قىرعىزستان رەسەي مەن ۋكراينا ورتاسىندا بولىپ جاتقان وقيعالاردا بەيتاراپتىق ۇستانىمدا قالادى. وسىلاي دەپ پرەزيدەنت سادىر جاپاروۆ 9 ناۋرىزدا پارلامەنتتە قۇمتور ماسەلەسى تالقىلانعان كەزدە ايتتى.

"بۇگىنگى كۇنى رەسەي مەن ۋكراينا اراسىندا بولىپ جاتقان وقيعالاردىڭ سالدارى بارلىق مەملەكەتتەرگە كەرى اسەرىن تيگىزىپ جاتىر. الەمدىك دەڭگەيدە ساۋدا-ەكونوميكالىق، قاۋىپسىزدىك، قارىم-قاتىناس جانە باسقا سالالاردا دا جاعداي قيىن. اسىرەسە سوڭعى كۇندەرى حالىقارالىق احۋال، ونىڭ ىشىندە الەم نارىعىندا جاعداي قيىنداپ بارادى. ءبىز شاعىن عانا مەملەكەتپىز، سوعىستى توقتاتۋعا شامامىز دا جەتپەيدى، سول سەبەپتەن ءبىز بەيتاراپتىق ۇستانىمدا قالامىز".

پرەزيدەنت دوللاردىڭ باعامى ءوسىپ، ازىق-تۇلىك قىمباتتاپ جاتقانىن، مۇنداي جاعدايدا امبيتسيالاردى ارتقا قالدىرۋدى، ورىنسىز سىن-پىكىرلەر ايتا بەرمەۋگە شاقىردى.

رەسەي ۋكرايناعا 24 اقپاندا باسىپ كىردى. سودان بەرى ۋكراينانىڭ بارلىق قالالارىندا اتقىلاۋ مەن بومبالاۋ ءجۇرىپ جاتىر.

بۇۇ جاڭا دەرەگى بويىنشا، ۋكراينادا سوعىس باستالعالى 516 بەيبىت تۇرعىن قازا بولىپ، 908 ادام جارالانعان. قازا تاپقانداردىڭ اراسىندا 37 بالا بار.

بۇعان دەيىن ۋكراينانىڭ بالالار قۇقىعى جونىندەگى ۋاكىلى داريا گەراسيمچۋك رەسەي ۋكرايناعا سوعىس اشقالى 61 بالا كوز جۇمدى دەگەن.

رەسەي اسكەريلەرى ماريۋپولدەگى اۋرۋحانا مەن پەرزەنتحانانى اتقىلاعانى حابارلاندى. بۇل تۋرالى جەرگىلىكتى بيلىك پەن كۋاگەرلەرگە سىلتەمە جاساعان ۆۆس سايتى جازدى.

"بالالار ەمدەلەتىن كورپۋس تولىعىمەن قيرادى. زارداپ شەككەن بالالار بار-جوعىن انىقتاپ جاتىرمىز" دەپ مالىمدەدى ماريۋپول قالاسىنىڭ كەڭەسى.

كيەۆ وبلىسىنداعى يرپەن، بۋچا، گوستومەل، بوروديانكا جانە ۆورزەل قالالارىنان بەيبىت تۇرعىنداردى ەۆاكۋاتسيالاندى.

Abai.kz