بۇگىن پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ جاتىر. مەملەكەت باسشىسى «مەملەكەتكە ساتقىندىق جاساعان ادامدار» تۋرالى ءوز سوزىندە اتاپ ءوتتى.

قاسىم-جومارت توقاەۆ: «توڭكەرىس جاساۋعا ۇمتىلعانداردىڭ اراسىندا بەلگىلى ادامدار بولدى. جوعارى لاۋازىم يەلەرى مەملەكەتكە ساتقىندىق جاسادى. ولار كۇشتىك قۇرىلىمداردىڭ زاڭعا سايكەس قيمىلداۋىنا كەدەرگى كەلتىردى. مەملەكەت باسشىلىعىنا قالالارداعى احۋال تۋرالى جالعان اقپارات بەردى»،- دەدى ول.

قاڭتار وقيعالارىنان كەزىندە ۇلتتىق قاۋىپسىزدىك كوميتەتىنىڭ بۇرىنعى باسشىسى، كوپ جىلدار بويى مەملەكەتتىك لاۋازىمداردى يەلەنگەن كارىم ءماسىموۆ ۇستالعان بولاتىن. ول مەملەكەتكە وپاسىزدىق جاسادى دەپ كۇدىككە ءىلىنىپ، تەرگەۋ يزولياتورىنا قامالدى. كەيىن "بيلىكتى باسىپ الۋ" بابى بويىنشا ۇستىنەن قىلمىستىق ءىس قوزعالدى. باس پروكۋروردىڭ ايتۋىنشا، ءماسىموۆتىڭ قىلمىسى انىقتالسا 17 جىلعا دەيىن باس بوستاندىعىنان ايىرىلۋى مۇمكىن.

"ساتقىنداردىڭ وپاسىزدىعى قۇقىق قورعاۋ ورگاندارىنىڭ بەدەلىنە نۇقسان كەلتىرمەۋگە ءتيىس. وندا قىزمەت ەتەتىن ازاماتتار دا – ءوز باۋىرلارىمىز. ولار ەلمەن بىرگە ەكەنىن، تۋعان حالقى ءۇشىن قاسىق قانى قالعانشا كۇرەسەتىنىن دالەلدەدى",- دەدى مەملەكەت باسشىسى ءوز جولداۋىندا.

ايتا كەتۋ كەرەك، نۇرسۇلتان نازارباەۆتىڭ نەمەرە ءىنىسى قايرات ساتىبالدى 13 ناۋرىز كۇنى  "قازاقتەلەكوم" اق قوماقتى قارجىسىن جىمقىردى جانە قىزمەتتىك وكىلەتىن اسىرا پايدالاندى دەگەن كۇدىكپەن ۇستالدى.

"قايرات ساتىبالدىۇلىنىڭ مەملەكەت قاۋىپسىزدىگىنە نۇقسان كەلتىرەتىن وزگە دە قىلمىستارعا قاتىسى تەكسەرىلىپ جاتىر. تەرگەۋ جالعاسىپ جاتىر", - دەپ جازدى جەمقورلىققا قارسى ءىس-قيمىل اگەنتتىگى.

قايرات ساتىبالدى ۇستالعاننان كەيىن ەكى كۇننەن سوڭ ەلدىڭ ەكس-پرەزيدەنتى نازارباەۆتىڭ قىزى داريعا نازارباەۆانىڭ بۇرىنعى قۇداسى قايرات بورانباەۆتىڭ قاماۋعا الىنعانى  ءمالىم بولدى. باق بەتىندە بورانباەۆتى قارجىلىق مونيتورينگ اگەنتتىگىنىڭ قىزمەتكەرلەرى ۇستاپ، تەرگەۋ يزولياتورىنا قاماعانى تۋرالى  جازىلدى.

Abai.kz