«قاسىرەتتى قاڭتار» كوتەرىلىسندە مەملەكەتتىك بيلىكتى باسىپ الۋ جانە توڭكەرىس جاساۋعا ۇمتىلۋ باپتارى بويىنشا ۇقك باسشىسى كارىم ءماسىموۆ تۇتقىندالعان بولاتىن. ونى تەرگەۋ جانە تەكسەرۋ اسا قۇپيا نەگىزدە جۇرۋدە. زاڭگەرلەر ماسىموۆكە تاعىلعان ايىپتاردىڭ اۋىر ەكەنىن جانە ۇزاق مەرزىمگە باس بوستاندىعىنان ايىرۋ مۇمكىندىگىن جاسىرمايدى. 

ماسىموۆكە قاتىستى ءىستىڭ ءمان-جايىن ۇقك جاريالادى. قازىرگى ۋاقىتتا ونىڭ زاڭسىز ءۇي-جاي يەمدەنگەنى، ەلىمىزدەگى كاسىپكەرلەردەن قىمبات سىيلىقتار العانى قۇجات تۇرىندە دالەلدەندى.

ءماسىموۆ ۇقك باسشىسى بولعان ساتتە شەتەل ازاماتتارىنان جابىق كەلىسىم بويىنشا 2 ملن. دوللار پارا العان دەگەن كۇدىك بويىنشا دا تەكسەرۋ باستالدى. گونكونگتەگى كارىم ماسىموۆكە تيەسىلى قارجىنى ۇلتتىق بانككە قايتارۋ مەحانيزمدەرى جاساقتالىپ، ىسكە اسۋدا.

سونىمەن بىرگە، ءماسىموۆ پرەمەر-مينيستر قىزمەتىن اتقارعان ساتتە قۇنى 2,5 ملرد. تەڭگە بولاتىن ءزاۋلىم ءۇي مەن جەر تەلىمىن بيزنەس وكىلىنەن العانى بويىنشا دا تەرگەۋ باستالدى. قاڭتار ايىندا اتالمىش ءۇيدى تەكسەرۋ بارىسىندا 17,2 ملن. دوللار مەن قىمبات بۇيىمدار تاركىلەنگەن بولاتىن.

جالپى جيىنتىعى ماسىموۆكە تيەسىلى دەگەن 11 قىمبات كولىك انىقتالىپ، مەملەكەت يەلىگىنە ءوتتى.

نۇر-سۇلتان قالاسىنداعى قىمبات ەكى پاتەر مەن الماتىداعى ءزاۋلىم ءۇي، ششۋچينسك-بۋراباي ايماعىنداعى شيپاجايعا ارنالعان 1 گا جەر تەلىمى دە سوت بارىسىنا بايلانىستى تاركىلەنبەك.

ءماسىموۆتىڭ جاقىندارىنان 5,1 ملن. دوللار تاركىلەندى. ۇقك بۇرىنعى باسشىسىنىڭ اقش-تا ءزاۋلىم ۇيلەرى بارى بەلگىلى بولدى. سونىمەن قاتار، بىرقاتار ەۋروپا ەلدەرىندە ەسەپشوتى مەن جىلجىمايتىن مۇلكى بارى انىقتالدى. 

ۇقك اتالمىش ءىس بويىنشا قوعامعا ارنايى بريفينگتەر ارقىلى ناقتى اقپاراتتار بەرىپ وتىراتىنىن ايتتى.

Abai.kz