلتان بۇل ۇسىنىستان باس تارتتى.

Abai.kz