مەملەكەت باسشىسىنىڭ الماتىنى قالپىنا كەلتىرۋ جانە ودان ءارى دامىتۋ جونىندەگى تاپسىرماسىن ورىنداۋ ماقساتىندا اعىمداعى جىلعا ارنالعان جەرگىلىكتى بيۋدجەتتى ناقتىلاۋ بويىنشا قالا ءماسليحاتىنىڭ XVI سەسسياسى ءوتتى. ناقتىلاۋ وتكەن جىلدان 48,9 ملرد تەڭگە سوماسىنداعى قولدا بار بوس قارجى قالدىقتارى ەسەبىنەن جۇرگىزىلۋدە.

وتىرىس بارىسىندا قالا اكىمى ەربولات دوساەۆ بۇل قارجى الەۋمەتتىك ماڭىزى بار ءىس-شارالار مەن جوبالاردى قارجىلاندىرۋعا باعىتتالاتىنىن اتاپ ءوتتى.

مەملەكەت باسشىسىنىڭ قاڭتارداعى قايعىلى وقيعالار كەزىندە زارداپ شەككەن كاسىپكەرلەرگە قولداۋ كورسەتۋ جونىندەگى تاپسىرمالارىن ورىنداۋ ءۇشىن تىركەلگەن 1201 وتىنىمنەن 1 009 بيزنەس سۋبەكتىسىنە 3,774 ملرد تەڭگەنىڭ زالالى وتەلدى، شىعىننىڭ بارلىق تۇرلەرى بويىنشا (جىلجىمايتىن جانە جىلجىمالى مۇلىك، جابدىق) 10 ملن. تەڭگەگە دەيىن تولەمدەردى جەدەلدەتۋ جانە وڭايلاتۋ ءۇشىن اكىمدىكتىڭ باستاماسى بويىنشا ەل ۇكىمەتى مۇلىكتىك شىعىندى وتەۋ قاعيدالارىنا وزگەرىستەر ەنگىزدى. وتىنىمدەردى قاراۋ مەرزىمى 1 ايدان 2 اپتاعا دەيىن قىسقارتىلدى. اكىمدىكتىڭ باعالاۋى بويىنشا، وسى وزگەرىستەردى ەسكەرە وتىرىپ، تولەمدەردى قامتۋ 2022 جىلعى 10 ناۋرىزعا قاراي 90% - عا جەتەدى.

شاعىن جانە ورتا بيزنەستى دامىتۋدى ىنتالاندىرۋ جانە جاڭا جۇمىس ورىندارىن قۇرۋ ماقساتىندا بيزنەستى قولداۋ بويىنشا قوسىمشا شارالار پاكەتى دايىندالدى.

ماسەلەن، «دامۋ» قورىمەن بىرلەسىپ ىسكە اسىرىلاتىن «Almaty Business» وڭىرلىك باعدارلاماسىنا جەرگىلىكتى بيۋدجەت قاراجاتىنان تەپە-تەڭدىك نەگىزدە «1-دەن 1-گە» قوسىمشا 750 ملن تەڭگە ءبولۋ ۇسىنىلادى. ونىڭ جالپى سوماسى 10 ملرد تەڭگەگە جەتەدى. بولىنگەن قارجى ەسەبىنەن، ءبىرىنشى كەزەكتە، ىسكەرلىك بەلسەندىلىگى تومەن اۋدانداردىڭ اۋماعىندا كەمىندە 50 جاڭا جوبا ىسكە اسىرىلادى دەپ كۇتىلۋدە. بۇلار – الاتاۋ، ناۋرىزباي، جەتىسۋ جانە تۇركسىب اۋداندارى. بۇل اۋدانداردا مولشەرلەمە 5%، ال قالعان اۋدانداردا – 7% قۇرايدى.

پرەزيدەنت ق.ك. توقاەۆ جاريالاعان بالالار جىلى اياسىندا مەملەكەتتىك مەكتەپتەردە اعىمداعى جىلدىڭ 1 قىركۇيەگىنەن باستاپ 1-4 سىنىپ وقۋشىلارى تەگىن تاماقپەن قامتاماسىز ەتىلەدى. وسى ماقساتتارعا جەرگىلىكتى بيۋدجەتتەن اعىمداعى جىلدىڭ سوڭىنا دەيىن (4 اي) قوسىمشا 5,3 ملرد تەڭگە ءبولۋ ۇسىنىلادى.

بالالاردىڭ سپورت سەكتسيالارىنا قولجەتىمدىلىگى ءۇشىن سپورت ۇيىرمەلەرىن قارجىلاندىرۋ 1,5 ملرد تەڭگەدەن 3,2 ملرد تەڭگەگە دەيىن ەداۋىر ۇلعايادى.
وقۋشى ورىندارىنىڭ تاپشىلىعىن تومەندەتۋ ماقساتىندا 46 ورتا ءبىلىم بەرۋ وبەكتىسىنىڭ قۇرىلىسى جالعاساتىن بولادى، ونىڭ 22-ءسى اعىمداعى جىلى (14 245 وقۋشى ورنىنا) پايدالانۋعا بەرىلەدى. بوستاندىق، اۋەزوۆ، المالى، جەتىسۋ اۋداندارىنداعى مەكتەپتەرگە جاپسارلاس 5 عيماراتتىڭ قۇرىلىسىن اياقتاۋعا قوسىمشا 1,8 ملرد تەڭگە ءبولۋ ۇسىنىلادى.

حالىقتىڭ الەۋمەتتىك وسال توپتارىن قولداۋ ماقساتىندا جۇمىسپەن قامتۋ باعدارلاماسىن قارجىلاندىرۋ جالعاسۋدا. مۇگەدەكتەر ءۇشىن الەۋمەتتىك جۇمىس ورىندارىنا قارجى قاراستىرۋ جوسپارلانۋدا.
مۇمكىندىگى شەكتەۋلى تۇلعالارعا ارنالعان 7 ورتالىقتىڭ ۇزدىكسىز جۇمىس ىستەۋى ءۇشىن 128,5 ملن تەڭگە سوماسىنا مەديتسينالىق جانە تۇرمىستىق جابدىقتار ساتىپ الۋ جوسپارلانۋدا.

«نۇرلى جەر» مەملەكەتتىك باعدارلاماسى اياسىندا تۇرعىن ءۇي زاەمى ارقىلى باستاپقى جارنانىڭ ءبىر بولىگىن جابۋ ءۇشىن تۇرعىن ءۇي سەرتيفيكاتتارىن بەرۋ بويىنشا قارجىلاندىرۋ 1 ملن تەڭگەدەن 1,5 ملن تەڭگەگە دەيىن ۇلعايتىلدى، وعان 500 ملن. تەڭگە قاراستىرىلۋدا. وسى سەرتيفيكاتتاردى الۋشىلاردىڭ تىزبەسىنە 1 جانە 2 توپتاعى مۇگەدەكتەر، مۇگەدەك بالالارى بار نەمەسە ولاردى تاربيەلەۋشى وتباسىلار، جەتىم بالالار جانە اتا – اناسىنىڭ قامقورلىعىنسىز قالعان بالالار كىرەدى.

اعىمداعى جىلى جاس قانات، الاتاۋ جانە اينابۇلاق-2 شاعىن اۋداندارىندا 3 دەنە شىنىقتىرۋ-ساۋىقتىرۋ كەشەنىنىڭ (دسك) قۇرىلىسىن اياقتاۋ جوسپارلانۋدا. تۇركسىب اۋدانىنىڭ بالالارىن دەنە شىنىقتىرۋمەن جانە سپورتپەن كوبىرەك قامتۋ ءۇشىن جاڭا دسك جوبالاۋ جانە «اۆياتور» ستاديونىن ءبىر مەزگىلدە قايتا جاڭارتۋ باستالدى.

24 مىڭ تۇرعىندى سۋمەن قامتاماسىز ەتۋ ماقساتىندا كەڭساي ساياجاي الابىندا سۋمەن جابدىقتاۋ جەلىلەرىن جوبالاۋ جانە سالۋ، سۋ رەزەرۆۋارلارى مەن سۋ قۇبىرى جەلىلەرىنىڭ، سونداي-اق «دۋمان» شاعىن اۋدانىندا جالپى سوماسى 320 ملن تەڭگە بولاتىن سورعى ستانتسياسىنىڭ قۇرىلىسىن اياقتاۋ جوسپارلانۋدا.

بۇرىن ءال-فارابي داڭعىلىن (شااج-نان ساين كوشەسىنە دەيىن) ورتاشا جوندەۋگە جوسپارلانعان قاراجات تاستىبۇلاق شاعىن اۋدانىنىڭ ۇزىندىعى 8,6 كم، 14 اۋماق شاعىن اۋدانىنىڭ ۇزىندىعى 15,6 كم جانە شاڭىراق-1 شاعىن اۋدانىنداعى وتەمىسوۆ كوشەسىنىڭ ۇزىندىعى 3,9 كم بولاتىن جولدارىن جوندەۋگە جانە سالۋعا باعىتتالاتىن بولادى.

مەملەكەت باسشىسىنىڭ تاپسىرماسى بويىنشا قاۋىپسىزدىكتى قامتاماسىز ەتۋ ماقساتىندا قالانىڭ قۇقىق قورعاۋ ورگاندارى مەن ازاماتتىق قورعانىسىنىڭ ماتەريالدىق-تەحنيكالىق بازاسى قالپىنا كەلتىرىلىپ قانا قويماي، نىعايتىلاتىن بولادى. قوسىمشا الەۋمەتتىك نىساندار مەن ادامدار كوپ جينالاتىن ورىنداردا 3050 سىرتقى باقىلاۋ كامەراسىن قوسۋ جوسپارلانۋدا.
وتىرىس بارىسىندا جەرگىلىكتى اتقارۋشى ورگاندار جۇمىسىنىڭ تيىمدىلىگىن ارتتىرۋ ءۇشىن ءماسليحات الماتى قالاسىن باسقارۋدىڭ جاڭا قۇرىلىمىنىڭ جوباسىن، سونداي-اق قالانىڭ اعىمداعى قىزمەتىنە قاتىستى باسقا دا ماسەلەلەردى بەكىتتى.

Abai.kz