ءاربىر پارتيا باسەكەلەستىك ۇستانىمىندا جەڭىسكە جەتۋى كەرەك. بۇل پىكىردى سەناتور اقىلبەك كۇرىشباەۆ ايتتى، دەپ حابارلايدى.

«كوپتەگەن ەلدە وسىنداي ەكى پالاتا بار، بىزگە دە دامىعان ەلدەردىڭ باعىتىمەن ءجۇرۋ كەرەك. وسىعان دەيىن ماجىلىسكە پارتيالىق تىزىممەن كەلدى. مەملەكەت باسشىسى پارتياداعى مۇشەلىكتەن شىعاتىنىن ايتىپ، ونى زاڭ جۇزىندە بەكىتۋ ۇسىنىلدى. AMANAT پارتياسى باسقا پارتيالار سياقتى تەك باسەكەلەستىكتە بولادى. وسى ورايدا پارلامەنت قۇرامى مەن سايلاۋ ماسەلەسى باسقاشا بولادى»، - دەدى ا. كۇرىشباەۆ تىلشىلەر ساۋالىنا جاۋاپ بەرە وتىرىپ.

بۇدان بۇرىن حابارلانعانداي، پارتيالاردى تىركەۋ رەسىمى ەداۋىر جەڭىلدەيدى .

مەملەكەت باسشىسى تىركەۋ شەگىن 4 ەسەگە – 20 مىڭنان 5 مىڭ ادامعا ازايتقان ءجون بولاتىنىن ايتتى. وڭىرلەردەگى وكىلدەر سانى 600-دەن 200 ادامعا تومەندەتىلەدى. پارتيا قۇرۋ ءۇشىن ازاماتتاردىڭ باستاماشىل توبىنىڭ ەڭ تومەنگى سانى ۇشتەن بىرگە، ياعني 1000-نان 700 ادامعا ازايادى.

ايتا كەتەيىك، مەملەكەت باسشىسى قاسىم-جومارت توقاەۆ بيىلعى جولداۋىندا پرەزيدەنتتىڭ سەناتتاعى كۆوتاسىن 15-تەن 10 دەپۋتاتقا دەيىن ازايتۋ تۋرالى شەشىم قابىلداعانىن جاريالادى. ونىڭ بەسەۋىن قازاقستان حالقى اسسامبلەياسى قازىرگىدەي سايلامايدى، تەك ۇسىناتىن بولادى .

قازاقستان حالقى اسسامبلەياسىنىڭ ماجىلىستەگى كۆوتاسى جويىلماق. «مەنىڭ ويىمشا، بۇل – ساياسي جاعىنان دا، زاڭدىق تۇرعىدان دا دۇرىس قادام. بۇل كۆوتا سەناتقا اۋىسادى جانە 9-دان 5 دەپۋتاتقا دەيىن كەميدى»، - دەدى پرەزيدەنت.

بۇدان بولەك، مەملەكەت باسشىسى سەناتقا ءماجىلىس قابىلداعان زاڭداردى تەك ماقۇلداۋ نەمەسە ماقۇلداماۋ قۇقىعىن بەرەتىن نورما ەنگىزگەن دۇرىس دەپ سانايتىنىن ايتتى.

«سوعان سايكەس، زاڭ قابىلداۋ قۇقىعى ماجىلىسكە عانا تيەسىلى بولادى. ال، سەناتتىڭ وكىلەتتىگىن كونستيتۋتسيالىق كەڭەس پەن جوعارى سوت كەڭەسىنىڭ توراعاسى لاۋازىمىنا ۇسىنىلاتىن كانديداتتارعا كەلىسىم بەرۋ قۇقىعىمەن تولىقتىرعان ءجون. بۇل وزگەرىس ساياسي جۇيەدەگى تەپە-تەڭدىك جانە تەجەمەلىك مەحانيزمدەرىن ەلەۋلى تۇردە نىعايتا تۇسەدى، زاڭ شىعارۋ ۇدەرىسىن ەداۋىر جەڭىلدەتەدى. سونىمەن قاتار، تومەنگى پالاتانىڭ قۇزىرەتىن كەڭەيتۋ قاجەت»، - دەدى قاسىم-جومارت توقاەۆ.

Abai.kz